Read Chothe Naga MITHEW 13 Bible Online

MITHEW 13 - Chothe Naga bible

MITHEW 13

¹Hani rungnie makka Jisu na inn ha haophur weta amona tuipi ahao wa thinga, ong weta chupi ae.

²Wairul riha na amota ahul tunga rachon chu, tam hai sulla amona kung chunga lut ta ong so, chuna wairul riha na tui hao wa ngirre.

³Amona manita roumu shuk eja rilleh, “Apha akha ah apa akhana muchi wor ranga shukkae.

⁴Amo na muchi louloija theja hla juija ahre na lampi ah tulla awa na sar weta bakso.

⁵Ahre na lungkai chunga alei atam am nona ah tulla, hana alei atam am no jarra tou len ae.

⁶Chuti weta nie na dinga hang juija chu atou te ngei ha hui ae, tichu chu ato na alei athukka lut no pa chu.

⁷Muchi ahre na aling akha chu rampa bella mani na tau wa hang halkom aling jam na shoun so weh.

⁸Chuti weta muchi ahre chu ahra alei ja tulla muchi atam ra ae, ahre na riha, akhana somruk, hana adangna somthum.”

⁹“Akur am malmashi lim na ngei oh ta rilweta Jisu na treem so weh!”

¹⁰Hana arui ngei na Jisu kolla wa weta makolla sai, “Alo sarukka nangna malmashi ngei ta natrong juija roumu shukka ah rilla che?”

¹¹Jisu na sange, “Thangwan rengram ma athup rou hi nagei kolla chak thinwar pe phur ae chuti weta mani ta chu takno ae.

¹²Rouram chu atujong malmashi akha kolla madon chunga makolla tam tek rang lollange, hata lea chu amo ha makolla am ta lella am tek kange; chuti weta ephao don no malmashi makolla chu madon te phao la ange.

¹³Manina karil katrong juija rou mushuk kapek na chu mani na an hal kom mani na ri no ae akha chu ngai hal kom mani na thei no ae akha chu lunglang thei no ae.

¹⁴Chuna sarukka rouphu Isaiah rilsuk ha mani chunga shuk so weh: ‘Na malmashi ngei na ngaija ngai ja lunghal thei no ae; mani na anna, anna ri pha nea no ae.

¹⁵Ti chu mani lunghal mo so ae akha chu mani kur kom thei nijowe mit kom ri pi nijowe, ano lea chu mani mitna ri nea ange mani kur na thei ange mani lunghal nakom hal la shukne ange. Akha chu mani ha ka am na ah, hai lea ange akha chu mani ta keina ahra adam pi ange ta Chungthieng na rilleh.’

¹⁶“Nataranga chu nanghi rawan hra ae! namit na ri pha akha chu nakurna kom theipha ae.

¹⁷Keina nangei kolla diekka rillinge rouphu thiempu ngei akha chu Chungthieng rouchoi ngeina nangei ripha nea ha leima tam ri num meh, chuti weta manina rino, akha chu nangei theipha ha theipi num meh, chuti weta manina theino ae.

¹⁸“Muchi worpa hina roumu shuk hi hrabakta nangei na theijo akha chu chu oh.

¹⁹Rengram hina rouril thei chu thei-weta lunghal theino ngei hi lampi ah tul muchi ae hrano na phao weta muchi lim ha sar ah thing so weh.

²⁰Kengkai chunga tul muchi rilna chu manina ahra rouril theipha lea ariemma la sil ngei ha ae.

²¹Chuti weta ato na thukka lut no jarra asotta am nea no ae, ti na chu ahra routrong sharukka aol ana pha juija manina hla ah hou len ae.

²²Aling abom sunga tou hana ril na chu ahra rouril thei ha chu, thei weta, aring chang taranga aol hana achong areng ta di ah mani na ara ra no ngei ae.

²³Akha chu ahra warah alei chunga tul muchi ta rilna chu ahra rouril hata ngai thei weta lunghal thei mani na ara ra ae ahre na riha, akha na somruk adang na somthum ra ae.”

²⁴Jisu na roumu shuk adang akha ah manita rilleh: “Wanram ma Rengram chu hihakti ange. Apa akha na malao lai ah ahra muchi worphur ae.

²⁵Nahani jantienga meelim na jal sutakka, hrano apa akha na phao weta gehu amu karra rampa amu worphur so.

²⁶Chuti weta akung changa lokka hanga ara rajuija rampa kung hakom ripha so.

²⁷Apa hana asuuk na phao weta makolla hita rilleh, ‘Ocha, nalaolai ah muchi ahra chak worphur weta; hoitianga rampa amu phao wa meh?’

²⁸‘Nahi hrano mee na ae phur sa ae ta amo na sange,’ ‘nangna rampa makhai chu phoija hou pi num cha mo ae, mani na amo ta sai.’

²⁹‘Phoi no oh,’ ‘rampa kung makhai nangei na phoi juija shang kung ngei kom juitol ange mani hitta.

