Read Chol 1 Samuel 22 Bible Online

1 Samuel 22 - Chol bible

1 Samuel 22

¹Ti ora tsa' loq'ui ti puts'el David. Tsa' majli ba'an jini ch'en i cha'an Adulam. Che' bʌ tsi' ña'tayob i tat yic'ot i yʌscuñob, tsa' tiliyob baqui an.

²Tsa' c'otiyob ja'el pejtelel jini ch'ijiyemo' bʌ i pusic'al yic'ot año' bʌ i bet, yic'ot año' bʌ i wocol. David tsa' ochi ti' yumob. Tsi' taja che' bajche' jumbajc' i winicob.

³David tsa' loq'ui ti Adulam. Tsa' majli ti Mizpa am bʌ ti Moab. Tsi' c'ajtibe permiso jini rey ti Moab cha'an mi' yajñelob i ña' i tat ya' ti' lumal. Tsi' sube: A wocolic la' ajnicob a wic'ot jinto mic ña'tan bajche' mi cajel i coltañon Dios, che'en.

⁴Jini cha'an David tsi' pʌyʌyob tilel. Tsi' cʌyʌyob ti' wenta jini rey ti Moab. Jal tsa' ajniyob ya'i jinto tsa' caji ti chumtʌl David ba' wen xuc'ul.

⁵Pero jini x'alt'an Gad tsi' sube David: Mach yomic ma' wajñel ti Mizpa. Cucu ti Judá, che'en. Jini cha'an tsa' majli ti chumtʌl ti te'el i c'aba' Haret.

⁶Tsi' yubi Saúl ya'an David yic'ot i winicob ti Judá. Ya' buchul Saúl ti yebal c'olol te' am bʌ ti bujtʌl ti Gabaa, chucul i cha'an i lanza ti' c'ʌb. Ya' añob i winicob ja'el.

⁷Saúl tsi' subeyob: Ubinla wʌle, jatetla benjamiñob. Mero c pi'ʌletla. ¿Mu' ba la' lon ña'tan mux caj la' wʌq'uentel lum yic'ot pʌc'ʌbʌl che' mi la' yuman i yalobil Isaí? ¿Mu' ba caj i yotsañetla ti ñuc bʌ e'tel ti' tojlel jump'ejl mil yic'ot ti' tojlel jo'c'al winicob?

⁸Ti pejteletla an chuqui leco woli la' ña'tan. Woli la' contrajiñon. Ma'anic majch tsi' subeyon che' bʌ tsi' temeyob i t'an calobil yic'ot i yalobil Isaí. Ma'anic majch mi' p'untañon come ma'anic majch mi' subeñon chuqui woli' mel calobil. Cujil tsi' xiq'ui c winic tij contra cha'an mi' chijtañon che' bajche' wʌle, che'en Saúl.

⁹Ya' wa'al Doeg jini ch'oyol bʌ ti Edom yic'ot yaño' bʌ x'e'telob i cha'an Saúl. Tsi' sube: Joñon tsaj q'uele i yalobil Isaí ya' ti Nob. Tsa' c'oti ya' ba'an Ahimelec (i yalobil Ahitob).

¹⁰Ahimelec tsi' pejca lac Yum cha'an mi' coltan. Tsi' yʌq'ue caxlan waj. Tsi' yʌq'ue ja'el i yespada Goliat jini filisteo, che'en.

¹¹Jini cha'an jini rey tsi' choco majlel winicob cha'an mi' pʌyob Ahimelec (i yalobil Ahitob) yic'ot pejtelel año' bʌ ti' yotot, yic'ot pejtelel motomajob año' bʌ ti Nob. Ti pejtelelob tsa' tiliyob ya' ba'an jini rey.

¹²Saúl tsi' yʌlʌ: Ubin wʌle i yalobilet bʌ Ahitob, che'en. Ahimelec tsi' jac'be: Um ba'añon c yum, che'en.

¹³Che' jini Saúl tsi' c'ajtibe: ¿Chucoch woli a tem a t'an yic'ot i yalobil Isaí cha'an ma' contrajiñon? Tsa' wʌq'ue waj yic'ot espada. Tsa' c'ajtibe Dios cha'an mi' coltan. Che' jini tsa' tejchi tij contra. Jini cha'an wolix i chijtañon wʌle, che'en Saúl.

¹⁴Ahimelec tsi' jac'be jini rey: Ti pejtelel a waj e'telob, ¿am ba yambʌ xuc'ul bʌ che' bajche' David, a ñij'al? Jiñʌch capitán cha'an jini xcʌntayajob a cha'an. Wen c'uxbibil i cha'an pejtelel jini año' bʌ ti a wotot.

¹⁵¿Cojax to ba tsac pejcʌbe Dios cha'an mi' coltan? Ma'anic. Mach a lon pʌc'on ti jontolil. Jini año' bʌ ti cotot ja'el ma'añobic i mul. Ma'anic tsac wis ña'ta lojon mi woli' yujtel chuqui tac leco, che'en Ahimelec.

¹⁶Pero jini rey tsi' sube: Ahimelec, wersa mi caj a chʌmel jatet yic'ot pejtelel jini año' bʌ ti a wotot, che'en.

¹⁷Che' jini, jini rey tsi' sube jini xcʌntayajob ya' bʌ wa'alob: Cucula tsʌnsanla pejtelel jini motomajob i cha'an lac Yum come ti pejtelelob mi' coltañob David. Ña'tʌbilobʌch i cha'an an i mul David che' bʌ tsa' puts'i majlel, pero ma'anic tsi' subeyoñob, che'en. Pero i winicob jini rey ma'anic tsi' sʌts'ʌyob i c'ʌb cha'an mi' tsʌnsañob jini motomajob i cha'an lac Yum.

¹⁸Jini rey tsi' sube Doeg: Jatet Doeg, tsʌnsan jini motomajob, che'en. Doeg jini ch'oyol bʌ ti Edom tsa' majli i tsʌnsan jini motomajob. Ti jim bʌ ora tsi' tsʌnsa jo'tiquil i jo'c'al (85) winicob, motomajob mu' bʌ i lʌpob jini bujcʌl melbil bʌ ti lino bʌ pisil.

¹⁹Tsi' yʌc'ʌ ti jisʌntel Nob i tejclum jini motomaj. Tsi' tsʌnsa ti espada pejtelel jini winicob yic'ot x'ixicob yic'ot alʌlob yic'ot jini woliyob to bʌ ti chu', yic'ot wacax, yic'ot burro, yic'ot tiñʌme'.

²⁰Pero Abiatar, juntiquil i yalobil Ahimelec i yalobil bʌ Ahitob, tsa' mejli ti puts'el majlel ba'an David.

²¹Abiatar tsi' laj tsictesʌbe David. Tsi' sube bajche' tsi' tsʌnsa i motomajob lac Yum jini Saúl.

²²David tsi' sube Abiatar: Cha'an tsi' coltayoñob jini cha'an tsa' laj tsʌnsʌntiyob jini año' bʌ ti' yotot a tat. Ti jini q'uin che' bʌ tsaj q'uele ya'an Doeg jini ch'oyol bʌ ti Edom tsac ña'ta mi caj i tsictesʌben Saúl.

²³Cʌlen quic'ot. Mach a cha'len bʌq'uen. Jini mu' bʌ i sʌclañon cha'an mi' tsʌnsañon woli' sʌclañet ja'el. Pero uts'at añet che' ma' wajñel quic'ot. Che' tsi' yʌlʌ David.