Read Chothe Naga MITHEW 14 Bible Online

MITHEW 14 - Chothe Naga bible

MITHEW 14

¹Apha hana Galily ah roukam mitpu Herod na Jisu rouramma theipha so.

²Amo na marui ngei ta rillea, “Amo hi Johon Baptias ae; Amo hi athi sa hai thou ringthou so! Chuna sarukka angakpi tullu hi amo na ae nea ah ae.”

³Hana mahaita Herod na Johon hi mant ranga roupe ah amo hi thirui takka huppa ren inn sunga shi so ae hina rouram chu manao pa Philip anamei Herodias sarukka ae.

⁴Rouram chu Johon Baptias na Herod maikunga ril, “Nangna Herodias ta nei hi adiek ang no ae!”

⁵Chuna sarukka Herod na Johon ta that num meh, chuti halkom Jehudi meengei ta ti ae rouram chu mani na Johon hi rouphu akha ae ta hal phur ae.

⁶Herod sumla mingsen ni rungnie ah Herodias sanao nu na mani bomtul na maikunga lam ha Herod na ehekta ariem ae.

⁷Herod na chuna tarang sarukka hita saro ei ae, “Ejongpa nadit naden naniekha keina nataranga ae ange!”

⁸Manu thuchu anu juija amona maniek chu, “Kei ta Johon Baptias alu kang ha balei chunga dor ah pe oh!”

⁹Reng ha alung olso, rouram chu makok phao meelim maikunga amona saro ei ja nadit makha pe ange ta maril jarra.

¹⁰Chuna Johon aringa ren inn sunga tan so ae.

¹¹Hana malukang ha balei ta maril sha rou sha rukka chunga choija wa weta nungak hana manu kolla pesho ae.

¹²Johon arui ngeina phao weta athi sa apum ha choija thing weta manina wui so. Hana manina Jisu am na thing weta thangkou so weh.

¹³Jisu na matheipha pa chu, amunt hana thou amo na houphur weta kung chung weta athei chakka achik munt na ah thingso. Chuti weta meengei na marou theijuija hulok hei thou wa mani kae takka kalchoi ah anu juija thinge.

¹⁴Chuna Jisu na manilimta kung shunga haithou rijuija ringrei ngei ah ana asa ejata dam pi ae.

¹⁵Nietak apha pha juija arui ngei na makolla wa weta ril, “Atun hi apha leima taiso ae na ram munt hi malmashi atu kom am no na ram meh, chuna mani hla weta mani bak rang een rang leithing shu oh.”

¹⁶Chuti weta Jisu na sange, “Manita hla no oh mani bakrang tieng nangei na pe oh!”

¹⁷“Kani te am makhai chu tuiriek ani akha chu budol ranga chak so ae,” ta mani na sange.

¹⁸Jisu na ril, “Ka am na ah choija wa oh.”

¹⁹Amo na malmashi ngei ha rampa chunga ong ranga roupi ril weta amo na budol ranga akha chu tuiriek anie sar so. Thangwan tinga hai weta Chungthieng kolla dom weta. Amona budol ha ther weta marui ngei ta pe so. Hana marui ngei na mee ngei ta pe so ae.

²⁰Meelim na awon hoppa bak shu nutienga arui ngei na aliem ngei ha hom jui ja tai asom anie liem meh.

²¹Hana abak ngei ha, namei noupong tol no lutta apa chakka lasing ranga ae.

²²Meelim ta mahla lei sunga Jisu na marui ngeita kuung sunga lut pi weta tuilien aralla tung ranga thinge.

²³Mani lim ta mahla su tak chu amona mathei chakka niek ae rang mullon na kalso, nitak pha ah wak jui chu Jisu mathei chakso.

²⁴Hana jui apha ah chu kung ha tui hou thou wa aram leima lah so ae ti chu thing rangna tuijul hangpi jarra.

²⁵Nituk apha eenly tak juija Jisu na mani am na den na kae ah tuipi lien chunga wa so.

²⁶Tui chunga mawak hi mani na ri jui ah mani hi leima ti so ae. Mani naril lae nahi thimpalop ae ta ati ah rol shukka au.

²⁷Jisu na manita ril nangei lung olno oh kei inge ati no oh.

²⁸Hana Pitarna ril shuk so. “Arengpu nang mak lea kei ta tuichung hina nakolla kawak nea rang rou pe oh.”

²⁹Jisu na sange, “Wa oh!” hana Pitar na kuung sung hai thou shuk weta tui chunga Jisu am na ah wa thou so ae.

³⁰Chuti weta amo na thi rang phaibu mari juija amo na ati so chuna tui sunga lup thou wa ril shukso, “Arengpu keita sanpi oh!”

³¹Apha hana makka Jisu na makut dok weta amota mant so. “Oh ngoiring takno! ejerang nalung ngir no ah che?”

³²Manui niemak kuung sunga lutta hana chu thirang kom dai so ae.

³³Hana kung sunga marui ngei na Jisu ta mok weta ril, “Nang hi adiek takka Chungthieng asanao pa ae!”

³⁴Manina tui kung lal sunu tienga Genesaret ram ha tungso weh.

³⁵Chuna ram munt hana mee ngei na Jisu ta mel danga hana ram ahul tunga am lim na ana asa eja ngeita Jisu am na ruija phao ae.

³⁶Akha chu mani na Jisu linglut punkeng te chak halkom tham ranga Jisu kolla nie ah punking te tham ma lim na adam ahra pha ae.