Read Chothe Naga MAK 16 Bible Online

MAK 16 - Chothe Naga bible

MAK 16

¹Sabath rungnie huwarra Magadalin Mary Jacob manu Mary akha chu Salome manina ariem ahoi Sirik Jisu takka not ranga choija phao ae.

²Hapta ah ahalpa rungnie innthou hana nie shuk in len mani na hlan kung lampi tienga thing so ae.

³Mani akha lea akha na hita sai hlak kae, “Sumlung hlan mai ah am chu atu na lettang meh?”

⁴Chuti weta sumlung ha mani rijuija chu hoija lok sumlung ha letta thing hak so ae.

⁵Mani na hlan hur sunga lut juija punngou pai rungthar akha changtienga onga am ri so. Chuna manina ngak shukso ae.

⁶Amo na ril, “Ephao ngak no oh,” “Nangei na khrose chunga that Nazarate Jisu ta an phao ah no chao? amo chu ringthou so amo ta jalpi shi na amunt hi an no, amo chu hina am nijo weh.

⁷Chuna thingo, marui ngei akha chu Pitar ta rillo amo ha nangei matieng hai ta Galily ah thingso ae. Hana nangei na amota ri pha ange nangei ta maril la houphur chu hekta.”

⁸Hlan kung hai thou wa namei ngei na hirra akha chu angak shukka tanna thingso ae. Manina atu akha kolla ril no ae. Rouram chu mani tit na jarra.

⁹Jisu na hapta sunga ahalpa rungnie angal apha ah ringthou ah hlawang sari majul hla Magadalin Mari kolla masha ah ri pi.

¹⁰Amo na thing weta amo hitta am ha phur ngai akha chu mataranga lung olla trappa am ngei ta takpi ae.

¹¹Jisu ringso weh ta akha chu namei nu na ri pha inge ta nahi thei juija mani na ephao ngoiring no ae.

¹²[Hana takka Jisu na mel adanga mani ram tienga thing ha ani kolla ripi ae.

¹³Hana mani lea weta amphur ngei kolla rou takjuija mani na ngoiring no ae.

¹⁴Anutieng chu Jisu na asomakha na bakkha leija ripi; hana mani ngoiring no akha chu lung hir riweta manita trongsi ah rillea. Rouram chu Jisu ringthou ri ngei kolla mani na ngoiring no ae.

¹⁵Manita amo na ril, “Simlei ram lim ma thing weta ahra rou hi chupi oh.

¹⁶Atu jongpa na ngoi ring weta baptias ae mee ta chu sanpi ange, chuti weta atu jongpana ngoiring no lea chu amota lalpi ange.

¹⁷Keita ngoiring mee ngei kolla roumuh shu pi ange, kaminga manina hlawang ta julla hou nea ange hana mani na trong athar rillange.

¹⁸Manina mani kut takka arul sar ange; akha chu manina thit ranga tur inn halkom mani kolla ephao tong nea ang no ae; manina ana am ngei pum chunga mani kut shi juija kom ana ngei ha dam mange.”

¹⁹Arengpu Jisu na mani kolla rou hi ril su nutienga amo chu thanwan na ruija kalla Chungthieng ban changtinga onga am.

²⁰Hana arui ngeina shukka thing weta amunt aram adang, adanga, rou ril thinge akha chu arengpu na mani hitta tullu lu ha na mani rou ha ta lingno wa danga am meh.]