Read Chothe Naga MAK 5 Bible Online

MAK 5 - Chothe Naga bible

MAK 5

¹Manina Gerasinie ram tienga tuipi lalla wa so weh.

²Kungsunga thou Jisu na shuk juija hrano muilha lut mee akhana hlankung hai thou wa wa-a arengpu ta tukhlak so weh.

³Na mee hi hlankung sunga hata ringa am mee ae hana atu akha na amota mant na shi nea no weh.

⁴Amota apha chang honna leh-ah Leh-ah akut akae thirling rui ah huppa shihalko chatpi,atu akhana ko amota lhem neno-ae.

⁵Suon jan nei no wa hlan kung bunga au-wa akha chu athei chaka matakka alung seou weh.

⁶Aram la hai thou wa Jisu ta mari juija ma am na tan na wa weta arengpa maitienga ahuk hrun ae.

⁷Amona ringa ou-ae, “Loktekti Chungthieng spa Jisu, nangle kei isuk lhak meh?” Chungthieng minga keina nangta nie ah am minge, keita aol pha pi no oh!”

⁸(amona hi rilna chu, “Hrano muihla nang apa kol hai thou wa shukko Jisu na ril!”)

⁹Hana Jisu na sai, “Naming alo ti meh?” Apa hana sange kaming chu kanilim “ti chu kani hi tammunge.”

¹⁰Hana Jisuta leh-ah leh-ah kani ta, na ram sung hai thou julla hla pi no oh ta nie ae.

¹¹Aneite Mullon tlanga wok abom akra rak jonga am meh.

¹²Mani na Jisu kolla hlam meh kanita na wok ngei karra hla pi oh. Hana mani sunga kani na lut tukkae.

¹³Arengpu na ngaipi ah hrano muihla ngei ha shuk weta wok sunga lut so weh nahana am wok ngei chu lasing ani ae. Mani na tuikung ral ahai thou wa mani ha tolla lup so ae.

¹⁴Wok shelpa ngei na rou lim hi mani hu sunga tanna thing weta suipa chu meelim na shukka am hata alo ti mo ta anphao ae.

¹⁵Jisu kolla mani wakjuija chu hlawang chunga rol apa ha manina ripha so hra bakta apun adir jon weta onga am ri weta mani na atie ae.

¹⁶Hrano triek na choija am apana alo ta hati ah sa, akha chu wok ngei kolla shuk ri pha sa mee ngei na manita hrabakta suipi ae.

¹⁷Chuna mani ram sung hai thou thing rang ril lea.

¹⁸Hana Jisu na kung sunga lutpachu hrano triek chung apana manutienga jui tol rang nie ae. “Nang hitta thing ha tikkae.”

¹⁹Chuti weta Jisu na manu jui rang ngei pi no ae, “Chuna hutta Jisu na amota rillea na inntienga lea weta nani inn sung ngeita rillo Arengpu na natarang tullu lu pi akha chu eja tam malungshit pi ha.”

²⁰Chunapa chu amona ma inn tienga lea weta hulok asom ma Jisu na aloti tullu mataranga ae pi mo ti ha. amona sui ae marou thei pha meelim na angak tul shuk kae.

²¹Jisuna woihapa tuipilen kunga aral lalsu wa wak juija wairul rijana amota bom ma am meh tuipilen ralla.

²²Hana senagoge sunga rouril nea karsung Jairas kom tunga Jisu mel maripha jui ah makae kunga moksho ae.

²³Akha chu alung thienga ril lungshi pi oh, keita, “Kasanaonu ha thi anga ana ah am so weh. Chuna nangna lungshi ngei ah wa weta nakut na machunga shi lea chu dam ange.”

²⁴Chunapachu Jisu na amo hitta thingha so ae hanapa chu wairul rija na Jisu manu jui ah thing so weh, hana chu mee eja na numa shihakti so weh.

²⁵Hana kum asom ani athee chak tulla am ana nameinu akha am meh.

²⁶Namei nu ha maipa eya na an halkom lella tieng dam no tekka adon anei eja kom thangso ae adam mang hutta hella tieng na tek so weh naha, naha.

²⁷Hativeta amona Jisu hina rou mathei juija wairul riha nutienga wa weta arengpu punkiengte thamso.

²⁸Matham na rouram chu hita halleh. Amona, “Keina mapun kiengte chak halkom tham lea chu kei dam mange.”

²⁹Apha hana makka mapum ma shuk athee ha shuk nijo weta matakna dangpha ah aol madong eja ha dam so ae.

³⁰Jisu na makolla haithou wa jatha akha shukka thingso ti matakna dangpha pa chu nutienga wairul rija amna haileh weta hita sai ae, “Atuna kapun kieng tham meh?”

³¹Marui ngei na hita sange. “Wairul rija na nungjel mangjel kar sunga atuna keita thamma meh ta alota sai ah che?”

³²Chutiweta Jisu na atun na tham nu ta berra ann ae.

³³Namei nu na dangpha so shukka am lim hi, chuna arengpu kae kunga atri akha chu hirra tu weta makolla adiek rou lim rilso ae.

³⁴Arengpu na, nameinu ta rillea, “Ka sanaonu nangoiring jarra adam pha so che. Na ol nanat hai thou wa dam jou oh daija thing jou oh.”

³⁵Rouhi Jisu na tronga amleija Jairus inn hai thou wa rouron mee na wa weta amota rillea, “Nasanao nu ha thiso ae, ejaranga ocha ta ollang pi ah che?”

³⁶Jisuna mani ril thei no hongsa ae weta makolla rilso, “Ngoi chak ngoiringo ekom atri no oh.”

³⁷Pitar akha chu Jacob hina uleh nao Johon chak ano wa atu akhata Jisu amohitta thingha no weh.

³⁸Manina Jairus inn sunga tung so weh hana mee ngei na tappa ae rang dangno wa am Jisu na ripha so.

³⁹Mani am na Jisu na lut weta rilleh. “Ejaranga nangei lungolla erang dangtheino wa chou? Na unga hi athi ano sa ae inn na sha ae.”

⁴⁰Chuti weta mani na Jisu ta nuiso ae amo na mani lim pa ta awao wa julla hla weta unga hana manu mapa akha chu manutieng jui marui inthum chak unga am na lutso ae.

⁴¹Arengpu na unga kut choiweta woithum rillea. “Talitha koum!” (hina rilna chu ngakte oh thou jou ta keina rilla aminge!)

⁴²Apha hana makka ngir thou weta ahul tunga rol so. (Nangak te ha akum asom ani shu so weh.) Nahi mani lim na angak shukkae.

⁴³Hana arengpu na mani kolla rou akha rille nahi atu akhana dangno su oh. Hana mabak ma-in rang ahre te pe oh.