Read Chothe Naga MAK 14 Bible Online

MAK 14 - Chothe Naga bible

MAK 14

¹Atun hi lanpina reen akha chu achol tolno budol reen rungnie nani matienga. Hana chungtekti thiempu akha chu rouphun ocha ngei na Jisu ta mant na that ranga huisar anna rol.

²“Chuti weta reen sunga manita thang so ti no rang ae no ei oh ta mani na rillea.”

³Raichi Simon ta danghlak apa inn Bethany ram ma Jisu na bakka ma-amlei ah nameinu akha na ehakta amant tam alabaster ariem hoi tui na shihakti um ha kuipi weta Jisu lu chunga shopi so ae.

⁴Chuti weta mani amna kar sunga am tol ahre na lungsha ah mani thei chakka hita rilhlakke, “Ejeranga riemhoi sirik areempa ah hou meh?

⁵Na ariemhoi sirik hina riha som nga hella jurveta apha sum hana sara ngeita pe anga ae ta!” mani na nameinu ta lungsa ah ril.

⁶Jisuna rillea, “Ma lu tullu ha ae shu oh eko trongno oh, ejeranga namei hata nangei na lung olpi ah chau? namei nu na kataranga ehakta ahra tullu lu pi so ae.

⁷Sara ngei ha apha chang honna nangei hitta am ha ange hana nangei dit apha hana nujuija nangei na san na ngei ae. Chuti weta kei chu apha chang honna nangei hitta am ha ang nonge.

⁸Namei nu hana mane ha ae so ae. Namei nu ha katak chung ariem hoi sirik sopi hi keita ui ranga mahalla dang pi ah ae.

⁹Atun keina adiek rou rilinge simlei chung hoi ram ma ahra rou ril juija namei nu hana ma ae hikom rillo, namei hata angei thei ranga ae kom ril ranga ae.”

¹⁰Asom ani sunga Judas Eskirot na thiempu ngei chungtekti kolla Jisu manikolla sonloh thingso ae.

¹¹Mani na rou hi thei juija ariem ma amota sum pe ange ta saro ei so ae. Chuna amo na ejongpa tancha ah manita pe ang mo ae ta anna rollea.

¹²Achol tolno budol reen ahalpa rungnie ah, lanpina kelmo hi that ae chuna Jisu kolla arui ngei na sai ae, “Hoija mun na nangna kanita thing weta lanthukna bakrang innrang amunt sem ang meh?”

¹³Chuna Amo na manui ani ta hla weta manuita ril, “Hulok hana lutto, hana apa akha na tapot choi weta tui choi am akha tuhlak kange, manu tieng juijo.

¹⁴Hana malutna inn hana mitpu kolla sai oh: ‘Ka ocha na rilleh, keina karui ngei hitta lan thukna budon ha hoi peak ka mo ae?’

¹⁵Amo na pot cheilim shu hap ti semsa chung tekti ka alok nangei ta ri pi ange, hana nangei na tamasha ae oh ani taranga.”

¹⁶Arui na houphur weta hulok hana thingso akha chu Jisu na manui ta ril makha tuk hlaka manui na amunt hana lanthukna bakrang tama ae so.

¹⁷Nani nietakka chu Jisu na arui asom ani hitta tungso ae.

¹⁸Manina solhakna doukanga bakha inn ha am lei ah amo na ril, “Keina adiek rou nangei kolla rillinge, nangei kar sunga akha na keita jur ange amo ha chu keihitta bakha aminge.”

¹⁹Arui ngei na lung olla apha hana makka mani akha na akha nutienga akha na arengpu ta sai, kei mo ae?”

²⁰Amo na sange, “Nahi asom ani sunga ae, amo hachu kei hitta buhu akha chakka bakha am meh.

²¹Meesanaopa chu mataranga jiekka shi hana nujuija thing ange. Chuti weta apa atu mo nu meesanao pa ta jurra hou mee chu aol ae nu! Amo ha chu don phur no lea mataranga hella hra ange.”

²²Mani na bakka amlei ah, Jisu na budol dom weta jaihra ni ah akha chu ther weta arui ngeita peweta ril, “Lah oh na hi katak kae.”

