Read Chothe Naga MITHEW 7 Bible Online

MITHEW 7 - Chothe Naga bible

MITHEW 7

¹“Routreem no oh, natak chunga routreem no ranga.

²Rouram chu nangei na routreem ae thing hana nangei ta kom routreem ange. Akha chu nangei na vul thingna chang hona nangeita kom vullange.

³Hana namit makka tulu la no weta na-u-nanao mitta alota an thinga che?

⁴Chuna alo ta na-u-nanao mitta tulu la tikkae ta rillang che, namit makka tulu ta la no the na am leija?

⁵Ahra sangei oh masha ah namitta tulu ha la ta lea chu nangna na u-nanao mitta tulu ha hrabak ah riweta hou nea ang che.

⁶“Athieng pot ha ui ta pe no oh. Hana aman tam pot ha wokta denga hla no oh. Ejonga nangna deng taleh chu manina akae takka to wa therra hou ange.

⁷“Nie ta lea chu nangeita pe ange; jong ta lea chu nangeita tuk pi ange; akha chu rei ta lea chu nangta innkal hongpi ange.

⁸Rouram chu atu jongpa anie mee na chu pha ae; atu mo ajong mee na chu tukkae akha chu eenkal nok mee ta chu hongpi ae.

⁹Nangei kar sunga asanao na budol nie weta alung pe mo weh?

¹⁰Ano lea ejonga amo na tuirik nie weta arul pe mo weh?

¹¹Ejonga nang na hrano che hal nasanao ta napekjui ja ahra pek rang dang che ae chuna thangwam na pathieng na chu eja lella anie meeta ahra pe ang sha!

¹²Chuna sarukka nangei na mee ngei ta nangei kolla ae pi num hekta nangei na kom mani ta hata ae oh, rau ram chu nahina roukung hina akha chu rouma ril rouphu ngei na ril ae.

¹³“Nangei na achip lam hana lutto, roulam chu, sarmei kum lut ranga chu inn harlan lokkae, hana thing mee tam meh.

¹⁴Chuti weta ring rang lam ha chu a chip lam ae hana lut malmashi chu tam no ae.

¹⁵“Shingthei oh hrano rouphu rou maril ngei ha, mani ha na am na ah phao ange kelmo pun wurra, chuti weta asunga chu wontam rammui ae.

¹⁶Manita nadangpha ang chu mani ara hana, malmashi ngei na alingbom sunga angur lei no ae, anoleh alingbom sunga theichang ra meh?

¹⁷Chuhekta ahra akunga ahra theira ra ae, chuti weta hrano akunga hrano theira ra ae.

¹⁸Ahra akunga hra no theira ra no ae akha chu hrano akunga ahra theira ra no ae.

¹⁹Ahra theira ra no akung lim ta chu tan weta sarmei ah denga hou ae.

²⁰Chuna saruka mani ara nujuija nangei na manita dang ange.

²¹“Keita arengpa, arengpa kokka chak am meelim ha wan rengram luttang no ae chuti weta wanram ma pathieng ahal ae mee na luttange.

²²Atreemni rungnie ah leima tam malmashi ngeina keita rillange, Arengpa kani na naminga roumaril shuk no meh, akha chu naminga dejabol ta kom jul no meh akha chu leima tam angakpi kom ae unge?

²³Hanachu keina athup am no lutta manita ril shuk kange, ‘keina nangei ta dang nonge hrano tullu lu ngei kakol hai thou wa thingo!’

²⁴“Chuna sarukka atu jongpa nangei kar sunga karou thei weta tullu lu malmashi chu alung chunga inn sha lungwar spa ae.

²⁵Akha chu ru kalla surra tuijul hanga akha chu thirang ranga hanga inn na nam ma wa hal, chuti phao sunga tikne no ae, rouram chu alung chunga shak sou chu.

²⁶“Chuti weta atu jongpa nangei kar sunga karou theiveta karil jui no malmashi chu waipin chunga inn sha lungmo spa ae.

²⁷Ru surra hang juija akha chu tuijul hangjuija hana chu thirang na inn na nam juija inn ha chu tu wa junga alok akui atik shukkae. Hana atik chu eya atripi ang sha!”

²⁸Jisu na rilsu nutienga wairul riha na machupi takpi lim ta angak shukkae.

²⁹Rouram chu amo na chupi takpi hi rouphun ocha ngei hekti no ae leima tam arat ane akha hekta chupi ae.