Read Chothe Naga MITHEW 4 Bible Online

MITHEW 4 - Chothe Naga bible

MITHEW 4

¹Jisu ta hlem ranga dijabol na amota ramrukka muihla na rui thingso.

²Suon somly akha chu jan somly bakno een no na amo hi wontarma hangso.

³Dijabol ahlem na makolla phaoveta ril, “Ejonga nang na Chungthieng sanao mak ata lea chu nangna allung hita budol wul ranga rillo.”

⁴Jisu na sang, “Hita jiek shi ae, budol chakna malmashi ringna no ae, chuna Chungthieng kol hai thou phao rou lim na ring ange.”

⁵Hana hrano dijabolna athieng inn wangtekti am na Jerushalem athieng huluk hana amota ruija thingso.

⁶“Ejonga nangna Chungthieng asanaopa lea chu,” nangna chom ma tummo, amona ril rouram chu hita jiekka shi so ae, “Amo na mawanrui ngeita hla weta mani kut na nangta lang ah, nakae allung chunga theng pi ang no ae.”

⁷Jisu na sange, “Hita jiek ka shi sho ae, nang na narengpu Chungthieng ta chang an no oh.”

⁸Woiha pakom dijabol na mullon chungtekti mun na rui oh thinga akha chu simlei chunga rengram lim ma ahra ahoi eja ta ripi.

⁹Hana amo na ril, “Nalim hi keina nangta pe-ange, ejonga nangna keita huk rhun weta mok ta lea chu.”

¹⁰Jisu na amota ril, “Ka am na hai thou wa thing jou oh, Saitan! rouram chu hita jieka shi so ae nangna narengpa Chungthieng mo ta chak mokkanga ae.”

¹¹Hana chu dijabol na amota houphur weta wanrui na makolla phao weta amha so.

¹²Johon ta aral inn sunga shi so ae ta Jisu na thei pha pa chu amona Galily tienga lea so.

¹³Hana Nazarete houphur weta Jebulun akha chu Naptaly Galily tuipi ramtienga Kapharnahum ma thing so.

¹⁴Rouphu Isaiah ril sha adiek takka shuk ranga,

¹⁵“Jebulun ram akha chu Naptaly ram tuipi lam tienga mun ha ah Jordan, ral ha ah meejat adang Galily.

¹⁶Ramthim ma ringa am malmashi ngei na alok mawar ripha so. Hana athi hla ram ma ringa am ngei tarang mawar war thou so.”

¹⁷Hana apha thou wa Jisu na rou sam thouso. “Lung hlongo, rouram chu thangwan rengram nei so ae.”

¹⁸Jisu na Galily tuipi ralla mathing juija Saimon Pitar akhu chu manou Andrew manui na tuipi sunga len junna am riso, manui ha tuirik mant mee ae.

¹⁹Jisu na ril, “Wa oh kanutieng juijo, akha chu keina nangei ta mee mant mee changpi ange.”

²⁰Hana makka manui na mani len haouphur weta manutieng jui so.

²¹Amunt hana thou thinga amo na Zebedi spa ulehnao Jacob akha chu Johon riso. Manui ha mapa hitta kung sunga len photta am ha Jisu na manuita kok.

²²Apha hana makka manuina kung akha chu mapa ta houphur weta manutieng jui so ae.

²³Jisu na Galily ram sung lim ma thing weta Synagoge sunga Reng maram ahra rou chupi rilpi ah akha chu malmashi ana rai eja ta dampi ae.

²⁴Syria ram sunga am malmashi ngei na routhar lim hi thei ah akha chu malmashi ngei na makolla rai adang adang eja hana ehakta dongneno arot asha ngei hana thikirdon, dijabol na mant, akha chu tak ahui athisa ngei eja amo na dampi sho weh.

²⁵Chuna Galily, Dekapoli, Jerushalem, Judiah akha chu Jordan ralha tieng hai thou wairul riha ngei na manutieng jui.