Read Chol 1 Samuel 17 Bible Online

1 Samuel 17 - Chol bible

1 Samuel 17

¹Jini filisteojob tsa' caji' tempañob i winicob ya' ti Soco am bʌ ti Judá cha'an mi' cha'leñob guerra. Tsa' jijliyob ti Efesdamim ti' yojlil bij ti' tojel Soco yic'ot Azeca.

²Saúl yic'ot pejtelel jini winicob ti Israel tsa' caji' tempañob i bʌ ja'el. Tsa' jijliyob ti joctʌl i c'aba' Ela. Tsa' caji' chajpañob i bʌ cha'an guerra ti' contra filisteojob.

³Ya' añob jini filisteojob ti jump'ejl chan bʌ wits ti' tojel i wut israelob. Much'ulob jini israelob ti yambʌ wits. Xinlʌpʌl jini joctʌl ti' tojlelob.

⁴Tsa' tili ti wa'tʌl ti joctʌl juntiquil colem bʌ winic, filisteo bʌ, i c'aba' Goliat ch'oyol bʌ ti Gat. Uxp'ejl metro i chanlel jini winic.

⁵C'ʌcbil ti' jol i pixol melbil bʌ ti bronce. Laj melbil i bujc ti bronce. Jo'c'al kilo i yalel i bujc.

⁶Melbil ti bronce i wex. Q'uechel i cha'an i puñal melbil bʌ ti bronce.

⁷Wen ñuc i te'el i lanza che' bajche' i te'el jalbal. Junlujump'ejl kilo i yalel i jol i lanza melbil bʌ ti tsucu taq'uin. Jini tsa' bʌ i cuchbe i ye'tijib cha'an guerra tsa' majli ti ñaxan ti' tojel i wut.

⁸Ñajt to tsa' wa'le. Tsa' caji' pejcañob israelob ti c'am bʌ t'an: ¿Chucoch tsa' la' tempa tilel cabʌl soldadojob? Joñon mi caj c cha'len leto ti' wenta jini filisteojob. Yom mi la' yajcan juntiquil cha'an mi' cha'len leto ti la' wenta. Che' jini mi caj laj contrajin lac bʌ.

⁹Mi tsa' mejli i cha'len leto quic'ot, mi tsa' mʌjli i cha'an, che' jini mi caj cochel lojon ti la' winic. Pero mi tsa' mʌjli c cha'an, che' jini mi caj la' yumañon lojon, mi caj la' melbeñon lojon que'tel.

¹⁰Quila to la mi ch'ejletla. Yom mi la' chocbeñon tilel juntiquil cha'an mi' contrajiñon ti leto. Che' tsi' yʌlʌ Goliat.

¹¹Saúl yic'ot pejtelel israelob tsi' yubibeyob i t'an. Tsa' wen cajiyob ti bʌq'uen.

¹²Mach ya'ic an David i yalobil jini efrateo i c'aba' Isaí chumul bʌ ti Belén ti Judá. An waxʌctiquil i yalobilob Isaí. Ñoxix Isaí che' woli ti yumʌntel Saúl.

¹³Jini uxtiquil ascuñʌlo' bʌ i yalobil majlemobix yic'ot Saúl ti guerra. Jiñobʌch Eliab, Abinadab yic'ot Sama.

¹⁴David jiñʌch ñoj ijts'iñʌlix bʌ. Jini uxtiquil ascuñʌlo' bʌ tsi' tsʌcleyob majlel Saúl ti guerra.

¹⁵Sujtemix David i cʌntan i tiñʌme' i tat ya' ti Belén.

¹⁶Awilan cha'c'al q'uin tsa' loq'ui ba'an filisteojob jini colem bʌ winic. Lajal tsi' mele ti jujump'ejl sʌc'ajel yic'ot ti jujump'ejl ic'ajel.

¹⁷Isaí tsi' sube David: Yomix ma' ch'ʌmbeñob majlel a wʌscuñob jo'p'ejl i cha'c'al kilo tiq'uesʌbil bʌ i wut jam yic'ot lujunq'uejl caxlan waj. Ch'ʌmbeñob majlel ti ora ya' ba' much'quibilob soldadojob.

