Read Chothe Naga MAK 4 Bible Online

MAK 4 - Chothe Naga bible

MAK 4

¹Woihapa kom Jisu na Galily tuipilen hou ah chupi thou so weh. Amunt hana rachon na am wairol rija na ahul tunga am sarukka amona kung chunga, ong weta tuipilen hou tienga lutweta meelimna tui hao wa ngir ae.

²Amona roumushuk eja manita chupi, hana manita ril:

³“Thei oh ngai jou oh, apha akha ah apa akha na muchi wur juija.

⁴Mawor mochi ha lampi ah tul ngei chu awana bak so weh,

⁵Ahrena lungkhrok chunga tul ngei na alei atam am nojarra ranga tou wa shukkae.

⁶Chuti weta semni na dingjui ja chu charra thing ae rouram chu ato thukka am no ae.

⁷Muchi ahre na aling bom sunga tul ae tou wa shuk halkom aling jamna siem ma ara ra nea no ae.

⁸Chutichun adang muchi na chu ahra wara lei am na tulla ara atam ra nea ah ahre na som thum som ruk akha ko riha phao ra nea ae.”

⁹Chuna Jisu na ril, “Atu jungpa athei rang kur, am ngei na thei su oh.”

¹⁰Amona mathei chak am lei apha asom ani akha chu adang amota hulla am ngei na roumushuk phurakta rou amota sai.

¹¹Manita hita rillea, “Chungthieng reng maram sunga athuk rou lim nangei ta pe jek so weh, chuti weta awao wa am ngei taranga roumushuk hi pe sa ae.

¹²Chuna ‘Mani na an na, an na ri ang no weh; akha chu theija theija, lung hal shuk no ae, mani mai hai lea weta ejonga mani na rithei lungtul thei phur lea chu Chungthieng am na mai hai ah lea ange, hana amona kom sanpi ange nge.’ ”

¹³Hana Jisu na manita sai ae, “Roumushuk hi nangei na lunghal thei no chao? Alota chu roumushuk hi nangei na lunghal thei ang chao?

¹⁴Muchi wurpana Chungthieng rou ha wurphur ae.

¹⁵Malmashi ahre chu lampi ah tul muchi rou hekta mani na theipha sulen mani kolla saitan na phao weta muchi wur rou ha choija thinge.

¹⁶Hahekta Chungthieng rou ha aranga ariem ma lasil ngei ha lungkhrok chunga muchi tul jong pa ae.

¹⁷Chuti weta ato am no jarra asot dong nea no wa apha atante nutienga ahra trongsan hina taranga aol ana anoleh ajet am juija dong nea no wa hla hou ae.

¹⁸Hana ahre na aling jam ma tul na rou ha thei chu theiweta.

¹⁹Ringchanga lung olla neinun sungkeng taranga hung thei ah akha chu adang adit eja am ma rou lim ariem chang pi ae.

²⁰Adang ahra wor lei chunga tul muchi na thei shu takka ariem ma lapiweta ara atam shukpi akha chu saruk som thum sum ruk chakno wa riha phao ara ra ae.”

²¹Jisu na hita rillea, “Atujong akha na dewankari ha taibur sunga anoleh kulthuija shi ranga mo? nahana hutta nangei na dau kang chunga doi no wa meh?

²²Chuna thuppa shi ang eko am no ae hana thuppa shi ang aru rou ekom am no ae. Wurra shilim pa kom hong shukkange.

²³Atujong akur am amona rou hi thei shu oh.”

²⁴Woihakom lea sirra rillea arengpuna nathei sha ha hrabakta hallo, “Meeta nawul na ah nangta kom wul lange lella kom wullange.

²⁵Atu jongpa don na am amota chu madon chunga ta lella donpi ange hana don thei no amota chu madon thei te phao la ah hao ange.”

²⁶Jisu na hitta rillea, “Chungthieng reng ram chu hihek ti ange apa akha na alei chunga muchi wur jongpa ae.

²⁷Tantienga amo na jalla am hal enthou wa thou hal muchi lim pa chu tou ah hange. Chuphao shunga amona alota shukmo dangpha no ae.

²⁸Nalimpa hi alei na mathei chakka ajiek adon masha ah shuk weta hana asui chumma anutieng chu ara ra ae.

²⁹Hana ara amin jai ja chu apa ha na kuite choija pot thou ae. Maram chu aham rang apha ha tung so weh.

³⁰“Anina Chungthieng rengram hi, ehekti, ae ta rillang meh?” “Anoleh ejongpa roumushuk ka dangpi ang sha?

³¹Na ha chu hihek ti ae sin takti maru na alei chunga nawur juija.

³²Amu ngei lim karra amo na tou ah hang juija loktekti changa abak tamma wanjaija awana kom a bu sha ah sholhlak na nei ae.”

³³Jisu na mee ngei kolla rouril ae, hijongpa adang adang roumushuk ka, mani lung hal thei runga.

³⁴Amo na manita roumushuk hi tolno wa manita rilno ae chuti weta marui ngei hitta chak amjui ja chu hrabakta tong let pi ae.

³⁵Nani nie nietak wakjuija marui ngeita amona rilleh, “Anina ralha lalla thingsai oh.”

³⁶Chuna wairul rija ta hran phur weta amona chunga am na kung chak no wa adang kung ahre am hana manina amo hitta rui ah thing haso.

³⁷Hana idang dangno ajap ahai hanga tuijulna kunga lutta wa ah tuina kung shi ah waso ae.

³⁸Chuti weta Jisu chu kung dopa mul neiya alu dau ah jalla ame. Chunapa chu arui ngei na amota hrangveta rilleh. “Ocha ani thi-anga aeya am hi nang chu dang no-ache?”

³⁹Amona thou weta, thirangta Roupe-ae, “Dai oh! Tuiyul tako rille nemmo!” Chuna pa chu thirang ko daisowe akha chu tuiyulko nem so weh.

⁴⁰Arengpu na marui ngeita hitta rilleh. “Ejaranga alo haja atie ah chuo? atun phao sunga nangoiring am no the chau?”

⁴¹Chuna mani thei chakka hita rillhakke, “Atu pamonu nahi?” thirang na kom tuijul na kom marou jui ae!”