Read Chothe Naga MITHEW 20 Bible Online

MITHEW 20 - Chothe Naga bible

MITHEW 20

¹“Thangwan rengram chu hihekti ange. Apa akha ma mahun na tullu lu ranga inthou wa rui thing jong pa ae.

²Rungnie akha ah dinaris pe ange ta ngei hlak nutienga amo na mahunna tullu lu rang hla so ae.

³Hana hita shukka mathing jui apha na aku tak juija ngamdol ahre kai thil hou wa ngirra am ri so.

⁴Chuna amo na manita rillea, ‘nangei na mahunna thing weta tullu lu thingo nangei ta pek phung shukha keina pe ange.’

⁵Chuna mani na kom thingso ae. Hana asom ani tak jui ja kom akha chu apha na inthum takjui ja kom ahre ta hla ae.

⁶Amo na kaithil la mathing jui apha na ranga ta ang neite wak juija apa ahre na hata ngirra am ripha so. Chuna amo na mani ta rillea, ‘Ejeranga nahani chuppa apha ariem salla mangpi ah am chau?’ ta amona sai.

⁷Mani na sang, ‘Atu akha na kanita tullu lu rang nek phao no ae,’ ‘chuleh hra so ae nangei kom mahunna thing weta tullu lu thingo’ ta amona manita rillea.

⁸Nitak apha pha juija mahun amit puna arui ta kokka ril, ‘tullu lu lim ha mani ratna sum pejou oh, athou na hai thou atreem na phao hana masha ngei phao sunga.’

⁹Apha na asom akha tak juija tullu lu thou ngei na wa weta denarius pha juija.

¹⁰Masha ah tullu lu ngei halso kani chu manita hella pha ange. Chuti weta mani kom dinarius akha pha so.

¹¹Mani na pha denarius pha hina taranga mitpu kolla mani na vokhlak thou so.

¹²‘Atreem na ngei chu apha akha chak tullu lu weta nangna mani hitta kani nahani akha nisha donga tullu lu kani hita akha rukka napek chu!’

¹³“Amitpu hana sange manita, ‘thanrol ngei oh, keina nangei ta dienarius akha ah ngei hlakka no wa meh keina nangei kolla aral tullu lu nonge.’

¹⁴Nata ha la weta thingo nakolla kapek hekta atreem na ah tullu lu ngei kom pe hi kahal kalunge.

¹⁵Kata hi kahal kalung anu juija tullu ka ae hi ae phung shuk no meh? anoleh kulung lokka ka ae hi nangna anar ah che?”

¹⁶“Chu hekta oh rui nungeina masha ange masha ngeina ruinung ange.”

¹⁷Jisu na Jerushalem tienga kalla thinga arui asom ani ta ruija mani lampi ah amo na manita ril.

¹⁸“Anno ani na Jerushalem ma thinga; meesanaopa ta chungtekti thiempu ngei kut chunga akha chu scribe ngei kut chunga pe ange hana mani na thit ranga rou rillange.

¹⁹Akha chu meejat adang ngei na nuiso semso ah trongshi eja ril weta aban yamma that-ange akha chu rungnie nathum su nie ah ringthou ange.”

²⁰Zebedee namei na asanao rel hita Jisu kolla phao weta huk hrun na mokka ejongpa akha sai ae.

²¹“Ejongpa nangna di ah che?” Jisu na amota sai. Hana amona makolla sang, “Kasanao rel ta na rengram ma na am juija akha nachangtieng akhana nawoitienga ong ranga trongsan pe pi oh.”

²²Chuti weta Jisu na sange, “Nangna na sai rou ha kom ejongpa sai mo ti phao dang no che ae. Nangna ka in rang tui don ha nang na in nea ang che? mani na makolla sange kanina nea ange.”

²³Jisu na mani ta ril, “Nangna katuidon in nea che hal kom kachangtienga akha chu ka uitienga ong ti chu kapek nea no ae chuti weta na hi chu kapa thieng na mani taranga tamasha ae sa so ae.”

²⁴Chuna asom na chu rou hi thei juija manui uleh nao chunga lungsa so.

²⁵Hana Jisu na mani ta ma am na ah koknm weta ril, “Adang chat ngei na mani chunga mitpu change akha chu mani na mani chunga ane angam change.

²⁶Hijongpa hi nangei karra am mang no sa ae: atu jongpana nangei karra alok chang num lea chu meelim rui chang ange.

²⁷Akha chu atu jongna lamkai chang num lea chu nangei kor chang shu oh,

²⁸Meesanaopa na jung hi amota seba ae rang jung no ae, chuti weta amo sipa ae pi ranga akha chu meelimta sanpirang maring chang pe-yunge.”

²⁹Jerikho haithou wa Jisu akha chu arui ngeina shukha thing juija wairul riya na mani nutieng juije.

³⁰Lamhouwa onga am mitcho spa ani na Jisu wa so ae ta rou thei pha ah manui na hita aou shukkae, “David sanaopa! kanui nita ringrei ngei pi oh!”

³¹Wairul riya na manui ta trongshi trong bau rilla au, daidikta ammo, chuti phao sunga manui na lella ranga ao-ae, “David sanao pa! Kanui ta ringrei ngei pi oh!”

³²Jisu na solha weta manui ta kokka rille. “Nanui ni taranga keita e-ae pi nummui chou?” amo na manui ta sai;

³³“Karenge,” kanui mit ri num munge manui na sange.

³⁴Jisu na manui ta ringrei ngei ah manui mitta thampi-a ripisowe chuti pachu manuina manutieng jui so-ae.