¹⁸Wʌ'an ja'el lujump'ejl queso melbil bʌ ti' chu' wacax. Yom ma' wʌq'uen i yum xquerrajob. Cucu q'uele bajche' añob a wʌscuñob cha'an ma' cha' tilel a subeñon, che'en.

¹⁹Saúl yic'ot i yʌscuñob David yic'ot pejtelel jini soldadojob israelo' bʌ ya' añob ti joctʌl i c'aba' Ela ba' woli' cha'leñob guerra ti' contra filisteojob.

²⁰Seb to tsa' ch'ojyi David. Tsi' cʌyʌ i tiñʌme' ti' wenta juntiquil xcʌnta tiñʌme'. Tsi' chajpa i cuch che' bajche' tsi' sube Isaí. Tsa' caji ti xʌmbal majlel. Tsa' c'oti ya' ba' much'ulob jini soldadojob che' wolix i loq'uelob ti guerra jini soldadojob. Tsi' cha'leyob c'am bʌ t'an cha'an mi' cha' tejchel guerra.

²¹Che' jini tsa' caji' chajpañob i bʌ israelob yic'ot filisteojob cha'an guerra. Woli' q'uelob i bʌ ti jujunwejl.

²²David tsi' cʌyʌ i cuch ti' wenta jini woli bʌ i tempan i bʌl ñʌc'ʌl. Ora tsa' majli i q'uel ya' ba' woliyob ti guerra. Tsa' c'oti ba'an i yʌscuñob cha'an mi' yʌq'ueñob cortesía.

²³Che' ya'to woliyob ti t'an, tsa' cha' loq'ui ba'an i pi'ʌlob jini colem winic i c'aba' Goliat ch'oyol bʌ ti Gat. C'am tsi' cha'le t'an che' bajche' tsi' mele ti ñaxan. David tsi' yubibe i t'an.

²⁴Jini israelob che' bʌ tsi' q'ueleyob, tsa' puts'iyob majlel cha'an bʌq'uen.

²⁵Tsi' yʌlʌyob: ¿Mach ba anic tsa' q'uele jini winic woli bʌ i tilel ilayi? Woli' tilel cha'an mi' ts'a'len israelob. Majqui jach mi' tsʌnsan jini winic mi caj i yʌq'uentel xch'oc bʌ i yalobil rey cha'an i yijñam. Tijicña mi caj i yajñelob i pi'ʌlob ti' yotot i tat che' mach chʌn añobix ti' wenta i yʌc' servicio yic'ot tojoñel, che'ob.

²⁶David tsa' caji' c'ajtiben jini ya' bʌ añob: ¿Chuqui mi caj i yʌq'uentel jini winic mu' bʌ i mʌjlel i cha'an ti' tojlel jini sajtem bʌ filisteo? ¿Yom ba mi lac bʌc'ñan ili winic woli bʌ i tic'lan Israel? ¿Chuqui i ye'tel ti' tojlel jini soldadojob i cha'an bʌ lac Yum? che'en.

²⁷Jini winicob tsa' cha' caji' subeñob chuqui mi caj i yʌq'uentel jini winic mu' bʌ i mʌl.

²⁸Tsa' wen mich'a Eliab i yʌscun che' bʌ tsi' yubibe i t'an David che' woli' pejcan winicob. Tsa' caji' yʌ'len: ¿Chucoch tsa' tiliyet ilayi? ¿Majqui woli' cʌntan jini cha'cojt uxcojt tiñʌme'? Cʌñʌl c cha'an bajche' an a pusic'al. A wom jach tilel a to'ol ñusan q'uin. Jini cha'an tsa' tili a q'uel guerra, che'en.

²⁹David tsi' jac'ʌ: ¿Chuqui c mul? ¿Mach ba t'anic jach woliyon? che'en.

³⁰Tsi' tʌts'ʌ i bʌ ti' tojlel. Tsa' majli ba'an yambʌ winicob. Tsi' cha' c'ajtibe jini jach bʌ t'an. Lajal tsi' cha' subeyob jini winicob che' bajche' ti ñaxan.

