Read Chol 1 Samuel 23 Bible Online

1 Samuel 23 - Chol bible

1 Samuel 23

¹Jini filisteojob tsa' cajiyob ti leto ti Keila. Tsi' xujch'iyob trigo ya' ba' mi' jajts'el.

²Che' bʌ tsi' yubi David, tsi' pejca lac Yum. Tsi' yʌlʌ: ¿Yom ba mic majlel ti guerra yic'ot filisteojob? che'en. Lac Yum tsi' jac'be: Cucu, cha'len guerra ti' contra filisteojob. Coltan jini año' bʌ ti Keila, che'en.

³Pero jini año' bʌ yic'ot David tsi' subeyob: Mach yomic mi lac majlel ti Keila. Bʌbʌq'uen mi lac chʌmel wʌ' ti Judá. Ñumen wocol mi tsa' majli laj contrajin jini filisteojob ya' ti Keila, che'ob.

⁴Jini cha'an David tsi' cha' c'ajtibe lac Yum. Lac Yum tsi' jac'be: Juben majlel ti Keila. Joñon mi caj cʌc' ti a c'ʌb jini filisteojob, che'en.

⁵Jini cha'an tsa' majli David yic'ot pejtelel i winicob. Tsi' cha'leyob guerra yic'ot filisteojob ti Keila. Tsi' laj ch'ʌmbeyob i wacax. Tsi' wen jisayob. Che'i David tsi' colta jini año' bʌ ti Keila.

⁶Abiatar i yalobil Ahimelec tsa' puts'i tilel ba'an David ti Keila. Tsi' ch'ʌmʌ tilel jini bujcʌl cha'an motomaj.

⁷Saúl tsi' yubi ya'ix majlem David ti Keila. Tsa' caji' bajñel ña'tan: Dios tsa'ix i yʌq'ueyon tij c'ʌb, come tsa'ix i bajñel ñup'u i bʌ ti jini tejclum am bʌ i puertajlel yic'ot i ñejt'il tac, che'en.

⁸Saúl tsi' tempa pejtelel jini soldadojob cha'an mi' majlelob ti guerra ti Keila cha'an mi' chucob David yic'ot i winicob.

⁹David tsi' yubi woli' tilel Saúl ti' contra. Tsi' sube Abiatar jini motomaj: Ch'ʌmʌ tilel jini bujcʌl, che'en.

¹⁰David tsi' cha'le oración. Tsi' yʌlʌ: C Yum i Dios Israel, a winicon. Tsa'ix cubi yom tilel Saúl ti' contra Keila cha'an mi' jisan, cha'an yom i jisañon lojon.

¹¹¿Chuqui mi caj i melob jini winicob ti Keila? ¿Mu' ba caj i yʌc'oñob ti' c'ʌb j contrajob? ¿Mu' ba caj i jubel tilel Saúl che' bajche' tsa cubi? C Yum i Dioset Israel, mic subeñet ti wocol t'an, tsictesʌbeñon, come a winicon, che'en. Lac Yum tsi' yʌlʌ: Mu'cu caj i jubel Saúl, che'en.

¹²Tsi' c'ajtibe David: ¿Mu' ba cajel i yʌc'oñob quic'ot c winicob ti' c'ʌb Saúl jini chumulo' bʌ ti Keila? che'en. Lac Yum tsi' jac'ʌ: Mu'cu caj i yʌq'uetla, che'en.

¹³Jini cha'an David tsa' loq'ui ti Keila yic'ot i winicob. Añob lujunc'al i cha'bajc' (600) ti pejtelelob. Tsi' cha'leyob xʌmbal baqui jach tsa' mejliyob. Che' bʌ tsi' ña'ta Saúl loq'uemix David ti Keila ma'anix chuqui tsi' mele.

¹⁴David tsa' ajni ya' ti' tiquiñal pañimil i c'aba' Zif ba' wen mʌctʌbil ti xajlelol ya' ti wits. Saúl tsi' sʌcla David ti pejtelel q'uin. Pero Dios ma'anic tsi' yʌq'ue ti' c'ʌb.

