Read Chothe Naga MAK 6 Bible Online

MAK 6 - Chothe Naga bible

MAK 6

¹Jisu na amunt hana hai thou phel hou wa arui ngei hitta mahu ah thingso.

²Sabat nie ah Jisu na Senagoge sunga lutweta machu pi matakpi rijuija marou thei mee ngei na angak shukka “Naapa hina hoitienga hilimpa chu thing a meh?” ta sai. “Amota pekkashi lungsing lungwar hi ejong pa mo meh? Alota amo na anealah ae sha!”

³Amo hino meh thing tullu lu paha? Amo hino meh Mary’s sanao Jacob, Josep, Judas akha chu Saimon unaopa ha? ma au ngei no meh ani karra am ngei ha? hana mani na amota ngaino thouso.

⁴Manita Jisu na rilleh, “Rouphu pata amunt changhon na ajak atri ae, chuti weta mahu sunga ma-u-manao ngei na chu ngai nun no ae.”

⁵Amo na anealah ephao hana ae no weh ana asa ahre te chunga makut shiveta dampi ano wa.

⁶Chuna amo na kom mani ngoiring awat hi ri weta angak shukka. Jisu na hu, hu chang honna lutweta chupi takpi ae.

⁷Asom ani ta makolla kokweta mee ani, ani tulla manita hla ae hana amo na hrano muihla ta nea rang jai tha kom pepi ae.

⁸Machupina lamchu hi so weh, “Nathing nahongjuija namolbok chak ano wa ephao choi ngai ang no weh budol kom nahou sunga sum kom choi no oh.

⁹Huirang chungweta nalinglut ani shu wa choi no oh.”

¹⁰Amo na hitta kom rillea, “Nangta lamtukka ama na inn sunga am mo, amunt ha houphurra na thingma lim ma.

¹¹Hana ejonga nangta meengei na ariem ma nuisong no narou ngei pi no lea nakae ah vokphul ta ha hao oh na hi na dang nea ranga ae!”

¹²Manina thingweta malmashi lung hlong rang rou rilpi ae.

¹³Manina tarik eja ta julla hao weta ana eja chung olives shirik notpi ah manita dampi.

¹⁴Herod na atun chu Rengna theipha so weh maram chu Jisu minghi amunt chang honna thang so weh mee ahre na rilhlak ae, baptias ae pi pa Johon kom athi sa hai thou wa ring so weh chuna sarukka amona anealah jaitha ma ae.

¹⁵Adang ngei na chu hitta rilleh, “Amo hi Elija ae” hana, adang ahre na rillea, “Amo hi rouphu pa ae hana amatienga rouphu akha ae.”

¹⁶Chuti weta Herod na theiweta ril rouchu, “Ahong watta kathat apa Johon ha athi sa hai thou ringso weh.”

¹⁷Na hi Herod matak makna Johon ta ruija hup weta ren inn sunga hunga shi rang tongsan mapekha. Hi lim pa hi amo na anaopa Phillip anamei ta manei sarukka ae.

¹⁸Johon na Herod kolla, “Nahi ril phur ae, nanaopa namei nei ti hi tongsan na angei ano ae.”

¹⁹Chuna Herod namei nu na Johon ta anda ah that chu that num weta ephao ae nea no ae.

²⁰Rouram chu Herod na Johon chu dramo am mee akha chu athieng mee ae ta danga atri ah kalla shi ae. Chuna marou thei juija lung hlong thin hlong halkom, hata marou theija ariem pha ae.

²¹Hana Herod apoknie rungnie kom pha wa ah amona hijongpa mingseng samla nie ah ralmee tienga trongsan pe ngei alok akha chu Galily ah lamkai ngei ta kokkae.

²²Herod sanaonu na innsunga lut weta malam juija Herod akha chu alok ashai eja ariem pi ae. Arengpa na nangak hata rilleh, “Nadit eja kakolla saitaleh chu keina nangta pe ange.”

²³Amona namei sanao ta saro ei ah hita rilleh, “Eheilimpa naniek lim ha keina nangta pe ange, chu chakno wa ka reng ram ahui phao kom pe ange.”

²⁴Namei sanao hana manu amna awau wa tan na shuk weta, “Hina taranga keina ejong pa nie ang meh?” Manu na sange, “Johon Baptias ae pa alu ha nie oh.”

²⁵Apha hana makka namei sanao hana Arengpa am na ah ranga tanna hongweta hita nie ae. “Nakol haithou wa kadit chu Johon Baptias hina lukang ha atun makka maicham chunga di inge.”

²⁶Hina sharukka rengpa na alung ehakta oal so weh, chutihal ko masaro ei nu juija amona ngai no nea no weh maram chu meelim mai ah saro eishu jarra.

