Read Chol 1 Samuel 9 Bible Online

1 Samuel 9 - Chol bible

1 Samuel 9

¹An ch'ejl bʌ winic ch'oyol bʌ ti Benjamín i c'aba' Cis (i yalobil Abiel, i yalobil bʌ Zeror, i yalobil bʌ Becorat, i yalobil bʌ Afía, tilem bʌ ti yalobil Benjamín).

²An i yalobil i c'aba' Saúl. Wen i t'ojol jini ch'iton, ch'ejl ja'el. Ma'anic yambʌ winic ti Israel che' bajche' Saúl ti q'uelol. Ñumen i chanlel che' bajche' pejtelel i pi'ʌlob. Ya' jach ti' quejlab mi' c'otelob i pi'ʌlob.

³Ti jim bʌ ora tsa' sajti i burro tac i tat Saúl. Jini cha'an Cis tsi' sube Saúl: Cucu calobil, pʌyʌ majlel juntiquil x'e'tel a wic'ot cha'an ma' sajcan majlel jini burro tac, che'en.

⁴Che' jini Saúl tsa' caji i sʌclan. Tsa' ñumiyob ya' ti wits am bʌ ti Efraín yic'ot ti' lumal Salisa. Ma'anic tsi' tajayob. Tsa' ñumiyob ja'el ti' lumal Saalim. Ma'anic tsi' tajayob. Tsa' c'ʌlʌl ñumiyob majlel ti' lumal Benjamín. Pero ma'anic tsi' tajayob.

⁵Che' bʌ tsa' tiliyob ti' lumal Zuf, Saúl tsa' caji i suben jini x'e'tel i cha'an: Cha' conixla ti sujtel, ame cajic i lon ña'tan c tat sajtemonixla ja'el. Che' jini ñumen mi caj i yubin i ch'ijiyemal, come ñumen mi' c'uxbiñonla bajche' burro tac, che'en.

⁶Jini x'e'tel i cha'an tsi' jac'be: An abi juntiquil x'e'tel i cha'an Dios ila ti tejclum. Wen ñuc abi jini winic. Ñoj isujm abi i t'an. Mu' abi i ts'ʌctiyel pejtelel chuqui mi' yʌl. Conla j q'uel. Tic'ʌl mi mejlel i subeñonla baqui yom mi lac sʌclan majlel, che'en.

⁷Saúl tsi' sube jini x'e'tel i cha'an: Pero mi tsa' majliyonla, ¿chuqui mi mejlel la cʌq'uen jini winic? Come laj jilemix lac waj ya' ti yajñib. Ma'anix chuqui mi mejlel la cʌq'uen i winic Dios. ¿Chuqui to mi mejlel la cʌq'uen? che'en.

⁸Tsi' jac'ʌ jini x'e'tel i cha'an Saúl: Awilan wʌ' to an c cha'an ts'ita' taq'uin. Mi mejlel la cʌq'uen jini x'e'tel i cha'an Dios, cha'an mi' toj'esañonla majlel ti lac bijlel, che'en.

⁹(Ti wajali che' an chuqui yomob i ña'tan ti' tojlel Dios jini israelob, tsi' yʌlʌyob: “Conla j c'ajtiben jini am bʌ i ña'tʌbal”, che'ob. Jini cha'an jini x'alt'añob tsa' pejcʌntiyob ti winicob año' bʌ i ña'tʌbal.)

¹⁰Che' jini Saúl tsi' sube jini x'e'tel i cha'an: Uts'at bajche' wola' wʌl. Conla, che'en. Che' jini tsa' majliyob ti tejclum ya' baqui chumul jini x'e'tel i cha'an Dios.

¹¹Che' bʌ woli' letselob majlel ya' ti' witslel tejclum, tsi' tajayob xch'ocob woli bʌ i tilelob ti luch ja'. Saúl tsi' c'ajtibeyob: ¿Wʌ' ba an jini am bʌ i ña'tʌbal? che'en.

¹²Tsi' jac'beyob: Wʌ'cuyi. Q'uelela ya'an ti la' tojlel, come ujtel to i julel ti tejclum. Mux caj i c'uxob we'elʌl jini winicob, come mi caj i yʌq'ueñob i majtan Dios ya' ti' pulʌntib.

¹³Mux caj la' q'uel che' mi la' wochel ti tejclum. Cucula pejcan che' maxto anic mi' majlel ti c'ux waj, come jini winicob woli' pijtañob cha'an mi' cha'leñob we'el yic'ot. Come maxto anic mi' poj c'uxob waj jinto che' mi' c'otel i suben wocolix i yʌlʌ lac Yum cha'an jini majtañʌl. Ti wi'il mi caj i c'uxob jini pʌybilo' bʌ. Letsenla majlel ti ora cha'an mi la' taj, che'ob.

