Read Chol 1 Samuel 29 Bible Online

1 Samuel 29 - Chol bible

1 Samuel 29

¹Jini filisteojob tsi' tempayob i soldadojob ya' ti Afec. Jini israelob tsa' jijliyob ya' ba'an i loq'uib ja' ti Jezreel.

²Jini yumʌlob i cha'an filisteojob tsi' techeyob marcha yic'ot jini soldadojob ti mojt ti mojt ti jo'jo'c'al yic'ot ti jujump'ejl mil. David yic'ot i winicob woli' tilelob ti wi'il pat yic'ot Aquis.

³Jini yumʌlob i cha'an filisteojob tsi' yʌlʌyob: ¿Chuqui woli' melob ilayi jini hebreojob? che'ob. Aquis tsi' jac'beyob: Jiñʌch David tsa' bʌ i colta jini rey Saúl ya' ti Israel ti yambʌ ora. Jump'ejlix jab wʌ'an quic'ot. Ma'anic chuqui leco tsi' mele tic tojlel c'ʌlʌl che' bʌ tsa' caji ti chumtʌl quic'ot c'ʌlʌl wʌle, che'en.

⁴Jini yumʌlob i cha'an filisteojob tsa' mich'ayob ti' contra Aquis. Tsi' subeyob: Choco sujtel jini winic. La' cha' majlic ya' ba' tsa' wʌq'ue i yajñib. Mach yomic mi' majlel la quic'ot ame sujtic ti laj contra che' woliyonixla ti guerra. Bʌbʌq'uen mi' tsʌnsañonla. Mi che'i, ¿mach ba uts'atic mi caj i cha' q'uejlel ti' wut Saúl?

⁵¿Mach ba jinic David? Jini x'ixicob tsi' c'ʌyiyob che' bʌ tsi' cha'leyob son. Tsi' yʌlʌyob: “Saúl tsi' tsʌnsa ti mil tac, pero David tsi' tsʌnsa ti pic ti pic”, che'ob.

⁶Aquis tsi' pʌyʌ David. Tsi' sube: Isujm mic subeñet che' bajche' cuxul lac Yum. Tojet. Tijicñayon mi tsa' mejliyet ti majlel quic'ot, come ma'anic chuqui jontol tsa' mele tic tojlel c'ʌlʌl che' bʌ tsa' tiliyet ti chumtʌl quic'ot c'ʌlʌl wʌle. Pero i yumob filisteojob, mach uts'atic mi' q'ueletob.

⁷Cucu ti sujtel ti' ñʌch'tʌlel a pusic'al, ame mich'acob i yumob filisteojob, che'en Aquis.

⁸David tsi' jac'be: ¿Chuqui tsac cha'le? ¿Chuqui c jontolil? ¿Mach ba tojic chuqui tsac mele c'ʌlʌl che' bʌ tsa' tiliyon ti chumtʌl a wic'ot c'ʌlʌl wʌle? ¿Chucoch ma'anic ma' pʌyon majlel cha'an mij coltañet ti guerra ti' tojlel a contrajob? che'en David.

⁹Aquis tsi' jac'be: Cujil uts'atet che' bajche' juntiquil i yángel Dios, pero i yumob filisteojob tsi' wersa subeyoñob mach yomic ma' majlel ti guerra quic'ot lojon.

¹⁰Ti sʌc'ajel yom seb to ma' ch'ojyel yic'ot i winicob a Yum woli bʌ i pi'leñetob ti xʌmbal. Yom ma' cha' pʌyob majlel ti jini tejclum tsa' bʌ cʌq'ueyet, che'en Aquis.

¹¹Seb to tsa' ch'ojyi David yic'ot i winicob cha'an mi' cha' majlelob ti' lumal filisteojob. Jini filisteojob tsa' majliyob ti Jezreel.