²⁷Chuna apha hana makka ahak mee akha ta Johon lukang ha choi wakrang rourillea chuna ahak pana rean inn na thing weta Johon ahong tan so weh.

²⁸Hana maicham chunga lukang don weta nangak hata pe so weh, hana nangak te na kom manu ta pe so.

²⁹Rou hi Johon rui ngei na theijuija phao weta apum ha la weta hlan na ui so weh.

³⁰Ahal rouron ngeina Jisu kolla rachon weta mani ae na akha chu mani lunghal limpa thangkou ae.

³¹Arengpu na manita rilleh mani limpa hi aphao kom thing angei kom bakrang inrang tancha phao pha nijo weh, “Wa-oh apha atante kei lea nangei na daija solha thing ngei oh.”

³²Chuna mani theichakka adai awan ti na mun na kung chungveta thingso weh.

³³Chutihalko mani thing ri ejana dangpha jarra mani hulok ram hana mani kae ah ranga thingweta mani matienga tung thing hakso ae.

³⁴Jisu na kung hai thou shukjuija wairul rija mel rijuija, amo na ringrei ngei thei ah. Mani hi arung ang amo no kelmo hektiso weh chuna manita eheilim ma chupi takpi thouso.

³⁵Nietlak apha na wak sharukka arui ngei na makolla rilleh “Ram munt hi aram leima la so weh.” hana apha kom leima taiso weh.

³⁶Chuna mee ngei hla sai oh chuleh manikom hu anaite akha chu ram hina mani kom mani thei chakka bak thing inthing su oh.

³⁷Chuti weta Arengpu na sange, “Mani bakrang een ranga nangei na pe oh.” Manina sange Arengpu ta, “Rupa sumnoi rihani choi weta leithing ngo ta rilla che, hija tam luttang budol chu kani na manita bakpi ang meh?”

³⁸“Budol eja choi mee am mo nangeina an thing weta anthingo” Arengpu na manita ril. “Manina budol ranga lea tuirik ani tuk kunge,” ta rilleh.

³⁹Chunapa chu Jisu na mani limpa ha phaiphung rampa chunga abom, abom ong ranga arui ngeita rillea.

⁴⁰Chuna mani na athil nei ah riha akha chu som nga na shak abom ma ongha so.

⁴¹Arengpu na budol ranga lea anga ani choi weta wantienga hai weta ariemma Chungthieng ta dom so weh ahui, ahui hlamma. Amona arui ngei ta mee ngeita sam ranga pe ae. Hahekta tuirik ani kom mee ngei ta sam so ae.

⁴²Mani lim na awon hoppa bak kae.

⁴³Chuna arui ngei na mani baksu sa anui alim budol akha chu tuirik ha taidon asom ani hom meh.

⁴⁴Hana bak phur ngei ha apa ngei chakka lasing ranga ae.

⁴⁵Apha hana maka Jisu na arui ngei hitta kung sunga lutweta wairul rija ta hao phur ra amona Betsaida tienga thinge.

⁴⁶Mani ta hran nu tienga Jisu na mul bung akha ah thing weta nie thinge.

⁴⁷Nietlak apha wakjuija chu kung hakom tuipi ajai ja am so ae. Chuna arengpu chakso ramkanga am hi.

⁴⁸Thi rang na mani mai tienga ratta ranga wak sarukka rui ngeina kungthou wa holla olla am Jisu na riphaso. Na hi jantieng apha inly tah ah wakjuija arengpu na tui chunga akae ah thing hi mani ta lella waso.

⁴⁹Chuti weta arui ngeina tui chunga makae ah thing rijuija mani chu thempalopna rang so weta atri ah au thouso.

⁵⁰Rouram chu mani limpa na amota risharukka atri alao thouso. Apha hana makka arengpu na manita trongpi so, “Atri no oh kei inge.”

⁵¹Chuna pachu arengpu na kunga kalweta mani hitta amha so ae, hana thing rang kom daipiso chuna mani limpana angak shukso ae.

⁵²Manina mee lasing ranga ta bakpi inpi ha ephao halla shuk thei no weh mani lung na kom hal thei no ae.

⁵³Tuipi ha mani na lal sujui ja Genesaret ramma tung so ae. Hana mani kung ha ren na shi so weh.

⁵⁴Kung sung hai thou mani shukjuija hana am mee ngei na Jisu ae ti dangpha so.

⁵⁵Hatieng ram ma am ana asha ngeina mani jalna phar choi weta Jisu amna chang honna phao ae.

⁵⁶Chuna husunga akha chu hulokka hana chak no wa hupi na mun na kom ana asha ngeina rachon na arengpa na mani pun kiengte chak halkom thampi ranga nie ae akha chu mathampi meelim na adam ahra pha ae.