Read Chothe Naga MITHEW 18 Bible Online

MITHEW 18 - Chothe Naga bible

MITHEW 18

¹Hana lei apha ah arui ngei na Jisu am na wa weta sai, “Chung thangwan rengram ma atuna lok tek ti meh?”

²Chuna Jisu na unga akha kok weta mani lim maikunga ngir pi so,

³Akha chu Jisuna ril, “Keina nangei kolla adiek rou rillinge nangei na unga hi hekta ahlong pha malim chu thangwan rengram lut nea ang no ae.

⁴Thangwan rengram ma loktek ti chu atu mo akha na matakna nem thei ah unga hek ta alung nem hana wanram ma loktek ti ae.

⁵Akha chu atu jong akha na unga hita kaminga hrabakta la sil mee ha kei ta la silla ae.

⁶“Chuna atujong akhana keita ngoiringa am unga ngei ta pakka lutpi lea chu amo ha chu ahonga shum ren weta athuk tuipi len ah denga hlapa na makolla hra tek kange.

⁷Simlei chung hina pak tapi ahlempa ha ringrei pi ae rou ram chu ahlem pa hi phao no ngei no ae chuti weta hajong ahlem mee amo ha chu ringrei pi ae.

⁸“Ejonga nakut anoleh nakae na nangta pak lut pi ang lea chu tan weta denga hao oh, kut ani ano lea kae ani su wa sarmei kum ma luttang sa ruk chu kut akha chak kae akha chak samla ring chang pha pa na hra tekkae.

⁹Akha chu namitna pak lutpi ang sharuk chu, la weta denga hao oh, sarmei kum ma mit ani su ah lut ang sa ruk chu mit akha chak na samla ring chang pha pa na hra tekkae.

¹⁰“Nangei na, na asin te akha hita eko no hekta halno oh, rouram chu keina nangei kolla rilla aminge. Thangwan na mani wan rui ngeina thangwan na am ka pathieng maisun apha changhon na ri ah am meh.

¹¹(Rouram chu meesanaopa junghi amang kelmo ta sanarang junge.)

¹²“Nangei na alo ta hallang chau? Apa akha na kelmo riha don sunga mani kar sunga akha na mang juija amo na som ku akuta hou phur weta amang hata tuk ranga jong thing no meh.

¹³Adiek takka keina rillinge amona akha te hi matukjui apha ah eja ah ariem ma meh, mangno samku-aku ta lella.

¹⁴Chu hekta thangwan na pathieng na kom asin te akha mang tihi madit no ae.

¹⁵“Chuna ejonga nanao akha na nangta aral tullu aleh chu nanui theichak am lei ja ma-maral ha amota ri pi thingo. Ejonga narou natrong amo na ngei pi lea chu nanao ta woiha lea ah tuk sier so che.

¹⁶Chuti weta ejonga amo na ngeipi no lea chu nang hitta mee akha ani ruiveta thingo mani na narou ha adiektak kae ta ngir ha ranga.

¹⁷Chuna ejonga amo na mani rou trong phao ngei pi no lea chu mee limpa ta rillo, atreem na ah mee limpa ril kom ngeinum no lea nakol hai thou wa amo hi jati adang akha chu sum hrai mee hekta hallo.

¹⁸“Chuna keina nangei kolla rillinge alei ramma nangei lou lim pa ha keina kom thangwan na ngei ang. Nonge akha chu alei ramma angeipi ha keina kom thangwan na ngeipi ange.

¹⁹“Hana chunga keina ril shop inge alei ram ma ehal kom nanui mee ani na rachun na ah ngei hlakka niekha thangwan na am pathieng na ae pi ange.

²⁰Rouram chu anino lea eenthum na kaminga rachun am na karra munt na kei amtollinge.”

²¹Chuna Pitar na makolla phao weta ril, “Arengpu, ejonga ka-u-kanao na kakolla pak tullu lu juija kei na woi eja ringrei ngei pi ang meh? woi sari phao meh?”

²²Jisuna makolla rillea, “Keina nakolla karil chu woisari chak no weh somsari sari ha sari ae.

²³Chuna sarukka wanram rengram chu hihekti ange Rengpa akha na marui ngei kolla anei adon chollang kengirre.

²⁴Chuna amo na sumsing matel thou juija lasing asom don na am akha makolla ruija wa so ae.

²⁵Hana madingne no jarra mamit puna makolla rou pe so ae, manamei asanao akha chu madon manei ehai limpa jur weta mapek phung shuk pea shu oh.

²⁶Chuna pa chu marui hana makae kunga mok weta ril makolla. Arengpu oh, ‘Kei ta lungshi pi oh,’ ‘Apha atan te hana keina malandon lim ha ding ang singe!’

²⁷Hana Arengpu na machunga ringrei ngei pi ah arui hana landon lim ringriei ngeipi ah hla so ae.

²⁸“Chuti weta arui hana hita shukka mathing juija atonpi rui akha na kom makolla Diner riha don akha tuk hlakka atonpi na makolla hlemso; hana juija amo na atonpi ahonga mot weta ril, ‘Napek phung ha pe jou oh.’

²⁹Chuna atonpi na makolla mok weta hlem so. ‘Keita lungshi pi oh,’ ‘Apha atan te kei na nalandon ha ding ang singe.’

³⁰Amo na ngei num no ah thing weta aton pi hata ren inn sunga malandon ding nea ma lim phao taranga shi so ae.

³¹Chuna shukka am, ha ripha adang atonpi ngei na mani lung leima olla mani na rengpa kolla thing weta roulam lim ha thangkau so ae.

³²Chuna marengpa na amota kok weta rou rillea, ‘hra no suuk!’ ‘Keina nalandon lim pa ha ring reingeipi singe rouram chu kakolla naniek nujuija,

³³keina nangta ringrei ngei hekta nangna kom natonpi ta kom ringrei ngei pi ngei no che?’

³⁴Rengha akeng sha ah Malandon lim dingne malim taranga amota ren sunga hla so.

³⁵Atreem na changa Jisu na rillea, “Nangei na lung lutta ringrei ngeipi no lea chu wanram ma pathieng na kom hohekta nangei ta kom ae ange.”