Read Chothe Naga MITHEW 15 Bible Online

MITHEW 15 - Chothe Naga bible

MITHEW 15

¹Jerushalem hai thou phao Pharisees akha chu rouphun ocha ngei na Jisu kolla phao weta sai ae.

²“Alo sara rukka narui ngei na ulien changei taleet tamang kui pi ah meh? Mani na bak inn ang tienga akut hra bak ta siel no ae!”

³Jisu na sange, “Nangei chu alo wa Chungthieng rou jui no lutta nangei thei chak sem ta jui ja chao?

⁴Rouram chu Chungthieng na rilleh, ‘Napa nanu ta ajak atri oh,’ akha chu atu jong akha na ‘mapa manu ta sarkou lea chu amo ha athi pha ange.’

⁵Chutiwe nangeina ril chou weh, atumoting na manu, mapa ta san phung shuk hata ‘Chungthieng ta sa eta’ ril tale chu, hayong amo hen mapata ayak ati ang ni yo weh.

⁶Chuna nangei taleet jui ranga Chungthieng tong santa iko ano changpiso weh.

⁷Taat-kool ngei oh! Isaiah na nangei kolla ril phur ha iya adiek ka shukka yo meh?

⁸‘Na malmashi ngei na mani murra chakka ajak atri ae, chuti weta mani lung sung chu rou takka kakol hai thou aram lah au amme.

⁹Chuna manina mangei taalit tamang ta dramo na ngei akha hekta chupi ah keita arimsalla mokkae!’ ”

¹⁰Hana Jisu na mani wairul riha ta makolla kok weta manita ril, “Lunghal thei oh akha chu hra bakta ngai oh.”

¹¹Ejongpa akha na mur sunga lut chu ephao makolla thienglou changpi no ae chuti weta mur thou shuk hana amo ta thienglou changpi ae.

¹²Arui ngei na makolla wa weta hita rille. “Rou hi thei juija Pharisis ngei kolla keng tin ange ta dangpha che?”

¹³Chuna thangwan na pathieng na toupi muchi ano lim chu phoija hou ange ta Jisu na sange.

¹⁴“Mani taranga ephao ol no oh! Mani ha mitcho lamkai mitcho mee sa ae; mitcho akha na mit cho akha ta lamkai lea chu manui nielim kum sunga tul ta ae.”

¹⁵“Hina rou sarukka kanita hrabak ta phu ah rilpi oh ta Pitar naril.”

¹⁶Jisu na mani ta ril, “Atun phao sunga nangei na dang no chou?

¹⁷Nangei na dangno chou? bao sunga lut eheilim pa hi won sunga lut weta woihapa tak hai thou shukka thinge.

¹⁸Chuti weta bao hai thou shuk rou ha chu lung hai thou shuk sa ae hana na ngei na mee hata thienglou changpi ae.

¹⁹Rouram chu lung hei thou shuk hana hrano lung halla meethat, meenamei meepisal lalpi akha chu hahekta hrano tullu aruthei, trongshi dieklao saro ei hana hrano rou ril hi ae.

²⁰Hi ngei hina malmashi ta thienglou mee changpi ae chuna mani na rilchu hekta nangei kut shil no lutta bak hana mee hata thingno mee changpi no ae.”

²¹Hana nutienga chu Jisu na Ture akha chu Sidon ram tienga thingso.

²²Ram hatienga am Kanaanite namei nu na makolla phao. “David sanaopa,” “Keita lungshi ngai pi oh kasanao nu ha hrano muihla sounna olla am so ae.”

²³Chuti weta Jisu na chu namei nu hata rou akha phao ril no ae, Marui ngei na makolla waveta ril. “Nameinu hi julla hla oh! Namei hina ani nutieng juija amo na rochok rasau pi so weh!”

²⁴Jisu na sange, “Keita hla chu amang sa Israel sanao ngei tarang chakke.”

²⁵Chuna namei nu na makae kunga wa weta mokka “Ocha keita sanpi oh!” amona ril.

²⁶Jisu na ril, “Unga ngei taranga bu hata ui ta denga pe pi hi kei adiek ahno ae.”

²⁷Namei nu na sange, “Naha rou takkae, ocha,” chuti weta, “Ui na kom mamitpu bakna maicham chung thou tul bu maal bak pha ae.”

²⁸Chuna Jisu na maninga sange, “Namei nang hina nangoiring hi lei maratte! emo nadit ha nakolla tung shu oh.” Hana pa chu apha hana makka asanaonu ha dam so ae.

²⁹Jisu na amunt kalha houphur weta Galily tuipi kolla thingso weh. Hana mullon na kallweta ongso.

³⁰Wairul riha na Jisu kolla phao wa mani hita kae hor mitcho akha-chu kut hor atrong shukno akha chu adang rai eja Jisu kaekunga rui phao wa Jisuna manita dampi so-ae.

³¹Chuna atrong sukno na trong shuk, kut hor ta dampi kaetlik ta thingpi akha chu mitcho na ri nea hi malmashi eja na ri juija ngakka akha chu manina Israel Chungthieng ta dom so ae.

³²Jisu na marui ngei ta makolla kok weta rille, “Keina manita ringrei ngai thei ni ange; Mani hi kei hita amha rungnie nathum su so ae, mani hi ephao bakno ae. Chuna manita wontam ma keina hla num nonge anoleh mani ha lampi ah waipha ri tuk kange.”

³³Marui ngei na sange, “Wairul riya hina won hop rang budol chu na ramruk hina alo ta tukkang meh?”

³⁴Jisu na sai, “Budol chu eja thap don chou?” Mani na sange. “Sari” akha chu “tuiriek asinte ahre.”

³⁵Amona wairul riya ta alei chunga ong rang ril.

³⁶Chuna amo na budol sari akha chu tuiriek sar weta Chungthieng kolla niek weta budol ha therra marui ngeita pe pi ah, marui ngei na kom meengei ta samma bakpi so weh.

³⁷Mani lim na won hoppa bak su takka arui ngei na atul ata hom juija tai sari shi-hakti ae.

³⁸Namei Naopong ngei tolno lutta apa ngei chakka lising inly ae.

³⁹Jisu na wairul riya ta hla su takka amo na kung sunga lut weta Magadan ram tienga thingso weh.