Read Chol 1 Samuel 2 Bible Online

1 Samuel 2 - Chol bible

1 Samuel 2

¹Ana tsi' subu i ñuclel lac Yum. Tsi' yʌlʌ: Wen tijicña c pusic'al ti lac Yum. Tsi' yʌq'ueyon bendición lac Yum. Tijicña c pusic'al come ma'anix mi cubin quisin ti' tojlel j contrajob. Tsi' ñuq'uesʌbeyon c pusic'al che' bʌ tsi' coltayon.

²Ma'anic yambʌ ch'ujul bʌ che' bajche' lac Yum. Come ma'anic yambʌ lajal bʌ bajche' Dios. Ma'anic yambʌ Xajlel, jini jach Dios.

³Mach la' chañ'esan la' bʌ tic tojlel. Mach la' chʌn ts'a'leñon ti la' t'an, Come wen yujil lac Yum bajche' añonla. Mi' ch'ʌm ti wenta pejtelel i melbal winicob.

⁴Tsa' laj xulbentiyob i jalʌjb jini p'ʌtʌlo' bʌ. Jini c'uño' bʌ tsa' aq'uentiyob i p'ʌtʌlel.

⁵Jini año' bʌ i chubʌ'an ti yambʌ ora woliyobix ti majtan e'tel cha'an mi' tajob i bʌlob i ñʌc'. Tsa'ix lajmiyob i wi'ñal jini wi'ñayo' bʌ. Jini mach bʌ anic i yalobil tsa'ix i meq'ue wuctiquil i yalobil. Jini cabʌlo' bʌ i yalobil i bajñel jax woli' cʌytʌlob.

⁶Lac Yum mi' tsʌnsañonla, mi' yʌq'ueñonla laj cuxtʌlel. Mi' ju'san majlel winicob ti' yajñib chʌmeño' bʌ. Mi' cha' techob ch'ojyel.

⁷Lac Yum mi' yotsañob ti pobre. Mi' yʌc'ob ti wen chumtʌl.

⁸Mi' ch'uy letsel jini p'ump'un bʌ pʌcʌl bʌ ti ts'ubejn cha'an mi' junyajlel cʌy misujelʌl. Mi' yʌc' ti buchtʌl ti' tojlel yumʌlob. Mi' yʌq'uen ñuc bʌ i ye'tel. Lac Yum i Yumʌch pañimil. I wa'chocobalʌch pañimil.

⁹Mi' cʌntʌben i yoc i cha'año' bʌ, Pero jini jontolo' bʌ mi' laj jilelob ti ic'yoch'an bʌ pañimil. Come mach cha'anic ti lac bajñel p'ʌtʌlel mi' mʌjlel lac cha'an.

¹⁰Pejtelel mu' bʌ i contrajiñob lac Yum mi caj i jisʌntelob. Lac Yum ti panchan mi' yʌc'ob ti toj mulil. Lac Yum mi' cha'len meloñel ti' tojlel winicob año' bʌ ti pañimil. Mi' yʌq'uen i p'ʌtʌlel jini Rey. Mi' yutsi p'ojlesʌben i ñuclel jini Yajcʌbil bʌ i cha'an. Che'ʌch tsi' cha'le t'an Ana.

¹¹Elcana tsa' sujti majlel ti' yotot ti Ramá, pero tsa' cʌle jini ch'iton ti' wenta jini motomaj Elí cha'an mi' melben i ye'tel lac Yum.

¹²Jontolob i yalobilob Elí. Ma'anic tsi' p'isiyob ti wenta lac Yum mi i ye'telic motomaj. Ma'anic tsi' meleyob che' bajche' yom Dios. Come i tilel ti Israel ba' ora mi' tilelob winicob x'ixicob cha'an mi' tsʌnsʌbeñob i majtan lac Yum, che' woli to ti tic'an jini we'elʌl, jini motomaj mi' suben jini x'e'tel i cha'an, cha'an mi' yotsan ya' ti perol jini junts'ijt e'tʌjibʌl am bʌ uxts'ijt i ni' cha'an mi' loc'san jini we'elʌl.