³¹Tsa' caji' yubin Saúl chuqui tsi' yʌlʌ David. Che' jini tsi' choco majlel winicob cha'an mi' pʌyob tilel David.

³²David tsi' sube Saúl: Mach yomic mi' melob i pusic'al israelob mi juntiquilic cha'an i t'an Goliat. A winicon. Mic majlel joñon cha'an mic taje' ti guerra ili filisteo, che'en.

³³Saúl tsi' sube David: Maxto mejliquet ti majlel ti guerra yic'ot jini filisteo, come ch'itoñet jax to. Pero jini Goliat wen yujil guerra c'ʌlʌl che' alob to, che'en.

³⁴David tsi' jac'be Saúl: C yum, xcʌnta tiñʌme'on i cha'an c tat. Che' bʌ tsa' c'oti bajlum yic'ot jini bʌte'el ts'i' cha'an mi' c'ux jini tiñʌme',

³⁵ti ora jach tsa cajñesa. Tsac jats'ʌ. Tsac cha' chilbe jini alʌ tiñʌme'. Che' bʌ tsi' sutq'ui i bʌ cha'an mi' c'uxon tsac chucbe i tsucti'. Tsac lowo. Tsac tsʌnsa.

³⁶Tsa'ix c tsʌnsa bajlum tac yic'ot bʌte'el tac. Lajal mi caj c tsʌnsan jini winic filisteo mach bʌ anic mi' ñop Dios. Come tsa'ix i lon bʌc'tesa jini soldadojob i cha'an jini cuxul bʌ Dios.

³⁷Lac Yum tsi' coltayon ti' tojlel jini bajlum yic'ot jini bʌte'el. Mi caj i coltañon ja'el ti' tojlel ili filisteo. Che' tsi' yʌlʌ David. Jini cha'an Saúl tsi' sube: Cucu che' jini. La' majlic lac Yum a wic'ot, che'en.

³⁸Saúl tsa' caji' pʌsben i bujc soldado mu' bʌ i lʌp ti guerra. Tsi' c'ʌcbe ti' jol David i pixol melbil bʌ ti bronce. Tsi' lʌpbe bujcʌl melbil bʌ ti tsucu taq'uin.

³⁹David tsi' cʌchʌ jini machit ti' pam i bujc. Tsa' caji' ñop xʌmbal che' lʌpʌl i cha'an i pislel soldado come maxto anic ñopbil i cha'an. David tsa' caji' suben Saúl: Mach mejlicon ti xʌmbal yic'ot iliyi, come mach ñʌmʌlonic, che'en. Jini cha'an David tsa' caji cha' joch ti pejtelel.

⁴⁰Tsi' cha' ch'ʌmʌ i barate'. Tsi' yajca jo'p'ejl xajlel ya' ti' ti' pa'. Tsi' yotsa jini xajlel tac ti' sewal chim che' bajche' xcʌnta tiñʌme'. Chucul i cha'an jini pʌrʌntun, tsa' caji ti xʌmbal majlel cha'an mi' taj jini filisteo.

⁴¹Jini filisteo ja'el tsa' caji ti xʌmbal tilel ti' tojlel David. Ñaxan tsa' tili jini mu' bʌ i cuchben i mʌctijib Goliat.

⁴²Jini filisteo tsi' t'ojt'o q'uele David che' woli' tilel. Ma'anic tsi' p'isi ti wenta come alʌ ch'iton jax to tsi' q'uele. Chʌcwaxan i wut. Che' ja'el wen i t'ojol jax.

⁴³Tsa' caji' yʌ'len David: ¿Ts'i'on ba cha'an ma' tilel a tajon yic'ot te'? che'en. Tsa' caji' p'aj ti leco bʌ t'an ti' c'aba' i dios tac.

⁴⁴Tsi' sube ja'el: La' ilayi. Mi caj cʌc' a bʌc'tal cha'an mi' c'ux xta'jol yic'ot bʌte'el, che'en.

