Read Chothe Naga MITHEW 27 Bible Online

MITHEW 27 - Chothe Naga bible

MITHEW 27

¹Chama enthou wa thiempulel akha chu ulien changei na Jisu ta that ranga waishi tong hlak so weh.

²Manina akutta thirling rui ah huppa Rom Pilate rengpa kut chunga pe sho weh.

³Meejurpa Judas na Jisu ta leima aol ana pe soweh tah mathei pha juija malung hlonga rupa shomthum ha choi weta thiempulel ngei lea ulien changei am na ah lea so weh.

⁴Amo na ril, “Keina pakka tul singe, ha chu aral am no mee ta athit ranga jur singe!” hana manina sange, “Hana taranga kani arang e am meh?” “Na ha chu na lu tullu sha ae!”

⁵Judas na sumnoi lim ha mokna inn na denga hou phur weta shuk soweh hana amo atheichak ka ah ahong rui hitta thi so weh.

⁶Thiempu lel na sumnoi ha sar weta ril, “Na sum hi chu athee amant ae, chuna mokna inn sumthul ah shi chu ani rouphun na ngei no ae.”

⁷Chuna mani limpa na ngei hlak anu juija ha sum takka leibel shakna lou munt akha lei sho weh hana tairam ma phao mee ngei hlan kung chang pi ae.

⁸Hana rungnie hai thou wa mani na “Athee Loumunt” ta kok kae.

⁹Na hi rouphu atun phao shunga thiempu Jeremiah rilphur ha adiek takka shuk sho weh, “Israel sanao ngei na mamant ha rupa shomthum ma ngei hlakka la ange.

¹⁰Akha chu Reng na keita trong pe ah, na sum takka leibel shakna loumunt lei ange.”

¹¹Amo ta rou sai ah am Rom Rengpa maikunga Jisu na ngirra am. “Nang hi Jihudi rengpa chae?” ta amo na sai, Jisu na sange, “Nangna ril shuk sho che.”

¹²Thiempulel lea ulien changei na sai akha chu maral eja pe halkom amo na ephao sang no weh.

¹³Chuna pa chu Pilate na makolla ril, “Nangta maral hija pekka am hi chu nang na thei no wa che?”

¹⁴Chutiweta Jisu na chu rou atan te phao sang num no sharukka, Rengpa na angakkae.

¹⁵Lanpina reen chang honna Rom Rengpa na rean inn shunga am mee akha hi hla chak ti ae chuna wairul riha kolla sai ae.

¹⁶Apha hana meelim na amel dang, Jisu Barabasti apa akha rean inn shunga am phurre.

¹⁷Chuna pa chu wairul riha na rachun na am lei ah Pilate na manita sai, “Atu pa ta nangei na hla num ah chau? Jisu Barabbas mo anolea Jisu ta kok Messiya?”

¹⁸Amo na Jihudi ulien chang ngei na Jisu makolla kut shilla hla hi amo ta anar ae ti hi hrabak ta dange.

¹⁹Pilate na routreem phomlu chunga ma ong lei ah anamei na rou pe ah hla ae: “Aral am no mee hata nangna eko ae rang am no weh rouram chu ajantieng kamanga kei hi masharuk ka leima ollinge.”

²⁰Thiempulel akha chu ulien changei hana wairul riha na Pilate ta ril, Barabbas ta hla pi oh hana Jisu ta na thi pe oh.

²¹Chutiweta Pilate na wairul riha ta sai, “Na ani shunga atu pa ta keita hla pi num ma chau?” manina sange, “Barabbas!”

²²“Chulea chu kei na alo ta ae ang meh Messiya ta kok Jisu hita?” Pilate na manita sai. Mani limpa na sange, “Aban jamma thatto!”

²³Chutiweta Pilate na manita sai, “Amona ejongpa hrano tullu lu jou meh?” Hana mani na wangtekti shanrolla au shukkae: “Aban jamma thatto!”

²⁴Chuna pa chu Pilate na ripha so weh nahi hitta rilla am halkom eko kana ang no weh ashul ahal tiang hella shuk kange ta halla amo na tui la weh ta wairul ri ha maikunga akut shilla rillea, “Apa hina thit hi kei chu eko ron tollang nange; nahi nangei lu tullu sha ae!”

²⁵Wairul riha meelim pa na sange, “Na athi hina rouram ma kani akha chu kani sanao ngei chunga hrano shurshu oh!”

²⁶Chuna pa chu Pilate na mani taranga Barabbas ta hla so weh akha chu amo na Jisu ta phitta mani kut chunga ban jam ma that ranga pe ah hla so weh.

²⁷Pilate ralmee ngeina Jisu ta Rengpa hun shunga ruija lutta abom, abom eja na makolla ahul tunga am meh.

²⁸Mani na mapun mani lipweta akha chu amota punshan akha paipi so weh.

²⁹Hana mani na aling komlu akha jelpiweta alu wa lubur burpi ah akut changtienga mol akha reen ah manina mamai kunga huk hrun weta nuisho shim sho ah makolla ril, “Ringchang sai shu oh Jihudi ngei Rengpa ha!” ta mani na ril.

³⁰Manina chil shakweta mol takka alu apum ma phit.

³¹Mani na nuisho shimso waitakka mani punsan ha la weta woihapa mapun mani happi weta, ban jamma that ranga amo ta rui ah thing so weh.

³²Mani na hitta thing lei ah Syreni ah Simon apa akha tuk hlak so weh. Hana ralmee ngei na amo ta Jisu Khross ha nam ma ron pi so weh.