¹⁴Mi' yotsan ti perol mi ti colem p'ejt mi ti alʌ p'ejt. Che'ʌch mi' chuc loq'uel we'elʌl. Pejtelel mu' bʌ i chuc loq'uel yic'ot jini e'tijibʌl uxts'ijt bʌ i ñi' mi' ch'ʌm jini motomaj cha'an mi' c'ux ti' yotot. I tilel che'ʌch mi' melob ti' tojlel israelob mu' bʌ i tilelob ti Silo cha'an mi' yʌq'ueñob i majtan Dios.

¹⁵Pero i yalobilob Elí mach che'ix tsa' caji i melob. Che' maxto pulbilic i lewil jini we'elʌl, tsa' tili x'e'tel bʌ i cha'an motomaj. Tsi' sube jini woli bʌ i yʌq'uen i majtan Dios: Aq'ueñon we'elʌl cha'an mic pojpoben jini motomaj, come mach yomic i ch'ʌm che' wolix ti lojc we'elʌl ti a tojlel. Jini jach tsij to bʌ yom, che'en.

¹⁶Mi tsi' jac'be jini winic: Ñaxan pulu i lewil. Che' jini ch'ʌmʌ bajche' c'amel a wom, mi che'en, jini x'e'tel tsi' yʌlʌ: Mach che'ic yom, ñaxan aq'ueñon. Mi ma'anic ma' wʌc' mux c ch'ʌm ti wersa, che'en.

¹⁷Wen ñuc i mul i yalobilob Elí ti' tojlel lac Yum come tsi' ts'a'lebeyob i majtan lac Yum.

¹⁸Tsa' caji ti colel jini ch'iton Samuel, lʌpbil i cha'an i bujc motomaj melbil bʌ ti fino bʌ pisil. Tsi' melbe i ye'tel lac Yum.

¹⁹Jini i ña' tsi' melbe ch'o'ch'oc bʌ i bujc. Tsi' ch'ʌmbe majlel ti jujump'ejl jab che' bʌ tsa' letsi majlel cha'an mi' yʌq'uen lac Yum jini tsʌnsʌbil bʌ i majtan. I tilel che'ʌch tsi' meleyob ti jujump'ejl jab.

²⁰Che' jini Elí tsi' yʌq'ue i yutslel i t'an jini Elcana yic'ot i yijñam. Tsi' yʌlʌ: La' i yʌq'ueñet lac Yum a walobilob ti ili x'ixic cha'an i q'uexol jini tsa' bʌ a wʌq'ue lac Yum, che'en. Che' jini tsa' sujtiyob majlel ti' yotot.

²¹Lac Yum tsi' p'unta Ana. Tsi' cha' aq'ue i cʌntan i yalobil. Tsi' yilayob pañimil uxtiquil ch'iton bʌ i yalobilob yic'ot cha'tiquil xch'oc bʌ. Jini ch'iton Samuel tsa' coli majlel ti' tojlel lac Yum.

²²Wen ñoxix jini motomaj Elí. Tsi' yubi pejtelel chuqui woli' melob i yalobilob ti' tojlel israelob yic'ot bajche' tsi' pi'leyob ti wʌyel jini x'ixicob tsa' bʌ tiliyob ti e'tel ti' ti' Tabernáculo.

²³Tsi' tiq'uiyob: ¿Chucoch leco mi la' mel? Come tsa'ix cubibeyob i t'an pejtelel winicob cha'an leco bajche' woli la' mel.

²⁴Mach che'ic yom mi la' mel calobilob. Mach wenic woli cubin. Mi la' yʌsan ti mulil i tejclum lac Yum.

²⁵Che' mi' cha'leñob mulil winicob ti' tojlel i pi'ʌlob, mux i pʌjyelob ti meloñel. Pero che' mi' cha'leñob mulil ti' tojlel lac Yum, ¿majqui mi cajel i c'ajtibeñob i ñusʌntel i mul? che'en. Pero ma'anic tsi' jac'beyob i t'an i tat, come lac Yum tsa'ix i ña'ta i tsʌnsañob.

