Read Chothe Naga MAK 15 Bible Online

MAK 15 - Chothe Naga bible

MAK 15

¹Nietuk chama ah chungtekti thiempu hana ulien changei, rouphun ocha ngei manilim na lung akha chakka ngirra, manina Jisu ta huppa Pilate kut chunga pek ranga ruija thingso ae.

²“Jews ngei rengpa hi nang mo ae?” Pilate na sai. Jisu na sange, “Oh weh nang na ril shuk ha ae,”

³Chungtekti thiempu na machunga dieklou rou eja rillea.

⁴Chuna Pilate na woihapa makolla sai. “Nangna katrong sang ang no che? anno mani na nachunga dieklou rou eja rilla am meh.”

⁵Chuti weta Jisu na chu sang no lutta am hi Pilate na ngak shukkae.

⁶Lanpina Reen changhonna mee ngei na nie lea chu raen inn sunga am mee akha hla ti hi mani talit tamange.

⁷Barabas ti apa hi raen inn sunga mani ram ma hulong tuilong pi karra ae, akha chu amo ha meeta that mee ae.

⁸Chuna hana am wairul rija na hang weta Pilate kolla amatieng hlou ma ae hekta ae ranga sai ae,

⁹“nangei na keita dit hi Jihudi ngei rengpa ta hla pinum ma chao ta sai,” Pilate na.

¹⁰Chungtekti thiempu ngei na anar sarukka Jisu hi makolla pe ae ti hi dange.

¹¹Chuti weta chungtekti thiempu ngei na wairul rija ta thanum pi ah mahutta Barabas ta hla su oh.

¹²Pilate na sai, “Chuleh chu, nangei na Jihudi ngei rengpa ta kok hita, keina ei ae oh ta ril chau?”

¹³“Khrose chunga that to, amo ta” manilim na rol shukka au ae.

¹⁴Pilate na sai, “Alowa mo ae? ejongpa hrano tullu amona ae so meh?” Chuti phao sunga mani na ringa au, “Khrose chunga thatto amo ta!”

¹⁵Pilate na akut shilveta mani lim lungdam ranga Barabas ha mani tarang hla so ae, hana amo na Jisu ta phit weta khrose chunga that ranga manita pe so ae.

¹⁶Ralmee ngeina Jisu ta arengpa ruisanga ruija lutta akha chu ralmee marul, marul rachon so ae.

¹⁷Manina machunga punsan pai piweta aling kumlu jelweta malubur burpi ae.

¹⁸Hana manina mokka hita kokka thou so: “Sotta ringo Jews ngei Rengpa!”

¹⁹Manina lea, lea ah alukang raiweta amai ah chil amota shakka ahuk hrun weta mok thou so ae.

²⁰Hana mani na amota nuiso ah punsan la-ah hou weta mapun amota seng piweta khrose chunga that rang rui ja shuk so ae.

²¹Lampi ah aming na Simon tipa maram thouwa hulok ka waklei ah ralmee ngeina nam ma mant weta Jisu kross ronpi so. (Alexander lea Ruphos hina mapa Simon Seriny thouwa.)

²²Manina Jisu ta Golgotha (hina rilna chu alu saru) ti amunt na rui ah phao.

²³Hana manina darkha tui lea akhatui tulweta amota pe pi, chuti weta amo na inn no ae.

²⁴Mani na khrose chunga ban jam nutienga malinglut ha ther weta atu, atu na chang ang mo ta rawan an ae.

²⁵Khrose chung mani that apha hi nitak apha na eenthum ta so ae.

²⁶Amota pek maral chu mani na malu chunga hita jiekka shi ae: “JEWS NGEI RENGPA.”

²⁷Manina amo hitta aru thei ani ta kom khross chunga aban jam shi ae ma changtienga akha na ma-oi tienga.

²⁸(Jiekka shisha rou nujuija arengpu chu aral am mee ngei karra akha so ae ta rilleh.)

²⁹Hana anei ah aleh ahong thingei na amo ta nuiso semso ah alu hai ah ril. “Oh nange nu athieng mokna inn hri weta rungnie nathum sunga sa angpa ha.”

³⁰Atun “Khrose chunga tumweta nathei ah nangna kal oh!”

³¹Hahekta chungtekti thiempu ngei akha chu rouphun ocha ngei na kom Jisu ta ann weta nuiso ah, ril, “Amo na mee adang ta sanne ae, chuti weta mathei chakka matarang chu sanne no ae!”

³²Israel, ngei rengpa hi khross chung hai thou tumma jung su oh atun chuleh ani mit makka ri lea chu anina Khrista ae ta ngoiring ange!” Amo hitta khrose chunga ani nakom amota trongchop ril phur ae.

³³Chuna chanutieng apha aruk hai thou wa janting apha aku takmalim ma ram lim thiemma am.

³⁴Hana apha aku takjuija Jisu na sanrol shukka trappa ril, “Eloi, Eloi, lama sabaktani?” hina rilna chu, “Ka Chungthieng, ka Chungthieng, alo wa keita hla ah hou che?”

³⁵Aneite ah ngirra am ahre na hita rilleh, “Ngei oh amo hi Elija ta kokka am meh!”

³⁶Apa akhana tanna thing weta patrung athur tui lupweta ulunga thil ah arengpu inn ranga peweta ril, “Hak ri oh! Alijah na junga amota khrose heithou choi ah tum mota anina ann ri eiyo!”

³⁷Jisu na sanrol ringa au weta mamuihla hla so ae.

³⁸Athieng innsunga banga shi pun ha ani shukka achung tieng hai thou wa athui atreem na phao ther so ae.

³⁹Ralmee rija hana mitpu anei takka ngirra am ah Jisu thit ha ri jui ah amo na ril, “Rou takka amohi Chungthieng asanaopa ange.”

⁴⁰Aram ala takka namei ahre nakom an na am. Mani kara Magadalin Mary unga Jacob lea Josi hina manu Mary akha chu salome.

⁴¹Na numei nu ngei na Galily hai thou wa manu juija akha chu amota san na wurra hange. Mani leima tam adang ngei kom Jerushalem hai thou phao ah hang ngei kom hana am tol ae.

⁴²Nani ha sem sanie rungnie ae. (ha chu sabath rungnie matienga ae.) nitlak apha nai ah wa so ae.

⁴³Arimathiaja ram ma Josep ulien changei karra kom ajak ati shak hana amo chu Chungthieng reng ram taranga hakka am na Pilate kolla ephao ati ajak am no lutta Jisu hina pum sai wa ae.

⁴⁴Jisu hi thi so weh thei ah Pilate na ngakka ralmee riha mitpu ta kokka sai, routakka Jisu thi sho jo meh.

⁴⁵Ralmee riha hina mitpu kolla routakka thi so ae madangpha juija athi sa pum Josep ta pe pi so ae.

⁴⁶Chuna Josep na pun mukka choi ja wa weta apum ha choija tum so, hana mukka hana hlum weta sumlung vit weta shak hlanhur sunga uiso ae. Hana amona hlanhur mai ah alung akha na humma dolla shiso.

⁴⁷Madalini Mary akha chu Josi manu Mary na hoi amunt na jalpi si mo manui na ri phur ae.