Read Chothe Naga MITHEW 8 Bible Online

MITHEW 8 - Chothe Naga bible

MITHEW 8

¹Arengpu na mullon akha ah tumma majunga wairul riha na manu tieng jui ya.

²Hana raichi spa akha na arengpa maikunga huk hrun weta mokka ril. “Rengpa, ejonga keita ngeipi lea chu nangna keita thiengpi oh.”

³Jisu na makut dokveta amota tham ma, “Keina nangta ngaipi inge” ta rilla, “Thiengjou oh!” Apha hana makka maraichi damso ae.

⁴Hana Jisu na makolla ril, “An no nangna atu akha kolla rilshukno oh. Chuti weta thingo thiempu kolla natakmak ri pi oh, akha chu mani kolla rou dang ranga akha chu Moses trongsan an nujuija pek phung shuk pe oh.”

⁵Jisu na Kapharnahum malut juija ralmee riha mitpu na wa weta amota sanpi ranga sai.

⁶Amona ril, “Rengpa,” ka suuk akha hi innna pum ahui thi ah ati pi ol donga am meh.”

⁷Jisu na amota ril, “Keina thing weta dampi ange amota.”

⁸Hana ralmee riha mitpu na sange. Rengpa chunga keina trongsan peveta ka inn na wak kanghi kamatik am nonge chuti weta rengpa trongsan na pek na chakkom kasuuk ha dam mange.

⁹Rouram chu keikom mitpu akha thuija am minge hana kathuija kom karalmee am meh keina hita rillinge, “Thingo ta keina ril lea chu amona thing. Akhana wa-oh ta ril lea amona wa ae kasuuk ta kom hi ae ta ril lea amona hata ae.”

¹⁰Jisu na rouhi theijuija angak shukka akha chu manu jui ngei ta ril, “Keina adiek rou rillinge. Israel ngei karra phao sunga kom hihekti ngoiring hek ti tuk nonge.

¹¹Keina nangei ta rillinge nasu tienga akha chu nattak tienga mee leima phao weta Abraham Isaac akha chu Jacob hitta thangwan rengram ma reenbu hang hana ong ha ange.

¹²Chuti weta rengpa sanao ngei ta chu athiem awau wa denga hou ange amunt hana chu atrap arel la chak amange.”

¹³Hana Jisu na ralmee riha mitpu ta ril, “Thingo, nangoiring nujuija hata amokom chang shu oh.” Hana pha makka masuuk kom dam so ae.

¹⁴Jisu na Peter inn sunga lutjuija Pitar mapi na kut chunga atun nokka jalla am ri so.

¹⁵Jisu na makut tong pa chu atun nokka am ha dam so. Akha chu thou wa rengpa ta seba pha tolso.

¹⁶Nitak tieng pha ah wakjuija dejabol akha chu hrano muihla na ruija rol mani lei ma tam ha makolla ruija phao ah akha chu hrano muihla lim pata tronglo chakka julla ana eja dampi.

¹⁷Nalim pa hi rouphu thiempu Isaiah na rilsa shuk so weh maril phur ha. “Rengpa na ringrei nungshi eja sanpi akha chu hrano rai eja kom amona dampi ti rou shuk ranga ae.”

¹⁸Jisu na wairul riha na ahul tunga am mari ah, amona tuipi aralla thing ranga trongsan pe.

¹⁹Hana rouphun ocha na makolla phao weta ril, “Ocha amunt changhon nathing na kei jui ange.”

²⁰Jisu na sange, “Ramhui ngei ahur am meh akha chu awa ngei tarang kom abu am meh, chuti weta meesanao pa taranga chu alu kang te shi chek ti rang am no ae.”

²¹Adang anujui mee akha na makolla ril, “Rengpa masha ah kei kapa ta wui thing ri tikkae.”

²²Chuti weta Jisu na mokolla ril, “Kanutieng jui jo akha chu athi ngei na mani athi ngei ta wui shu oh.”

²³Hana amo na kung sunga lutta akha chu marui ngei nakom manutieng jui.

²⁴Tuipi hana atipi tuijul hanga kung ha tui na shi ah wa so. Chuti weta Jisu chu jalla am songe.

²⁵Arui ngei na thing weta amota hrang. “Rengpa kani ta san pi oh!” manina ril. “Ani thi ang so ae!”

²⁶Amo na ril, “Ngoiring bet nangei, elo wa haja ati ah chau?” hana amo na thou weta thirang ta ril pa chu tuijul ha ripta daiso ae.

²⁷Hana malmashi ngei na angak shukka saihlak. “Nahi ejongpa malmashi meh? Thirang akha chu tuijul nakom mariljui ae!”

²⁸Gadarene ram ralha tieng matung juija hlan kung hai thou wa tarik na mant apa ani na amota tuk hlak kanga phao ae. Manui ani ha ati pi akha changa am sarukka atu akha na lampi ha lalla thing nea no ae.

²⁹“Chungthieng sanaopa kanuita nangna ejongpa di cha meh?” Hita au wa ril, apha ha pha matienga amunt hina kanui ta aol ana pe anga wa ah che?”

³⁰Amunt hana thou aram latakka vok ngei arak bakka am meh.

³¹Tarik na Jisu kolla nie ae, “Ejonga nangna kanuita julla hou ang ta lea chu vok ngei am na ah julla hla pi oh.”

³²Manita amo na ril, “Thingo!” hana pa chu mani na shukka thing weta vok ngei sunga lut so. Akha chu vok lim pa na leiral tienga tanna tuipi sunga lutta thi so.

³³Vok runga am ngei na husunga tanna thing weta shukka houphur lim akha chu tarik na mant ani hana rou takso.

³⁴Hana husunga am limpana Jisu ta rihlak kanga akha chu mani na amota riso. Hana mani rijuija mani ram ma phao no ranga rilleh.