Read Chothe Naga MAK 2 Bible Online

MAK 2 - Chothe Naga bible

MAK 2

¹Jisu na sotnolutta Kaphernahum ma woiha lutjuija meengeina amha inn na am aeta thei so ae.

²Chuna malmashi ngei na rachun jui ja chu inn sung chakno wa songkar phao sihak so weh, chuna Jisuna arha rou sui thou so weh.

³Apa inly na pum ahui thi sha akha Jisu kolla ruija phao ae.

⁴Wairul riha kara mani rui lut ne-nojarra Jisu am-na inn chunga kal weta innchung hri ah pum ahui thi pa ta kot chunga jalpi weta athui tienga hla so weh.

⁵Mani ngoiringha rijuija Jisu na rillea, “Kasanaopa napak limpa silpi sange.”

⁶Amunt hana onga am rouphun ocha ngeina mani thei chakka hita hal hlakso.

⁷“Amojongpa na eje rang hijong rou tronga am ma meh? hichu, Chungthieng ta roushi rilla ae! Atujong pakta sil nea chu Chungthieng chak ae!”

⁸Apha hana makka Jisu na mani halha dangpha ah Chungthieng chakkae pak shilpi nea chu amo na manita hita rillea. “Ejeranga hijong lunghal songa chau?

⁹Pum ahui thi sa ta napak shilso weh rilpa lea nakot kang choi weta thou ah thingo ril hi hoipana lai teka meh?

¹⁰Chuti weta meesanaopa na simlei chunga pak shilpirang jaitha am-meh ti hi nangna dang ang che.” Rouhi amona pum ahui athi sa ta rillea.

¹¹“Thou jou oh, najalna phar choi weta na inn na thingo.”

¹²Meelim na anna am lei ah maphar choiveta mathau hi meelim na rijuija ngak hai shulla Chungthieng ta mani na dom meh, “Hijongpahi anina shupri ri no songe!”

¹³Galily tuipi ahou wa nahani kom Jisu na thing nge hanapa chu wairul rihana phao thou wa, mani hata amo na chupi thou ae.

¹⁴Hita mathing juija sum hrai ngei amna wakka Aphija sanao Levi onga amhata rijuija Jisu na amo ta rillea, “Kanutieng juijo,” chuna pachu amona thou weta manu tieng juiso ae.

¹⁵Levi inn sunga Jisu na bu bakha ah, amlei ah pakchel ngei akha chu sum hrai eja hitta ong ha ae jui ah.

¹⁶Rouphun ocha ti chu Pharisi ngei na pakchel ngei lea sum hrai ngei hitta bakha inha rijuija marui ngei kolla hita sai, “Alowa sum hrai ngei lea pakchal ngei hitta ama na bakha enn ha meh?”

¹⁷Jisu na rouhi theijuija, mani kolla hita shange, “Maipa hi pum ahra ngei tarang anowe chuti weta ana ngei taranga ae kaphao hi adiek ngei ta kok phao nonge pakchel ngei tarange.”

¹⁸Ejongpa akha Johon lea Pharasi arui ngeina bu hei ah am lei ah mee adang ngei na Jisu kollo hita rou shai, “Alo-wa mo-ae Johon arui ngei lea Pharasi arui ngei na bu hei ah am lei ah, na-rui ngei chu alo wa tol no chu?”

¹⁹Jisu na sange, “Mauruipa na atonpi ngei karra amha lei lim chu atonpi ngei ha bu hai ang no weh.

²⁰Chuti weta rungnie chu phao ange mauruipa ha mani kar hai thou rui ah thingjui ja chu mani ha bu hai thou ange.

²¹“Atu akhana linglut alui atit ta pum athar ah bal no ae, bal lea chu, abai pun athar na pun alui ta hella amel shi ah titekkange.

²²Akha chu atu akha na darkha tui shavun aramsa hao sunga thal no weh, ejonga thal lea chu darkha tui hana savun hao chat hapi ange, hana chu ani mak darkha tui kom savun hao kom alak rang amang no ae. Thal no ae amona darkha tui ha savun athar wa hao chak sunga thal ae.”

²³Sabbath rungnie akha ah Jisu lea arui ngeina lau lai ah wakjuija arui ngei na sang sai hriem hriem ma bak thou ae.

²⁴Pharasi ngeina makolla hita rillea, “Anno mani na Sabbath rungnie ah narui ngei na rouphun na ngeino ae ah meh?”

²⁵Amona sange, “David lea amo hitta thingha ngei na won tamma hangna jeikka shi nang na pa no songa che?

²⁶Abiyathar na thiempu chang lei apha ah, Chungthieng athieng sunga kat athieng badol ha David na bak jui ja mamee ngei ta kom pe ae routakka trongsan sunga chu thiempu na chak bak phung shuk kae.”

²⁷Jisu na atreem na changa mani kolla hita rillea, “Sabbath hi malmashi tarang sakke malmashi hi Sabbath taranga no weh.

²⁸Chuhekta meesanaopa hi Sabbath hina mitpu rengpu ae.”