³³Manina wa ah Golgotha, hina rilna chu lukung amunt ta dang na ram ma tungso weh.

³⁴Amunt hana manina ehekta akha tui ha darkha tui hitta tulla Jisu murra thun nea, chuti weta amo na en no weh.

³⁵Manina amota aban jamma tar so weh mapun mani lim ha rawan an na mani shunga sam hlak so weh.

³⁶Hana nutienga mani na amota onga hakka am meh.

³⁷Malu chunga mani na amo ta junna ril, “Hi trong ha Jisu Jihudi ngei Rengpa” ta jiekka shi ae.

³⁸Hana mani na Jisu changtieng akha chu wui tienga aru thei ani kom aban jamma tarre.

³⁹Hana kolla thing ahong eja na amota an weta milla kharim ashella shimso ah ril.

⁴⁰“Nangna mokna inn hri weta rungnie inthum shunga sha ange ril sha lea! Nanghi Chungthieng sanaopa lea chu natakna natak ta sanweta Khross chung hai thou tummo!”

⁴¹Chuna chu hekta thiempulel, ngeina hana rouphun ocha akha chu ulien changei na amo ta nuisho ah ril.

⁴²“Amo na mee adangei ta chu san nea weta matak ta chu sanne no weh! amo hino meh Israel ngei Rengpa ha? ejonga amona Khross chunga atun tum na junglea chu ani na amota ngoiringei ange!

⁴³Amo na Chungthieng ta ngoiringe akha chu amo hi Chungthieng sanaopa inge ta kom rillea hra so weh, chutilea, ejonga Chungthieng na amo ta atun hi sanna mo ani na an ei oh!”

⁴⁴Chuna chu hekta arutheipa khross chunga aban jamma amo hitta tar ha na kom amota ajak pe ah rillea.

⁴⁵Ni ding lei takka ram limpa hi athim na pung inthum hunna am meh.

⁴⁶Apha inthum ma chu Jisu na sanrol ringa au shuk kae, “Eli, Eli lema Sabak tani?” hina rilna chu, “Kapa Chungthieng, ka Chungthieng alo wa keita hla ah hou wa che?”

⁴⁷Hana ngirra am mee ngei na thei pha ah ril, “Amo hi Elija ta kokka am so weh!”

⁴⁸Mani shunga akha na apha hana makka tan na shuk weta tongka la weta athur tuishik akha hitta tulweta molla thilla Jisu ta en ranga ae.

⁴⁹Chuti weta adangei na chu ril, “Hak ri eijo ejonga Elija na jung weta sanna mo an ei jo!”

⁵⁰Woihapa Jisu na sanrol ringa au phur weta arang ehat sho weh.

⁵¹Hana chu mokna inn shunga banga am pun ha chuntekti thou athui phao shunga ani shukka tit sho weh hana aleiram kom nok sho weh, hana sum lung kom ahui, ahui kui sho weh,

⁵²Hlanbung eja kom honga shukka Chungthieng athisha mee ngei kom ring thou so weh.

⁵³Manina hlankung hou phur so weh Jisu na athi haithou ringthou juija hana mani na athieng hupi ah thingange amunt hana mee eja na manita ripha ange.

⁵⁴Sipai mee lam kaipa akha chu ralmee eja na amo ta hakka am lim na ling nu nok akha chu shuk ka amlim hi mani rijuija mani ha leima atri ah ril hlakkae. “Amo hi adiek takka Chungthieng spa ae!”

⁵⁵Galily hai thou wa amota sanna hang akha chu manutieng juija phao namei eja kom aram la hai thou am meh.

⁵⁶Mani shunga Mary Madalini Jacob lea Josep manu Mary akha chu Zebedi namei kom tollea.

⁵⁷Nitak apha pha juija Arimathiah hai thou achongpu kha tunge aming na Josep amo hi Jisu arui kom ah ae.

⁵⁸Amo na Pilate am na thingweta Jisu pum ha nie thing so weh. Hana Pilate na Josep pum ha pek ranga rou pe so weh.

⁵⁹Chuna pa chu Josep na athar punsan purpai takka hlum ma.

⁶⁰Maphum rang hlan hur athar samlung alok shunga wit ta shi hana shi sho weh, amo na alung alok akha na hlan mai ah kalla shi so weh.

⁶¹Mary Magadalin akha chu adang Mary mani makhai kom hlan maikunga onga am meh.

⁶²Mathangpa rungni hani ha chu Sabbath ae chung tekti thiempu akha chu Pharisis ngei na Pilate tuk hlakka.

⁶³Mani na ril, “Ocha, Murthei amo na maring lei ah marilphur ha kanina angei thei unge, ‘Kei na rungnie nathum shuni ah woiha lea ah ringthou ange.’

⁶⁴Rungni nathum phao shunga hlan ha hak ranga kani ta rou pe pi oh. Chulea chu marui ngei na atak ha ru wa thing nea ang no weh akha chu mani na mee ngei maikunga athi hai thou ringthou soweta ril nea ang no weh. Na atreem na murthei ah mani ril hina amatienga murthui ta hella anshi tek kange.”

⁶⁵Pilate na manita ril. “Ral mee ngei ha rung thingo” akha chu, “Nangei na hlan bung ha hrabakta hakk am mo.”

⁶⁶Chunapa chu mani na hlan na thingweta hlan mai ah dolla shi lungpak chunga mani na chungnam weta hra bakta hakka am so weh.