Read Chothe Naga MITHEW 10 Bible Online

MITHEW 10 - Chothe Naga bible

MITHEW 10

¹Amona marui asom ani ta kok weta hrano muihla ta julla hou nea rang akha chu rai eja ta dam pi nea rang jaitha pe ae.

²Ahalsha rui asom ani hina kokna, masha ah Saimon Pitar ta kok, akha chu Andrew manao; Zabedi sanao Jacob akha chu manao Johon.

³Philip akha chu Bartholomew; Thomas akhu chu Mithew sal hraipa, Alphaeus sanao Jacob akha chu Thaddaeus,

⁴Kananna Saimon akha chu Judas Iskarot Jisu ta jur pa.

⁵Na asom ani hita Jisu na chupi ah hla ae manita. “Gentle (meejaty) ngei am na thingno oh anoleh Samaritans ngei hulokka kom lut no oh.

⁶Chuti weta Israel ngei inn sunga amangsa kelmo ngei ta lella jongo.

⁷Akha chu nathing juija hita rou rillo, thangwan rengram hi neiso ae.

⁸Ana (Rai) ngeita dampi oh, athi sa ta kom ringthoupi oh, Raichi ngei ta kom hra pi oh, dijabol takom julla hou oh, ariemsalla pha sou chu ariemshalla nangkom pe oh.

⁹Nangei sumhao sunga sona, rupa, akha chu sumsan kom choi no oh.

¹⁰Akha chu nalam taranga linglut ani anoleh huirang anoleh molbuk choino oh rouram chu tullu lu mee tarang abak pha ange.

¹¹Hana husunga akha chu hulokka nangei na ejonga lut juija atuna ae nea ang mo ti ha hrabakta jongo. Akha chu nangei na shukka thing malim ma amunt hana am mo.

¹²Nangei na inn sunga lut juija ariemma riemtuk pe oh.

¹³Chuna inn sung hana ejonga manae yaitha cha lea chu nangei kolla adai ha inn sung chunga am shu oh. Ejonga mani inn sungna matik chanoleh nangei adai ha nangei kolla lea shu oh.

¹⁴Akha chu ejonga atujong akha na nangei ta ariem ma wokpi no anoleh rou ngeipi noleh inn sung akha chu hulok hana nangei sukjuija nangei kaepha ah vokphul ha thaphur oh.

¹⁵Keina nangei kolla adiek rou rillinge atreem na routreem chu hajong hulok ngei ha Sodom akha chu Gomara na tieng hella sha tek kange.

¹⁶Rammui ngei karra kelmonao hla hekta keina hla singe chuna sarukka arul hekta lung singo, akha chu wurhu hekta nalung nemmo.

¹⁷Malmashi ngei ta sing theiyo, manina nangei ta ulien changei kut chunga pe weta synagoge sunga rui lut weta nangei ta hoino hrano rou rillange.

¹⁸Hana chakno wa ka sarukka ram sunga reng ngei hana ram ronna am Governors ngei akha chu jat adang ngei kolla saro ei pi ange.

¹⁹Chuti weta mani na nangei ta hup pa mant juija ejongpa rou rillang mota ati no oh hana juija nangta ejong rou rillang mo rouha pe ange.

²⁰Rouram chu rou ha nangei ril ah no weh chu-na pathieng muihla athieng na rille sa ae.

²¹“Ulenao kar sunga kom ma ata na manao ta akha chu mapa na asanao ta athit ranga jur hlak kange akha chu unga ngei na kom mapa ngei ta an num no wa athit rang phao ae ange.

²²Ka sarukka malmashi ngei na nangta anda ange, chuti weta atreem ni rungni phao sunga ratta dongthei ngei ta chu sanpi ange.

²³Chuna nangta amunt akha ah sun rella ae juija ram a danga tanna thingo, keina adiek rou nakolla rillinge, meesanao pana jung matienga nangei na Israel hulok tunga rol nea ang no chau.

²⁴“Arui na ma ocha chunga am no ae, hana asuuk na amitpu chunga am no ae.

²⁵Arui na ma ocha hekta akha chu asuukna amitpu hekta kai hal kom, ejonga inn amit puta manina Belzebul kok lea chu mani inn sunga am ngei ta chu eja hrano ming kok kang sa!

²⁶Chuti halkom manita ati no oh, rouram chu ril shuk kanglou athup rou ephao am no ae hana dang ang lou rou thuppa si ephao am no ae.

²⁷Chuna keina nangei kolla janthiem ma karil rou ha nisuon na rillo, hana nakurra nathei rou ha inn chunga kalweta au shukko.

²⁸Pum ta that nea ngeita eko ati no oh manina muihla ta chu that nea no ae hella natit ang chu pum akha chu muihla ta that weh ta sarmei kum ma yunna hou nea amo ta ting ati oh.

²⁹Vashak awa anita ana paisa taranga jur no wa mo? akha chu Pathieng ahal ano wa chu mani karra akha phao nakom alei chunga tul no ae.

³⁰Akha chu nalu wa tousam phao masing tella shi ae.

³¹Chuna saruka ekom ati no oh, nangei chu vashak ta hella aman tam meh.

³²“Atu jong akha na malmashi ngei maikunga keita ariem ma ngaipile chu keina kom thangwan ram ma pathieng kolla ariem ma ngaipi ange.

³³Chuti weta atujong akha na malmashi ngei maikunga keita ngeinum no mee ha thangwan na pathieng mai kunga ah keina kom ngei ang no ae.

³⁴Alei ram ma kajunghi adai pe junge ta hal no oh, kajung hi adai pejung nonge chuti weta chamsai pe yung inge.

³⁵Kajungna rou ram chu: Asanaopa na mapa ta anda rang, asanao nu na manu ta anda rang, amau na mani ta anda rang ae.

³⁶Hana ehekta ma anda mee ha ma inn sunga shuk kange.

³⁷Atu jongpa na mapa manuta keita lella lungshi mee ha chu matik cha mee no ae hana atu jongpa manu mapa nakom asanao ta kei ta hella lungshi lea chu amo ha matik cha mee no ae.

³⁸Akha chu atu yong akha na ma khross choi no weta kanutieng jui lea chu amo ha matik cha mee no ae.

³⁹Atu motieng akha na aring rang jong lea chu amo ha mang ange, akha chu atu motieng akha na ka sarukka aring chang mang pi lea chu amo ha aring pha ange.

⁴⁰“Amona nangta ariemma langpi chu keita lang sa ae. Akha chu amo na keita ariem ma lang mee ha keita hla pata lasil la ae.

⁴¹Atujong akha na Chungthieng rou maril akha minga lasil lea chu Chungthieng rouphu hana lomman ha pha ange. Akha chu amo na dramochel akha ta dramochel mee ae ta la sil lea chu amo kom dramochel hana lomman pha ange.

⁴²Hana asin te ngei kar sunga akha ta atu jong akha na karui ae ta siktui heisin akha te pe lea chu keina nangei kolla adiek rou ril linge ae mant ha sui no ah pha ange.