Read Chol 1 Samuel 15 Bible Online

1 Samuel 15 - Chol bible

1 Samuel 15

¹Samuel tsi' sube Saúl: Lac Yum tsi' chocoyon tilel cha'an mic wa'chocoñet ti rey ti' tojlel Israel. Jini cha'an yomix ma' wen ñich'tʌben i t'an lac Yum.

²Lac Yum i Dios Panchan yic'ot Pañimil woli' yʌl: “Joñon mi caj cʌq'ueñob wocol jini amalecob cha'an tsi' tic'layob israelob che' bʌ tsi' mʌcbeyob i bijlel che' loq'uemobix ti Egipto.

³Jini cha'an yomix ma' majlel a tsʌnsan jini amalecob. Jisan pejtelel chuqui añob i cha'an. Mach ma' wis p'untañob mi winicob mi x'ixicob, mi alʌlob anquese woliyob to ti chu', mi wacax, mi tiñʌme', mi camello, mi burro. Laj jisañob”, che'en.

⁴Jini cha'an Saúl tsi' tempa tilel winicob ya' ti Telaim, lujunc'al mil soldadojob yic'ot lujump'ejl mil winicob loq'uemo' bʌ ti Judá.

⁵Che' bʌ woli' tilel Saúl ti colem tejclum i cha'an amalecob, tsi' subeyob wa'tʌl xq'uelojelob ya' ti joctʌl.

⁶Tsi' choco majlel winicob cha'an mi' subeñob jini ceneojob: Cucula ti loq'uel wʌ' ba'añetla. Yom mi la' tʌts' la' bʌ ba'an jini amalecob, ame jisʌntiquetla yic'otob. Com j coltañetla cha'an uts tsa' la' pʌsʌ la' bʌ ti' tojlel israelob che' bʌ tsa' letsiyob loq'uel ti Egipto, che'en Saúl. Jini cha'an tsi' tʌts'ʌyob i bʌ jini ceneojob ti' tojlel amalecob.

⁷Saúl tsi' jisa majlel amalecob c'ʌlʌl ti Havila, c'ʌlʌl ti Shur, am bʌ ti' tojel Egipto ba' mi' pasel q'uin.

⁸Saúl tsi' chucu Agag i rey amalecob. Cuxul to tsi' cʌchʌ. Tsi' laj jisayob i contrajob, winicob yic'ot x'ixicob.

⁹Pero ma'anic tsi' tsʌnsayob Agag yic'ot jini wen tac bʌ tiñʌme', yic'ot jini uts'at tac jax bʌ wacax, yic'ot pejtelel yan tac bʌ alʌc'ʌl wen jujp'em tac bʌ. Tsi' lotoyob. Ma'anic tsi' jisayob. Pero jini mach bʌ ch'ejlic tsi' jisayob ti pejtelel.

¹⁰Tsa' c'oti i t'an lac Yum ba'an Samuel:

¹¹Ch'ijiyem c pusic'al cha'an tsa cotsa ti rey jini Saúl, come tsa'ix i tʌts'ʌ i bʌ tic tojlel. Ma'anic woli' jac'beñon c t'an, che'en. Tsi' wen mele i pusic'al Samuel. Jump'ejl ac'ʌlel c'ʌlʌl tsa' sʌc'a tsi' pejca lac Yum ti c'am bʌ t'an. Tsi' cha'le uq'uel.

¹²Wen seb tsa' ch'ojyi Samuel cha'an mi' majlel i taje' Saúl. Jini winicob tsi' subeyob: Tsa'ix c'oti Saúl ti Carmel ya' ba' tsi' wa'choco jini wa'al bʌ xajlel cha'an mi' yʌc' i bʌ ti ña'tʌntel. Ti' wi'il tsi' xoyo i bijlel. Tsa' majli ti Gilgal, che'ob.

¹³Samuel tsa' majli ba'an Saúl. Saúl tsi' yʌlʌ: La' i yʌq'ueñet lac Yum i yutslel i t'an. Joñon tsa'ix c jac'be i mandar lac Yum, che'en.

¹⁴Pero Samuel tsi' sube: ¿Chucoch woli cubiben i t'an jini tiñʌme' tac, yic'ot i yuq'uel jini wacax? che'en.

¹⁵Saúl tsi' jac'ʌ: Jini winicob tsi' chilbeyob jini amalecob. Tsi' lotoyob jini uts'at tac bʌ alʌc'ʌl cha'an mi' yʌq'ueñob tsʌnsʌbil bʌ i majtan lac Yum Dios. Pejtelel jini yan tac bʌ tsa'ix c laj jisa lojon, che'en.

¹⁶Samuel tsi' sube Saúl: Pijtan to. Mi caj c subeñet chuqui tsi' yʌlʌ lac Yum sajmʌl ti ac'ʌlel, che'en. Saúl tsi' jac'ʌ: Subeñon, che'en.

¹⁷Samuel tsi' yʌlʌ: Che' pec' tsa' q'uele a bʌ, ¿mach ba anic tsa' ochiyet ti' rey ti' tojlel jini lajchʌnmojt israelob? Lac Yum tsi' yajcayet cha'an ma' wochel ti' rey Israel.