²³Hana tuidon lah weta jaihra nie ah manita samso, akha chu manina inn so.

²⁴Jisu na manita ril, “Nahi nangei lim taranga saro eisa kathee san tolpi ae.

²⁵Keina adiek rou nangei kolla rillinge, Chungthieng athar rengram ma tungmalim chu keina nangei hitta drakkha ra tui een ha pha ang nijo weh.”

²⁶Mani na laasa weta chulphoi mulbunga thingso ae.

²⁷Jisu na manita ril, “Nangei lim pa ahlem ma tul ange nahi jieksa so ae; ‘Chungthieng na kelmo rungei ta thattange, hana kelmo ngeina adang adang hran nange,’

²⁸chuti weta karingthou juija keina nangei matienga Galily ah thing ange.”

²⁹Pitar na rilsuk chu, “Manilim na ahlem kutchunga tulhalkom, kei chu tullang nonge!”

³⁰Hana Jisu na sange, “Keina nakolla adiek rou rillinge, oh ae awoni jantienga arhongpa na woini hung matienga keita nangna woithum ngai num mang no che ae.”

³¹Chuti weta Pitar na lea ah lea ah ril, “Ejonga keina nang hitta thit ha phao sunga kom keina nangta ngainum no ae ang nonge!” Hahekta adangei nakom hahekta mani na rillea.

³²Gethsemany amuntna manina thinge, akha chu Jisu na marui ngei ta ril. “Hina hakko kanieklei pha sunga.”

³³Arengpu na Pitar, Jacob, akha chu Johon ta rui weta amo na lung olla solhla nea nijo weh.

³⁴Jisu na mani ta ril, “Ka muihla hi aol na lella wa ah kathit rang pha olsinge. Hina am hakkou oh, akha chu dong ratto.”

³⁵Aram ahuite lella thing weta, alei chunga tu ah amona ngeileh chu apha hi kakol hai thou lal pi oh ta nie ae.

³⁶“Abba, Pathieng,” amo na ril, “Eheilim hi nakolla chu ngainoti am no ae. Chuna kakol hai thou wa tuidon hi lapi oh. Chuti weta kahal ano lutta nahal changpi oh.”

³⁷Hana amo na arui ngei am na maleh pa chu jalhappa am tuk hlakso ae. “Simon, Pitar ta koka ril, nang jalla am ma chou? apha atan te phao dongthei ah am nea no chou?”

³⁸Amona manita ril, “Dongthei ah nie ah ta lea chu ahlem na nangta nea ang no ae. Muihla na chu di halkom pum na chu nea no ae.”

³⁹Woiha pakom amo na niek ranga thing shil so, amona chap mana ah ril shil.

⁴⁰Woihapa maleh sirjuija mani jalla am tuhlak kae ti chu mani mit hi ehekta rit so. Chuna manina amo ta ejongpa rillang mo dangthei nijo weh.

⁴¹Woithum sunapa maleh chu manita amona rillea. “Atun phao sunga inn num ma solhla ah am chao? ngaiso ae, apha ha wa so ae an no. Meesanaopa ha pakchel ngei kut chunga jur so ae.

⁴²Thoujou oh, ani na thingsai oh. Ann oh keita jur ang pa ha hi so ae!”

⁴³Amo na tronga amlei apha hana makka asom ani sunga Judah hi rouphun ocha ngei lea chungtek ti thiempu ngei akha chu ulien chang na hla wairul rija karra champsai akha molsum choija waso ae.

⁴⁴Arengpu ta jurpa na mani ta amel dang ranga rou takka rillea. “Keina abe kachup apa ha ae huppo akha chu amota nangei na hrabakta hakka ruija thingo.”

⁴⁵Jisu kolla mathinga Judas na rillea, “Rabbi!” hana amo na chup ae.

⁴⁶Hana mani na maituk hakka Jisu ta mant weta hupso ae.

⁴⁷Mani karra aneite ngirra am akha ma champsai sat weta achunga donga am thiempu ngei rui akha hana akur tan so ae.

⁴⁸Jisu na rillea, “Kei hi aruthei ngei lamkai hekta, nangei na champsai akha chu molsum tolla keita mant ranga phao chau?

