Read Chothe Naga MITHEW 22 Bible Online

MITHEW 22 - Chothe Naga bible

MITHEW 22

¹Jisu na woihapa malmashi ngei maikunga rou mushukka hi rillea.

²“Thangwan rengram hi, hihekti ae. Apha akha ah Rengpa akha na asanaopa nuhla pamhla na ah reen bu rang semsha ae.

³Amo na mashuk ngeita mee adang adang thur mal ngei ta bakpi enpi ranga kokpi thinge, chuti weta mani atu na ko phao no weh.

⁴Chunapa chu woihapa adang mashukta hla weta mee kokpi thing sierra, hitta rillo: ‘Kashil chalpa anol ahra thatta nangei ta bubak ranga kokka am minge. Bu an atun hi limpa shu happa hakka am minge!’

⁵Chutiweta akok meelim pa na matullu, matullu ae thinga, akha na maloupukka adang ahre na mapot jurrang thingso.

⁶Hata lei shunga ahre na chu asuuk ngei ta phitta manita that so weh.

⁷Chunapa chu Rengpa ehekta alung hanga, amona maralmee ngeita hla ah meethat mee ngeita that ranga hla oh mani hupi kom sarmei holso ae.

⁸Hana amo na masuuk ngeita kokka manita hitta ril, ‘Nuhla pamhla na bak rang enrang hi shu hap so weh, chuti weta akok mee ngei phao no weh rouram chu mani na baknum no weh.

⁹Chuna atun chu nangei na lampi ah thing weta nangei tukhlak meelimta bakphao enphao rang jong thingo.’

¹⁰Chunapa chu asuuk ngei na lampi ah thing weta ahra kom hrano kom mani tukhlak kok thinga phao ah, nuhla pamhla na inn ha shihak ti so weh.

¹¹“Rengpa na thing weta phao ah am meelim ta an na marol juija apa akha chu nuhla pamhla na pun choi dirchoi no wa am ri so weh.

¹²‘Tonpi oh nang chu alo wa nuhla pamhla na pun choi dirchoi tol nowa hina alota am ma che?’ Rengpa na amota sai.

¹³Hana chu Rengpa na masuuk ngei ta ril, ‘Akae akut rui ah huppa chou weta athim awaou wa denga hla oh. Hana amo na aha riella au wa trappange.’ ”

¹⁴Chuna “meelim ta kokkae, chuti weta ahre ta chak hallea” na hi ril weh ta Jisu na atreem na rou chang so weh.

¹⁵Pharisis ngei na thing weta Jisu ta mant ranga waishi trong thou ae.

¹⁶Chuna mani rui ahre akha chu Herod mee ahre ma am na ah hla ah mani na rillea, “Ocha nang na adiek rou ril ae ta kani na dang unge malmashi ngei taranga Chungthieng adiek rou na chupi ha, malmashi ngei na alo ta halla am ma mo ephao nangna olno lutta, rouram chu nang na mee akha hina mathei masing ha rousha no ae.

¹⁷Chuna kanita rilpi oh, hana nangna chu alo ta halla che? Kaishar rengpa ta sha hi pe ang mo anolea pe ang no meh?”

¹⁸Jisu na hrano mani waishi trong thou ha danga amo na ril, “Ahra sa ngei oh! ejeranga keita mant rang ae ah chau?

¹⁹Sum pek ranga nangei sum chandi keita ri pi oh!” hana mani na chandi choi ah phao so weh.

²⁰Hana amona manita sai, “Atu maishun lea ming mo weh?”

²¹Manina sange “Kaishar rengpa”, chuna Jisu na manita ril, “Kaishar lea kaishar ta pe oh akha chu Chungthieng ta lea chu Chungthieng ta pe oh.”

²²Na rou hi mani thei juija mani ha angak shuk ka; mani na amo ta hou phurra thing so weh.

²³Nanie rungnie makka Saddusis ahre na Jisu am na phao weta ril malmashi athi sha na ringthou no weh.

²⁴Manina ril “ocha” “Moses na rilphurre ejonga apa akha na asanao am no wa thi lea chu anaopa na anamei arung nu ta nei shu oh. Hana manui ha asanao don juija atu sanao ae ta rillang mo weh athi sa sanao mo weh.

²⁵Hina uleanao sari am phurre, hana ulien tek ti na namei akha nei phurweta asanao don no wa thi so weh, chuna anamei arungnu ha anao pa kolla nei pi so.

²⁶Ani suna pa anao pa kom hahekta ani shunapa kom inthum shuna pa kom hana atreem na uleanao sari lim pa.

²⁷Atreem na ah chu namei nu ha kom thi so weh.

²⁸Chuna athi sha ngei na ringthou nie ah chu amo ha atu namei chang ang meh? rouram chu mani lim pa na amo ha nei phurre.”

²⁹Jisu na manita sange, “Nangei na eja ah dang no mo nu! na hi nangei na jieksha rou lea Chungthieng jaitha dang no jarra ae.

³⁰Athi na ringthou juija chu, mani ha wanrui ngei hek ti ange hana wanram ma chu taichang ti am mang no weh.

³¹Hana athi na ringthou ange ti hi Chungthieng na rilla shi ha pa no wa chau? Ama na ril.

³²Kei hi Abraham hina Chungthieng inge, Isaac hina Chungthieng inge akha chu Jacob hina Chungthieng inge hana amo chu aring Chungthieng sha ae athi ngei ta ano weh.

³³Wairul rija na hi thei juija amo na alota hija hra ah chupi mo ta angak shuk so weh.”

³⁴Saddusis ngei hi daitik ta Jisu na am pi so weh ta Pharisis ngei na thei juija mani na tulla wa ha so weh.

³⁵Mani shunga akha na mant ranga raphun hina ocha rousai.

³⁶Amo na ril, “Ocha,” “Rouphun hina loktekti hi ei meh?”

³⁷Jisu na sange, “ ‘Narengpu Chungthiengta nashilung lim hamuihla lim akha chu nalung rang lim tolla lungshi oh.’

³⁸Nahina lokti akha chu, chungtek ti rakit rou ae.

³⁹Hana ani shunapa rakit chungtakti na: ‘Natakta nalungshit hek ta inn ning ta lungshi oh.’

⁴⁰Moses na chupi takpi akha chu rouphu pa ril pi lim hi na rakitrou hina beija am meh.”

⁴¹Pharisis ngei na rachun na am ha lei ah, Jisu na manita sai,

⁴²“Messiya hi nangei na alota halla am ma chao amo hi atu tute mo weh?” amo hi David hina tu te ae

⁴³“Chulechu, eye sarukka” Jisuna saiye, “Muilhana Davidta shurra amota ‘Rengpata’ kokka meh? David na ril,

⁴⁴‘Arengpa hana karengpa ta rille: kachang tieng hina ongo, nangta anda mee ngei ha nakae kunga kashi malim.’

⁴⁵Chulea chu alo wa David na ‘Karengpu’ oh ta kokka mo weh. Hana Messiya hi David tu te lea chu?”

⁴⁶Jisu sai rou hi atu akha na sang nea nijowe hana nani rungnie hai thou wa atu akhana kom amo ta rou sai num ni jo weh.