Read Chothe Naga MITHEW 21 Bible Online

MITHEW 21 - Chothe Naga bible

MITHEW 21

¹Olives mulbung Jerushalem Betphage amunt nei ah Jisu akha chu arui ngei na wakjui ja

²Jisu na marui ani ta masha ah rourilla hla ae. “Nangei maiah am hu shunga thingo hana nangei na kormoh asonao ren na am tuk hlak kange. Naha nangei na ruit hla weta ka am no ah rui ah wa oh.

³Chuna ejonga atu jong akha na hana taranga rou sai lea chu makolla hitta rillo. ‘mitpu na danunrkar akha am meh, hana narou chakna amo na nangta thing jou oh ta hla ange.”

⁴Na shukka am limpa hi amatienga rouphupa rilphur lim ha adiekka shukso weh:

⁵“Zion hupi ah rourillo, Anno na rengpu ha na am na ah phao so weh. Amo chu alung nem meh, hana kurmoh sanao chunga wa ange.”

⁶Chuna arui ngeina maril nu juija thingweta Jisu ril makha ae so.

⁷Mani na kurmoh api ate rui ah wa ah kurmoh sanao chunga mani pun pha pi ah Jisu na achunga ong kal so.

⁸Hana ehekta atam wairul rija na mani punchoi lim lampi ah dokka pha ah, adang ahre na chu anobak hrim ma lampi ah pha pi ae.

⁹Ehekta tam wairul rija na Jisu maitinga thinge hana anung tieng juija wa ngei na hitta au thou weh. “David sanao pa ta dommunge! Arengpa minga wa mee amo ha Chungthieng na jaihra machunga pe ange. Chungthiengta dom munge!”

¹⁰Jisu na Jerushalem ma lut juija hupi shunga am meelim pa na rashao ae, “Amo hi atu meh?” mee ngeina sai ae.

¹¹Hana wairul rijana hitta sange Nahi ae Galily Nazaretta phao rouphupa Jisu ae.

¹²Jisu na mokna inn shunga lut weta pot jurra am ngei lea leija am mee ngeita julla hla so weh hana sum noi sella am ngei doukang kom achung athui wulpi so, hana paipi jurra am ngei ta kom.

¹³Hana amo na mani ta ril, hitta, “Jieksha rou wa Chungthieng na hitta rillea, ‘Ka inn hi amokna inn ae ta keina kokkange,’ chuti weta nangei na chu aru thei ngei bik na changpi chou ae!”

¹⁴Mokna inn na lut mitcho kaehar kut hor ngei ta Jisu na manita dampi.

¹⁵Jisu na mokna inn shunga angakpi tullu lu ah am akha chu unga ngei na David sanao pa ta domma am hi, chungtekti thiempu ngei lea rouphun ocha ngei na rijuija ehekta alungsha thou so.

¹⁶Chuna mani na Jisu ta sai, “Mani ril hlak lim hi nang chu thei ah che?” Jisu na sange, “Oh weh, kei thei inge jieksha rou ha nang pa pha no songa che?” “Nangei na rakitpha ah dom thei ranga unga naopongei ta chupi ha!”

¹⁷Jisu na manita houphur weta Bethany hupi ah thingweta amona nani jantieng ha am so weh.

¹⁸Nani mathangpa chama hupi tieng malampi malea jui ja Jisu hi won tram so weh.

¹⁹Lam hou wa Jisu na theichang kung ripha ah amunt hana thingso. Chuti weta theichang abuna ano wa chu ephao am no weh. Chuna amo na thingkung hata ril, “Nang hi woiha lea ah naira ra no sha oh!” Chu enlen theichang kungha charra thingso.

²⁰Arui ngei na na hi rijuija alou shukso. Chuna mani na ril, “Alo ta theichang kung hi hija ranga charra meh?

²¹Jisu na sange, “Keina nangei ta rilla am minge, ejonga elog am no lutta ngoiring ta lea chu, keina theichang kungta ka ae hekta nangei kom ae nea ange. Akha chu chuna chak no wa kom na mullon ta kom rilne ange ‘thou jou oh nathei chakka hana tuipi ah thingo’ hata thing ange.

²²Ejonga nang na ngoiringa naniek lim ha nangna pha ang che ae.”

²³Jisu na mokna inn na lea weta; amo na chupi takpi ae hana chungtekti thiempu akha chu ulien changei na makolla wa weta sai, “Ejongpa nane am ma na hi nang na ae ah am che? Atuna nangta na ae nea na pe ah meh?”

²⁴Jisu na manita sang, “Keina nangeita rou akha sai ange ejonga nangei na sangne lea chu keina kom kane na tullu hi atu pek moti ha keina rillange.