⁴⁵David tsi' jac'be jini filisteo: Talet tij contra yic'ot espada, yic'ot lanza, yic'ot puñal. Pero talon ti a contra yic'ot i p'ʌtʌlel i Yum Panchan yic'ot Pañimil. Jiñʌch i Dios Israel woli bʌ a lon ts'a'len.

⁴⁶C Yum lojon mi caj i yʌq'uet tij c'ʌb. Mi caj c tsʌnsañet. Mi caj c set' t'oj loq'uel a jol. Wʌle jach mi caj i tilel xta'jol yic'ot bʌte'el cha'an mi' c'uxbeñob i bʌc'tal filisteojob. Che' jini mi caj i ña'tañob ti pejtelel tejclum wʌ'an Dios yic'ot Israel.

⁴⁷Pejtelel jini wʌ' bʌ tempʌbilob mi caj i ña'tañob ja'el jiñʌch c Yum lojon mu' bʌ i coltañon. Jini guerra an ti' wenta c Yum lojon. Mux caj i yʌq'uet tij c'ʌb lojon. Che' tsi' yʌlʌ David.

⁴⁸Tsa' ujti i chajpan i bʌ jini filisteo. Tsa' cha' caji ti tilel i taj David. Ti ora David tsa' majli i taj jini filisteo.

⁴⁹Tsi' yotsa i c'ʌb ti' sewal chim cha'an mi' loc'san jini alʌ xajlel. Tsi' julu. Tsa' c'oti ti' pam Goliat. Ya' tsa' wox cʌle jini xajlel. Tsa' ñuc yajli jubel ti lum.

⁵⁰Che'ʌch tsa' mʌjli i cha'an David. Tsi' mʌlbe jini filisteo yic'ot jach i pʌrʌntun. Tsi' lowo anquese ma'anic i yespada. Tsi' tsʌnsa.

⁵¹Ti ajñel tsa' majli David ba'an jini filisteo. Tsi' jʌm bots'be loq'uel i yespada ti' yotot. Tsi' set' t'ojbe i bic'. Jini filisteojob che' bʌ tsi' q'ueleyob chʌmenix i yum, tsa' laj puts'iyob.

⁵²Ti ora jini israelob yic'ot i pi'ʌlob loq'uemo' bʌ ti Judá tsa' caji' yajñesañob majlel c'ʌlʌl ti Ecrón. C'am tsi' cha'leyob oñel. Jini lojwemo' bʌ filisteojob yic'ot jini chʌmeño' bʌ tsa' cʌleyob ti bij ba' tsa' ñumiyob c'ʌlʌl ti Saaraim c'ʌlʌl ti Gat yic'ot ti Ecrón.

⁵³Jini cha'an tsi' sutq'uiyob i bʌ israelob. Tsa' caji' chilbeñob pejtelel i chubʌ'an tsa' bʌ cʌle ya' ba' tsa' jijliyob jini filisteojob.

⁵⁴David tsi' ch'ʌmbe tilel i jol jini filisteo ti Jerusalén. Tsi' yotsa ti jini pisil bʌ i yotot jini e'tijibʌl i cha'an Goliat yic'ot i pislel.

⁵⁵Saúl tsi' q'uele che' bʌ tsa' majli David i taj jini filisteo. Tsi' c'ajtibe Abner jini ñuc bʌ i ye'tel ti' tojlel soldadojob: ¿Majqui i tat jini ch'iton? che'en. Abner tsi' jac'ʌ: Ti isujm mic subeñet c rey, mach cujilic majqui i tat, che'en.

⁵⁶Jini rey tsi' yʌlʌ: C'ajtibeñob i pi'ʌlob majqui i tat, che'en.

⁵⁷Che' sujtelix woli David, che' ujtel to i jisan jini filisteo, chucbebil i cha'an i jol jini filisteo. Abner tsi' pʌyʌ tilel ba'an Saúl.

⁵⁸Saúl tsi' c'ajtibe: Calobil, ¿majqui a tat? che'en. David tsi' jac'ʌ: I yalobilon Isaí chumul bʌ ti Belén, che'en.