²⁶Jini ch'iton Samuel woli to ti colel majlel. Wen uts'at tsa' q'uejli ti' tojlel Dios yic'ot ti' tojlel winicob.

²⁷Tsa' tili juntiquil i winic Dios ba'an Elí. Tsi' sube: Lac Yum tsi' yʌlʌ: “Joñon tsac pʌsʌ c bʌ ba'an a ñojte'elob che' ya' añob ti Egipto ti' tojlel Faraón.

²⁸Joñon tsac yajca a tat Aarón. Tsa cotsa ti motomaj ti' tojlel jini lajchʌnmojt i p'olbal Israel cha'an mi' yʌq'ueñoñob c majtan ti pulʌntib. Tsa cʌq'ue i ch'ʌm pejtelel jini ofrenda i cha'an bʌ israelob.

²⁹¿Chucoch che' jini ma'anic ma' q'uel ti ñuc c majtan yic'ot ofrenda c cha'an? ¿Chucoch ma' ts'a'len c majtan tac? Ñumen ma' c'uxbin a walobilob che' bajche' ma' c'uxbiñon. Jujp'emetixla cha'an yajcʌbil bʌ c majtan tac tsa' bʌ i ch'ʌmbeyon tilel c tejclum Israel.

³⁰Joñon a Yumon i Dioson Israel. Tsa'ix c subeyet: Mi caj i yajñelob i yalobilob Leví tic tojlel ti pejtelel ora. Tsac ña'ta che'ʌch mi caj i yajñelob a walobilob ja'el. Pero wʌle mic subeñet: Mach chʌn che'ix mi caj c mel. Mi caj j q'uel ti ñuc jini mu' bʌ i q'uelon ti ñuc. Pero mi caj c peq'uesan jini mu' bʌ i ts'a'leñon.

³¹Tal jini q'uin che' mi caj c chilbeñet a we'tel. Mi caj c chilbeñob i ye'tel ja'el pejtelel i p'olbal a tat, jinto che' ma'anix tsiquil xñoxob a wic'ot.

³²Mi caj cʌq'ueñet tsʌytsʌyña bʌ a pusic'al cha'an cabʌl i chubʌ'an jini israelob che' mach jasʌlic a cha'an. Mi caj c peq'uesan jini año' bʌ ti a wotot. Mi caj c jisañob che' maxto anic tsa' joloñiyob i jabilel.

³³Pejtelel colemo' bʌ ti a wotot mi' cajelob ti chʌmel che' ch'itoñob to. Jini mu' bʌ i cʌytʌl mi caj i yubin cabʌl wocol. Mi' cajel i yajpel i wut. Mi caj i jilel i sumuclel i bʌl i ñʌc'.

³⁴Mi caj i ña'tan isujmlelʌch c t'an che' mi' chʌmelob ti jump'ejl jach bʌ q'uin jini cha'tiquil a walobilob Ofni yic'ot Finees.

³⁵Joñon mi caj c yajcan juntiquil xuc'ul bʌ motomaj mu' bʌ caj i mel chuqui mic ña'tan tic pusic'al. Mi caj j coltan yic'ot i yalobilob ti pejtelel ora. Mi caj i melbeñon que'tel ti' tojlel jini rey tsa' bʌ c yajca.

³⁶Jini mu' to bʌ i cʌytʌl ti a wotot mi caj i tilel i ñocchocon i bʌ ti' tojlel jini motomaj yajcʌbil bʌ c cha'an. Mi caj i c'ajtiben taq'uin yic'ot waj. Mi caj i pejcan ti wocol t'an cha'an mi' yʌq'uen i ye'tel cha'an mi' taj ts'ita' i bʌl i ñʌc'”. Che' tsi' yʌlʌ lac Yum, che'en jini i winic Dios.