²⁵Johon na baptias ae pina hi hoitienga phao mo weh, na hi Chungthieng ning tienga mo, ano lea malmashi ning tienga mo weh?” Mani sunga rou vuk hlak thou so, “Anina alota rillang meh? Ejonga anina Chungthieng kol hai thou ae sang lea chu amo na hitta rillange, chulea chu nangei na alowa Johon ta ngoiring no chou?”

²⁶Chutiweta ejonga ani na malmashi kolla thou ae ta rillea chu mee ngei na anita alo ae ah wa ang sha, rouram chu manina Johon hi thiempu ae ta ngoiringe.”

²⁷Chunapa chu mani na Jisu ta sang. “Kani na dang nonge.” hana Jisu na manita ril, “Keina karillang dang nonge ka lu tullu hi hoitienga phao moti ha.

²⁸Nangna alota halla che? Apha akha ah apapah akhana asanao ani am phurre. Hana amo na asanao ulienpa kolla thing weta angur mahunna thing weta tullu lu thingo ta ril.

²⁹Asanaopa na sange, ‘Kei thing ang nonge.’ Chutiweta anutienga chu alung hlonga amona thing so weh.

³⁰Chuna hekta mapa na asanao akha kolla thing weta hata ril so, hana amo na sange, ‘Oh weh kei na thing ange.’ Chuti weta amo na thing chu thing nijowe.

³¹Na asanao ani shunga mapa na atuta lung tin tek kang sha?” Mani na sange, ‘asanao ulien pa tah.’ Chunapa chu Jisu na manita ril, “Keina nangeita rilla am minge ha chu salhraipa lea honrei namei nu na nangei matienga Chungthieng rengram thing mee sha ange.”

³²Chuna taranga Johon Baptias na nangei am na ah adiek lam ri pi rang junge chuti weta nangei na chu amota ngoiring no weh, chuti weta sumhrai rol mee lea honrei nameinu na chu amota ngoiringe. Nangei na ri shu nutieng phao nangei lung hlonga amota ngoiring no weh.

³³Jisu na ril, “Anno adang rou mushuk akha hi.” Apha akha aram mitpu akha am meh, amo na chu angur mahun tamma ling phurra ahul tunga pal harra angur tui lak rangkom semma rungang ngei am rang kom teiten sha ah, amo na mee ngeita an na hakranga rou rille, amo chu ram akha ah thing so weh.

³⁴Angkur ara lairang apha wakjuija amo na mapha phung shuk lak ranga makor ngei ta hla so weh.

³⁵Hana mashi mee ngei na makor ngeita phitta that so weh adang akha tachu alung a deng so.

³⁶Woihapa makor masha ta tam tek hla so weh, manina masha mee ngei hekta ae sin so weh.

³⁷Atreem na ah chu asanao pa ta hla sierso. mahal chu asanao pa ta chu mani na ajak atri ange ta.

³⁸Chutiweta manina asanaopa ta ri juija mani yeye ril hlak so, “Nahi ram mitpu pa sanao ae anina amota that weta maram hi ani na chang ei oh!

³⁹Chuna mani na amota man na that weta angkur mahun hai thou denga hou so weh.

⁴⁰Jisu na manita sai, “Atun chu ram mitpu pana angur enkulla wakjuija chu ramshal la ah am ngei ha alo ta ae ang sha?”

⁴¹Mani na sange, “Amona hrano mee ngeita suino wa that tange” akha chu “atu motieng apha cha ah ramshal pe ang mee amota angkur mahun ha pe ange.”

⁴²Jisu na manita ril, “Jiekka shi sha rou ha nangei na pa no songa chou? ‘Inn sha pa na denga housa alung ha anutienga chu amo na tieng lella kana tekti change. Na hi arengpu tullu lu sha ae; eja ah angakpi no meh!’

⁴³Jisu na woiha kom rille “Keina nangei ta rilla am minge, Chungthieng rengram hi nangei kol hai thou la ing weta atu jong apha cha ah ara ra pine mee kolla pe ange.”

⁴⁴Atu yongna hi alung chunga tulta lea chu amoha matup, matup tan ange; chuti weta alungna atuyong chunga tul lea chu, alungha vokphul oul makhei thugai ange.

⁴⁵Chungtekti thiempu ngei lea Pharisis ngei na Jisu hina roumushuk hi mani ta rilla am meh ti hi dang pha so.

⁴⁶Chunapa chu manina amota mant rang ae weta bom tulla am wairul rija ta tri so, rouram chu mani na Jisu hi rouphun thiempu ae ta ngoiringe.