³⁰Shangpot malim chu hata shang akha chu rampa kung ani mak tou ha shu oh. Chuna kei na sangpot juija tullu lu ngeita hita rillange masha ah rampa kung pot weta ahu ahu hup weta sarmei hollo hana nutienga chu shang makhai hana ka serkunga shi oh.’ ”

³¹Jisu na mani ta adang roumu shuk akha rilleh. “Wan ramma rengram chu apa akha na alou lai ah atam amu choi weta worra hou hek ti ae.

³²Amu lim karra sin tek ti halkom tou ah hang juija chu kungpi chang so weh hana awa ngei na phao weta abakka abu sa ae.”

³³Jisu na adang roumu shuk manita rilla am songe, “Wan ramma rengram chu namei nu akha na wainoi tingkung inthum ripta porra hong malim hlak ahol hekti ae.

³⁴Jisu na nalim hi roumu shuk changa ril shuke. Chuna roumu shuk tolno ah rengpa na ril no ae.

³⁵Amo na ma ae hi rouphu rilphur ha tung so weh, “Kei na manita karil juija roumu shuk tolla rillange; simlei ram hai thou thuppa am limpa ha kei na ril shuk kange.”

³⁶Amona wairul riha hao phur weta inn sunga lut so. Arui ngei na ma am na wa weta sai, “Kanita loulai ah rampa wor na rouram ma dangpi oh.”

³⁷Jisu na sange, “Ahra muchi worpa ha hamee sanao pa ae;

³⁸Lou ha chu simlei chunge ahra muchi ha chu rengram malmashi ngei ha sha; rampa mu ngei chu hrano pa hana mee ngei ae;

³⁹hana rampa mu worphur ha chu hrano mee ha ae. Louluk ti hina shimlei ashu ang apha ae sang pottang ngei ha chu wanrui ngei ae.

⁴⁰Rampa mu lim hom weta sar meija hol chu hekta atreem ni apha wak juija hahek ta shuk kange.

⁴¹Meesanaopana mawanrui hla ah diekno tullu lu mee akha chu hrano pak tullu lu meelim ta marengram hom mange.

⁴²Akha chu manita sarmei kum sunga denga hla ange hana mani na aha riella tappange.

⁴³Hana juija Chungthieng mee ngeina chu pathieng rengram ma niwar soun hekta war range chuna ejonga nakur am ngei na thei shu oh!

⁴⁴“Wan rengram chu hihek ti ae lou lai ah thuppa apa akha na loulaija sumpang thuppa shi tukhek ti ae, hana amona ariem ma lea weta adon anei ehai lim jurra akha chu lea weta loumun akha lei so weh.

⁴⁵“Woihapa, wan rengram chu apa akha na kungkap lung jonga rol akha hek ti ae.

⁴⁶Akha chu amant tam kung kapllung tuk juija chu thing weta manei madon am makhai jurweta naha lei so ae.

⁴⁷“Woihapa kom wan rengram chu hihekti ae apa ngei na mani len tuipi ah jun deng weta tuiriek chat lim mant ha hek ti ae.

⁴⁸Manina len shihak ti juija tui hou wa kaja shuk weta akha chu onga tuiriek hita hran so, Ahra tuiriek na mani pai sunga thung hana hrano lim chu denga hao so ae.

⁴⁹Ringchang hina atreem na apha hana chu hi hekti ange wanrui ngei jung weta ahra ngei karra hrano ngeita halweta rachun pi ange.

⁵⁰Hana manita sarmei kum ma deng juija amunt maniha aha riella trappange.

⁵¹Jisu na manita sai ae, “Nangei na na lim hi lunghal thei chau?” “Oh weh” ta manina sange.

⁵²Chuna amona sange, “Rouram chu wan rengram ma rui changpi rouphun ocha lim na mata anei adon haithou wa athar akhu chu alui choija shuk inn mitpu akha jongpa ae.”

⁵³Jisu na roumu shuk lim ril su nutienga amunt ha houphur so.

⁵⁴Akha chu ma am na mahu maram tienga lea so. “Amo na synagog sunga machu pi takpi thei meelim na angak shukka, amona hija lungsing hi hoija chu thing mo?” ta mani na sai, “Hana akha na angakpi hina alo ti mo nu?”

⁵⁵Amo hi thing tullu lu sanao pa no mo? Mary hi manu no mo, akha chu Jacob Josep, Simon akha chu Judas ngei na ma-u-manao ngei no meh?

⁵⁶Masarnu ngei ha no meh hina am ngei ha? “Amona nalim hi hoitinga pha meh?

⁵⁷Chuna amo ta mani na ngei no ae. Jisu na manita rou ril, “Rouphu ta amunt aram adang adanga ajak ati ae mahu sunga akha chu ma inn sung hur na chakna ngei no ae.”

⁵⁸Rouram chu mani ngoiring am no jarra amona kom anealah tullu ha mani maikunga ripi no ae.