Read Chol 1 Samuel 16 Bible Online

1 Samuel 16 - Chol bible

1 Samuel 16

¹Lac Yum tsi' sube Samuel: ¿Jayp'ejl to q'uin mi caj a chʌn mel a pusic'al cha'an Saúl, cha'an tsa'ix c chilbe i yumʌntel ti' tojlel israelob? But'u a xulub ti aceite. Ch'ʌmʌ majlel a wic'ot. Mi caj c choquet majlel ba'an Isaí ti Belén, come tsa'ix c yajca juntiquil i yalobil Isaí cha'an mi' yochel ti rey, che'en.

²Samuel tsi' jac'ʌ: ¿Bajche' mi mejlel c mel jini? Mi tsa' caji i yubin Saúl che' ya' añon, mi caj i tsʌnsañon, che'en. Lac Yum tsi' sube: Yom ma' pʌy majlel juncojt xch'oc wacax. Subeñob: “Tsa' tili c tsʌnsʌben i majtan lac Yum”. Che'ʌch yom ma' subeñob.

³Pʌyʌ majlel Isaí ya' ba' ma' tsʌnsʌbeñon c majtan. Ya'i mi caj c pʌsbeñet chuqui mi caj a mel. Mux caj a mul ti aceite jini yajcʌbil bʌ c cha'an mu' bʌ caj c pʌsbeñet, che'en lac Yum.

⁴Che'ʌch tsi' mele Samuel che' bajche' tsi' sube lac Yum. Che' bʌ tsa' c'oti ti Belén, jini xñoxob ti tejclum tsa' loq'ui i tajob, tsiltsilñayob ti bʌq'uen. Tsi' yʌlʌyob: ¿Tsa' ba tili a wʌq'ueñon lojon i yutslel a t'an? che'ob.

⁵Samuel tsi' jac'ʌ: La' ñʌch'lec la' pusic'al. Tsa' tili c tsʌnsʌben i majtan lac Yum. Yom mi la' sʌq'uesan la' bʌ cha'an temel mi la cʌq'uen i majtan lac Yum, che'en. Samuel tsi' sʌq'uesa Isaí ja'el yic'ot i yalobilob. Tsi' pʌyʌyob ya' baqui yom i tsʌnsan majtañʌl.

⁶Che' bʌ tsa' tiliyob, Samuel tsi' wen q'uele Eliab. Tsi' ña'ta: Wʌ'ix wa'al Eliab ti' tojlel lac Yum. Jiñʌch i yajcʌbal lac Yum, lon che'en.

⁷Pero lac Yum tsi' sube Samuel: Mach a lon q'uelben i wut yic'ot i bʌc'tal jini winic, come tsa'ix c ñusa. Ma'anic mic ch'ʌm tic wenta anquese wen i t'ojol jax, anquese wen chan. Joñon mach lajalic mij q'uel che' bajche' winicob. Cojach mi' q'uelbeñob i bʌ i wut pero joñon mij q'uelbeñob i pusic'al, che'en.

⁸Che' jini Isaí tsi' pʌyʌ tilel Abinadab cha'an mi' ñumel ti' tojlel Samuel, pero tsi' yʌlʌ: Mach yajcʌbilic i cha'an lac Yum ja'el iliyi, che'en.

⁹Che' jini Isaí tsi' choco ñumel Sama, pero tsi' yʌlʌ: Mach yajcʌbilic i cha'an lac Yum iliyi, che'en.

¹⁰Isaí tsi' choco ñumel wuctiquil i yalobilob ti' tojlel Samuel. Pero Samuel tsi' sube Isaí: Lac Yum ma'anic tsi' yajcayob, che'en.

¹¹Samuel tsi' c'ajtibe Isaí: ¿Cojix ba a walobilob iliyi? che'en. Isaí tsi' jac'ʌ: Anto yambʌ. Jiñʌch ijts'iñʌl bʌ mu' bʌ i cʌntan tiñʌme', che'en. Jini cha'an Samuel tsi' sube Isaí: Pʌyʌ tilel, come mach mejliconla ti buchtʌl jinto mi' tilel ilayi, che'en.

¹²Jini cha'an Isaí tsi' pʌyʌ tilel jini ijts'iñʌl bʌ. Chʌcwaxan i wut. Wen i t'ojol i wut. Wen uts'at ti q'uelol. Lac Yum tsi' yʌlʌ: Ch'ojyen ti ora. Wa'chocon ti' ye'tel come jiñʌch iliyi.

¹³Samuel tsi' ch'ʌmʌ jini xulub but'ul bʌ ti aceite. Tsi' bombe i jol ti' tojlel i yʌscuñob. Ti jim bʌ ora jini Ch'ujul bʌ Espíritu i cha'an lac Yum tsa' c'oti ti' tojlel David. Samuel tsa' cha' sujti ti Ramá.

¹⁴I yEspíritu lac Yum tsi' tʌts'ʌ i bʌ ba'an Saúl. Jini jontol bʌ espíritu chocbil bʌ tilel cha'an lac Yum tsa' caji i tic'lan.

¹⁵Jini x'e'telob i cha'an Saúl tsi' subeyob: Awilan wolix i tic'lañet jontol bʌ espíritu chocbil bʌ tilel cha'an Dios.

¹⁶Subeñob jini x'e'telob a cha'an, cha'an mi' sʌclañob juntiquil yujil bʌ i ñijcʌntel arpa. Che' wen ch'ijiyem a pusic'al cha'an jini jontol bʌ espíritu chocbil bʌ tilel i cha'an Dios, mi' caj ti lajmel a wocol che' mi' ñijcʌntel jini arpa, che'ob.

¹⁷Jini cha'an Saúl tsi' sube jini x'e'telob i cha'an: Yom mi la' sʌclan juntiquil wen yujil bʌ i ñijcʌntel arpa. Pʌyʌ tilel ba' añon, che'en.

¹⁸Juntiquil x'e'tel tsi' yʌlʌ: Q'uelbilix c cha'an juntiquil i yalobil Isaí ti Belén, wen yujil bʌ i ñijcʌntel arpa. Cabʌlʌch i pusic'al. Wen ch'ejl ja'el. Lac Yum mi' coltan, che'en.

¹⁹Jini cha'an Saúl tsi' choco majlel winicob cha'an mi' subeñob Isaí: Chocbeñon tilel David woli bʌ i cʌntan tiñʌme', che'en.

²⁰Isaí tsi' p'ʌtʌ ti juncojt burro cabʌl caxlan waj, yic'ot jump'ejl pʌchi but'ul bʌ ti' ya'lel ts'usub, yic'ot juncojt alʌ chivo. Tsi' laj choco majlel ti' wenta David i yalobil cha'an mi' yʌq'uen Saúl.

²¹Jini cha'an David tsa' tili ba'an Saúl. Tsa' caji' melben i ye'tel. Saúl tsi' c'uxbi David. Tsi' yʌq'ue i ye'tel ti' tojlel.

²²Tsi' choco majlel winic cha'an mi' suben Isaí: Awocolic mij c'ajtibeñet, la' to cʌlec David quic'ot, come wolix i wen ñuq'uesʌbeñon c pusic'al, che'en.

²³Ba' ora tsa' tili i tic'lan Saúl jini jontol bʌ espíritu chocbil bʌ tilel ti Dios, David tsa' caji i jats' jini arpa. Saúl tsa' cha' caji i yubin i tijicñʌyel yic'ot i c'oc'lel. Jini jontol bʌ espíritu tsi' cʌyʌ i tic'lan.