¹⁸Che' bʌ tsi' chocoyet majlel lac Yum, tsi' wersa subeyet cha'an ma' jac'ben i t'an. Tsi' subeyet: “Yom ma' laj jisan jini xmulilob ti' lumal Amalec jinto mi laj chʌmelob jini amalecob”.

¹⁹¿Chucoch ma'anic tsa' jac'be i t'an lac Yum? Tsa' loto jini chubʌ'añʌl. Che' jini tsa'ix a cha'le ñuc bʌ mulil ti' contra lac Yum, che'en.

²⁰Saúl tsi' jac'be Samuel: Tsa' cu c jac'be i t'an lac Yum. Tsa' majliyon ya' ba' tsi' subeyon c Yum. Cojach tsac pʌyʌ tilel Agag i rey jini amalecob. Pejtelel jini yaño' bʌ tsac laj jisayob.

²¹Pero jini winicob tsi' yajcayob pejtelel jujp'em tac bʌ tiñʌme' yic'ot wacax mu' bʌ caj i wersa tsʌnsʌntel cha'an mi cʌq'uen lojon tsʌnsʌbil bʌ i majtan Dios wʌ' ti Gilgal, che'en.

²²Samuel tsi' yʌlʌ: ¿Tijicña ba mi' q'uel lac Yum jini pulbil bʌ i majtan yic'ot tsʌnsʌbil bʌ i majtan che' ma'anic wola' jac'ben i t'an? Yom cu mi la cʌq'uen tsʌnsʌbil bʌ i majtan Dios. Pero ñumen yom mi lac jac'ben i t'an.

²³Jini mu' bʌ i ñusʌben i t'an Dios lajalʌch i mul bajche' xwujt. Lajal i mul jini tsʌts bʌ i pusic'al bajche' jini mu' bʌ i ch'ujutesan dioste' tac. Tsa'ix a ñusʌbe i t'an lac Yum. Jini cha'an chojquemetix loq'uel ti a yumʌntel. Ma'anix mi caj a chʌn ajñel ti rey, che'en.

²⁴Saúl tsi' sube Samuel: Isujm tsac taja c mul. Tsac ñusʌbe i t'an lac Yum yic'ot a t'an cha'an mic tajben i yutslel i t'an winicob. Jini cha'an tsac jac'beyob i t'an.

²⁵A wocolic ñusʌbeñon c mul. Mach a cʌyon. La' quic'ot che' mic cha' sujtel cha'an mic majlel c ch'ujutesan lac Yum, che'en.

²⁶Pero Samuel tsi' sube Saúl: Ma'anic mic majlel a wic'ot, come tsa'ix a ts'a'le i t'an lac Yum. Jini cha'an lac Yum tsa'ix i chilbeyet a yumʌntel ti' tojlel Israel, che'en.

²⁷Che' bʌ tsi' sutq'ui i bʌ Samuel, Saúl tsi' chucu ti' bujc Samuel. Tsi' jet' tsilbe i bujc.

²⁸Samuel tsi' sube: Lac Yum tsa'ix i chilbeyet a yumʌntel ti Israel. Tsa'ix i yʌq'ue yambʌ winic ñumen wen bʌ bajche'et.

²⁹Jini Dios i ñuclel bʌ Israel mach yujilic lot. Ma'anic mi' yʌn i t'an, come mach lajalic Dios bajche' winic mu' bʌ i cha' wi'il q'uextan i t'an, che'en.

³⁰Saúl tsi' yʌlʌ: Isujm tsa'ix c taja c mul, pero ti wocol t'an mij c'ajtibeñet cha'an ma' q'uelon ti ñuc ti' tojlel jini xñoxtacob ila tic tejclum yic'ot ti' tojlel israelob. Che' jini mi caj c ch'ujutesan a Yum Dios, che'en.

³¹Jini cha'an Samuel tsi' pi'le majlel. Saúl tsi' ch'ujutesa lac Yum.

³²Samuel tsi' yʌlʌ: Pʌybeñon tilel Agag i rey amalecob, che'en. C'unte' tsa' c'oti ba'an Samuel jini Agag. Tijicña i wut che' bʌ tsi' yʌlʌ: Melel, ma'anix bʌq'uen. Tsa'ix ñumi i yorajlel chʌmel, che'en.

³³Samuel tsi' yʌlʌ: Che' bajche' tsa' tsʌnsa winicob cha'an mi' sujtelob ti meba' i ña'ob, che' ja'el mic tsʌnsañet wʌle. Meba'ix mi caj i cʌytʌl a ña', ma'anix i yalobil, che'en. Che' jini Samuel tsi' bic'ti tsepe Agag ti' tojlel lac Yum ya' ti Gilgal.

³⁴Tsa' sujti Samuel ya' ti Ramá. Saúl tsa' majli ti Gabaa.

³⁵C'ʌlʌl che' bʌ tsa' chʌmi Samuel ma'anix ba' ora tsi' chʌn q'uele Saúl. Pero tsi' chʌn mele i pusic'al cha'an i mul Saúl. Lac Yum tsi' mele i pusic'al ja'el cha'an tsi' lon otsa ti rey ti' tojlel israelob.