¹⁵David tsa' ajni ti Hores ya' ti' tiquiñal pañimil ti Zif come yujil woli' sʌclan Saúl cha'an mi' tsʌnsan.

¹⁶Tsa' tili Jonatán i yalobil Saúl ba'an David ya' ti Hores. Tsi' p'ʌt'esa ti Dios.

¹⁷Tsi' sube: Mach a cha'len bʌq'uen, come ma'anic mi caj i tajet Saúl jini c tat. Jatet mi caj a wochel ti yumʌl ti' tojlel Israel. Joñon mi caj cochel ti a waj coltaya. Jini c tat Saúl yujilix iliyi, che'en.

¹⁸Comol tsi' yʌc'ʌyob i t'an ti' tojlel lac Yum. Jonatán tsa' majli ti' yotot. David tsa' cʌle ya' ti Hores.

¹⁹Che' ya'an Saúl ti Gabaa, jini año' bʌ ti Zif tsi' subeyob: Ubibil c cha'an lojon cha' wʌ'ix an David ti lac lum. Ya' mucul ti xajlelol tac ti Hores. An ti bujtʌl i c'aba' Haquila am bʌ ti' tojel i tiquiñal pañimil ya' ti sur.

²⁰Jini cha'an mi a wom jubel majlel ti ora, c rey, mi caj cʌc' David ti a c'ʌb, che'ob.

²¹Saúl tsi' yʌlʌ: La' i yʌq'ueñetla i tijicñʌyel la' pusic'al lac Yum come tsa'ix la' p'untayon.

²²Cucula ti ñaxan. Wen q'uelela jini lum ba' mucul. Pejcanla jini tsa' bʌ i q'uele, come cujil wen p'ip' jini David. Mi' wen cʌntan i bʌ.

²³Wen tsajinla. Yom mi la' wen cʌn jini ch'en ba' mi' muc i bʌ. Cha' sujtenla tilel cha'an mi la' subeñon baqui mero mucul. Che' jini muq'uix c majlel la' wic'ot. Mi wʌ'to an ti ili pañimil David, mi cajel c sʌclan ti pejtelel xchumtʌl tac ti Judá. Che' tsi' yʌlʌ Saúl.

²⁴Ñaxan tsa' majliyob ti Zif i winicob Saúl. David yic'ot i winicob ya' añob ti joctʌl i c'aba' Maón ya' ti Arabá ti sur.

²⁵Tsa' majli Saúl yic'ot i winicob cha'an mi' sʌclan. Tsa' tsictesʌbenti David. Jini cha'an tsi' mujcu i bʌ ba'an colem xajlel tac. Tsa' cʌle ya' ti joctʌl i c'aba' Maón. Che' bʌ tsi' yubi Saúl, tsi' tsajca majlel David ya' ti joctʌl Maón.

²⁶Saúl woli' majlel ti junwejl jini wits. Jixcu David yic'ot i winicob, ya' añob ti yambʌ junwejl. David yic'ot i winicob tsi' cha'leyob wersa cha'an mi' puts'tañob Saúl. Pero Saúl yic'ot i winicob tsi' joy mʌctayob cha'an mi' chucob.

²⁷Ti jim bʌ ora tsa' tili juntiquil suboñel ba'an Saúl. Tsi' sube: La' ti ora come tsa'ix ochiyob filisteojob ti lac lumal, che'en.

²⁸Saúl tsi' cʌyʌ i sajcan David. Tsa' majli i contrajin jini filisteojob. Jini cha'an tsi' yotsʌbeyob i c'aba' jini xajlel tsa' bʌ i mʌctayob: T'oxoñib.

²⁹David tsi' cʌyʌ jini joctʌl, tsa' letsi majlel. Tsa' caji ti jijlel ya' ti ch'en tac ba' wen mʌctʌbil ya' ti Engadi.