Read Chothe Naga MITHEW 3 Bible Online

MITHEW 3 - Chothe Naga bible

MITHEW 3

¹Hanalei rungnie ah Johon Baptias na Judiah ram rukka phaoweta rouril ae.

²Akha chu hita ril, “Shilung hlongo, Rengpa ma ram thangwan neiso ae.”

³Hiso ae rouphu Isaiah marou ril phur ha, “Ram rukka sanrol akha na koka am Arengpa tarang lam shatto, mataranga lam jangpi oh.”

⁴Johon punchoi dirchoi chu utshamul ae hana akung hit huppa. Mabak ma inn chu hou akha chu ram ma hui stui ae.

⁵Jerushalem akha chu Judiah ram ma malmashi ngei akha chu Jordon ram tienga malmashi ngei na makolla phao ae.

⁶Mani na mani pak rilsukweta Jordan turella makol hai thou Baptias ae.

⁷Chutiweta amona Pharisi akha chu Saddukis ngei baptias ae ranga wak mari juija mo na mani ta ril lea, “Arul tu te ngei! atu na nangei ta tanna thingo, rilla meh? Chungthieng malungshit tung ang so.

⁸Pak hei thou wa hlonga hou sange ti ha nangei tullu na ri pi oh.

⁹Nathei chakka hita halla nathei ah hita rilno oh, ‘kani pa Abraham hek ti unge ta.’ Keina nangei ta rilla aminge Chungthieng na allung hai thou wa ko Abraham sanao ngei wul pi nea ae.

¹⁰Thing too ah arei na tan na am so ae. Akha chu thingkung hana ara ahra ra no lea chu tan weta sermei ah jun ange.

¹¹“Keina nangei ta tui ah baptias ae pi sange nalung hlong sarukka, chuti weta kanutienga phao ang pa amo chu kei ta hella chungtek ae machung huirang phao ron na ephao matick cha nonge. Amo na nangei ta muihla athing akha chu sarmei ah baptias ae pi ange.

¹²Arengpa makutta balei ha am meh akha chu shangrei na, ruimunt hana mashang lim rachon weta masier ah shangtak makhai chu shiweta ashi awai ta chu atreem am low sarmei ah deng-ange.

¹³Jisu na Galily hai thou wa Jordan turel la Johon kolla baptias ae ranga phao.

¹⁴Chutiweta Johon na ae no ranga rilleh, “Keita nangna baptias ae pi anga ae, hatiweta nangna keita alo ae pi oh ta phao ah che meh?”

¹⁵Jisu na sange, “Ashu oh; hijongpa hina adiek tullu lu ranga ani taranga ahra sa ae hanapa chu Johon na ngei pi so.”

¹⁶Jisu na baptias ae su len tui sunga thou mashuk juija thangwan honga Chungthieng muihla na urhu hekta tumma junga machunga mawar war riso.

¹⁷Akha chu thangwan tieng hai thou wa sanrol akha na ril. “Nahi kasanao pa ae machunga keina lunghsi inge keina amota leima lung tin shinge.”