¹⁴Che' jini tsa' letsiyob majli ti tejclum. Che' bʌ tsa' c'otiyob ti' yojlil tejclum, woli' tilel Samuel i tajob cha'an temel mi' letselob majlel ya' ti pulʌntib.

¹⁵Che' anto yom jump'ejl q'uin xʌmbal cha'an mi' c'otel Saúl, lac Yum tsi' tsictesʌbe Samuel:

¹⁶Ijc'ʌl che' bajche' ili ora mi caj c choc tilel winic ch'oyol bʌ ti Benjamín. Jiñʌch yom bʌ ma' bon ti aceite cha'an ma' wa'chocon ti yumʌl ti' tojlel c tejclum Israel. Mi caj i coltan c tejclumob cha'an mi' loq'uelob ti' c'ʌb filisteojob, come tsa'ix c wen q'uelbeyob i wocol c cha'año' bʌ. Tsa'ix c'oti tic chiquin jini c'am bʌ i t'añob, che'en.

¹⁷Lac Yum tsi' sube Samuel che' bʌ tsi' q'uele Saúl: Awilan jiñʌch tsa' bʌ c subeyet: “Jiñʌch mu' bʌ caj i cha'len yumʌntel ti' tojlel c tejclumob”, che'en.

¹⁸Saúl tsa' tili ya' ba' wa'al Samuel ti' ti' jini tranca. Tsi' sube: A wocolic, subeñon baqui an i yotot jini am bʌ i ña'tʌbal, che'en.

¹⁹Tsi' sube: Joñoñʌch. Conla ti pulʌntib. Letsen ti ñaxan ti' tojel c wut. Yom ma' c'ux waj quic'ot. Ijc'ʌl to che' ti sʌc'ajel mi caj c choquet sujtel che' bʌ tsa'ix c subeyet pejtelel chuqui a wom a ña'tan.

²⁰Mach a chʌn mel a pusic'al cha'an jini burro tac tsa' bʌ sajti anix uxp'ejl q'uin, come tajlemix. ¿Majqui ñumen c'uxbibil ti' tojlel israelob? ¿Mach ba jatetic yic'ot a pi'ʌlob ti' yotot a tat? che'en.

²¹Saúl tsi' jac'ʌ: I p'olbalon Benjamín. C'ax ch'o'ch'oc jax Benjamín ti' tojlel i yʌscuñob. Jini c tat yic'ot querañob ja'el, ¿mach ba ñumen ch'o'ch'o'cobic ti' tojlel i pi'ʌlob ti Benjamín? ¿Chucoch ma' q'uelon ti ñuc che' jini? che'en.

²²Samuel tsi' pʌyʌ majlel Saúl yic'ot jini x'e'tel i cha'an ti mal otot ba' mi' c'uxtʌl waj. Tsi' yʌq'ue jini ñaxan bʌ buchlibʌl ti' tojlel jini lujuntiquil i cha'c'al (30) pʌybilo' bʌ.

²³Samuel tsi' sube jini xmel waj: Yom ma' ch'ʌm tilel jini yajcʌbil bʌ we'elʌl tsa' bʌ cʌq'ueyet cha'an ma' lot, che'en.

²⁴Che' jini tsi' ch'ʌmbe tilel jump'ejl i ya' we'elʌl ba'an Saúl. Samuel tsi' sube Saúl: A cha'anix iliyi. Tsac lotbeyet. C'uxu. Che' maxto pʌybilic lac jula', tsac lotbeyet a cha'an bʌ cha'an tsac ña'ta mux caj a tilel a c'ux che' ti' yorajlel, che'en. Che' jini Saúl tsi' c'uxu waj yic'ot Samuel ti jim bʌ q'uin.

²⁵Che' bʌ tsa' cha' jubiyob ti wits, tsa' sujtiyob ti' yotot Samuel. Tsi' cha'leyob t'an ya' ti pam otot.

²⁶Che' ti yijc'ʌlal seb to tsa' ch'ojyiyob. Che' wen sʌc'ajel to, Samuel tsi' pʌyʌ Saúl che' ya' ñolol ti' jol jini ts'ajc bʌ i yotot. Tsi' sube: Ch'ojyenix. Mi caj c pi'leñet majlel cha'an mij cʌyet ti bij, che'en. Che' jini tsa' ch'ojyi Saúl. Temel tsa' loq'uiyob majlel.

²⁷Che' bʌ wolix i c'otelob ya' ba' jaxʌl tejclum, Samuel tsi' sube Saúl: Suben majlel ti ñaxan jini x'e'tel a cha'an. Jixcu jatet yom ma' cʌytʌl jumuc' quic'ot cha'an mic subeñet pejtelel i t'an Dios, che'en. Che' jini tsa' ñumi majlel jini x'e'tel.