⁴⁹Rungnie chang honna keina nangei hitta mokna inn sunga chupi takpi ka-am lei chu nangei na mant no chao. Chuti weta nahi jieksa rou ha shukpi ranga ae.”

⁵⁰Marui lim na amota houphurveta tan hap so ae.

⁵¹Rungthar akha na mapun mani salla matakka mukka punpai pai weta Jisu nutieng jui ja wakpa chu amota mani na mant rang ae so ae.

⁵²Chuti weta amona anutienga apun houphurra punsalla tan na thingso ae.

⁵³Manina Jisu ta rui ah thiempu ngei, alok ashai hana chungtekti thiempu ngei lim akha chu rouphun ocha ngei hitta bom tulhaso.

⁵⁴Aram alah takka Pitar kom manujuija wa ah chungtekti thiempu ngei rui shanga ulien chang ngei karra sermei am na onga am tollea.

⁵⁵Chungtekti thiempu ngei akha chu ulien chang ngei na Jisu hi thi ah ngei ae ta adiek rou jonge chuti weta mani na ephao tukno ae.

⁵⁶Mani leima tam na Jisu chunga dieklou rou rillea chuti weta mani rou lim kom adang adang so ae.

⁵⁷Hana mani ahre na ngir thou weta Jisu chunga dieklou rou ril shukkae.

⁵⁸“Keina malmashi na shak mokna inn hi hri weta rungnie nathum sunga malmashi na kutta shaklou inn akha sa nea ange ta kani maril theipha unge.”

⁵⁹Chutiphao sunga mani rou hi adang adang songe.

⁶⁰Hana chungtekti thiempu na mani maikunga ngir thou weta Jisu ta rou sai, “Nangna kani rou hi sangpi ang nijo che? na malmashi ngei na nachunga rou rilla am hi?”

⁶¹Chuti weta Jisu chu hata ephau sang no lutta dai diekta am meh woihapa chungtekti thiempu na rou sai ae. “Nanghi jaihra Chungthieng sanao Messiya ah che?”

⁶²Jisu na rillea “Kei inge,” “Akha chu meesanaopa na ene-ne akha hana changtieng nakka ong weta thangwan hai thou wa sumphai karra jung ha ri ange.”

⁶³Chungtekti thiempu na maling lut therra ril so, “Hina chunga anina ejeranga makolla rou sai ang am meh?”

⁶⁴“Nangei na Chungthieng ta hija sathi ril hi, ejong nalung hal the chou?” Mani lim na amo chu thi ah matik cha ae ta rillea.

⁶⁵Hana mani na achel amota shakka thouso, akha chu amai hump ma kut chumma phetta rillea, “Atu na nangta phet mo ae!” hana amota songkar hak ngeina bang nga amota rui thing so ae.

⁶⁶Pitar na innthui hana am lei ah thiempu hina rui nangak akha ma am na wa so ae.

⁶⁷Nangak hana Pitar na sarmei onga amna nei ah wa weta amota, nangak na ril. “Nangkom Nazarate ta Jisu hitta am mee no meh.”

⁶⁸Chuti weta amona ngainum no wa rillea, “Naril rou hana ephao dang nonge akha chu lunghal kom thei nonge.” Amo na ril weta inn lutna tienga shukka thingso ae. Hana arhongpa na hung so weh.

⁶⁹Rui nangak hana woihapa amota ripa chu ngirra ahul tunga am ngei ta ril. “Na mee hi kom manu jui mee ngei karra akha ae.”

⁷⁰Woihapa kom amona ngainum no ae. Apha atan te waitakka chu aneite ah ngirra am ngeina Pitar ta rillea, “Nanghi routakka mani karra akha ange, rouram chu nang hi Galily mee ae.”

⁷¹Amo na matak mathei chakka sarkou thou wa akha chu saro ei weta “Kei na dang nonge na apa hina rou ah tronghlak hi.”

⁷²Apha hana makka arhongpana woini hungso ae. Hana Pitar na Jisu na matarang ril phur ha angei thei so ae, “Arhongpa na woini hungma tienga nangna keita woithum ngai ang no che ae.” Chuna madang pha juija alung tonga trap thouso ae.