Read Chothe Naga MAK 7 Bible Online

MAK 7 - Chothe Naga bible

MAK 7

¹Pharishi lea rouphun ocha ngeina Jerushalem hai thou wa phao weta rachunna Jisu ta hulla bom tul ae.

²Pharishi ngei na mee ngeita juipi num talit anu juija marui ngei na akut shiel no lutto budol bakkha.

³(Pharishi akha chu Jihudi ngei na ulien changei talit anu juija mani kut siel no wa chu bak in no ae.

⁴Chuna mani na ajien thingjui jakom mani kut siel no wa chu bakno ae. Chu chakno wa mani talit nujuija asielsha wonshang akha chu tapot tuidon kom.)

⁵Chuna Pharishi akha chu rouphun ocha ngei na Jisu ta sai, “Alo wa narui ngei na bakrang sharukka ulien changei talit nu juija asiellou kuta bakka meh?”

⁶Jisu na manita sange, “Ahra sangei oh, Isaiah na adiek rou maphukka nangei taranga rilla shi ha, hita jiekka shi ae: ‘malmashi ngei na keita mani murrachak ajak atri ae. Chuti weta manilung chu kakolla hai thou aram la ah am meh.

⁷Chuna manina malmashi ngei talit hi, dramo rou hekta chupi takpi ah keita ariemsalla mokkae!’ ”

⁸“Nangei na Chungthieng trongshan ta hla ah houweta malmashi ngei talit ta ratta choi ae.”

⁹Akha chu manita amona rilleh, “Nangei talit ha hlano rang sharukka Chungthieng hina trongsan jui numno ae.

¹⁰Hina sarukka Moses na rilleh, ‘Nanu napa ta ajak atri oh hana atujongna manu mapa ta sarkou lea chu amo ha thi su oh.’

¹¹Chuti weta nangei na chupi chou ae, ejonga mee akha na manu mapa ta san nang ha, chuti weta rillea, ‘Nahi korban ae’ (nahi rilna chu, Chungthieng ta ae),

¹²chuna sarukka nangei na nanu napa taranga ephao ae num nijo weh.

¹³Hitta aeja nangeina mee dangta chupijui Chungthieng trongshan chu hla hou so chou ae. Hichak ano wa adang eja ko ae ja am chau ae.”

¹⁴Jisu na mani makhaita lea ah ma am na ah kok weta rilleh. “Karou hi thei oh akha chu nangei limpana dang au oh.

¹⁵Malmashi sunga lut hana amota thienglao changpi nea ang mo weh chuti weta malmashi sunga hai thou shuk hana chakna amota thienglao changpi ange.

¹⁶Atujong akur am mee na thei shu oh.”

¹⁷Hana meelim hlathou wa arengpu na innsung tienga lutjuija, marui ngei na akal ahe rilpi ranga sai ae.

¹⁸Chuna arengpu na manita sai ae nangei kom mani hekta lunghal thei no chau? “Nangna ri no the ah che awau hai thou wa malmashi sunga lut na malmashi ta thienglao chang pi nea no ae?”

¹⁹Ti chu nahana malmashi lungsunga lut no ae chuti weta won sunga ae, hati weta awao wa shukka thing sier ae. (Hi rilna chu, Jisu na bakka ngei eheilim pa ta thiengpi so ae.)

²⁰Hana woihapa Arengpuna rilleh, “Malmashi lungsung hai thou shuk na amota theignlao changpi ae.

²¹Rouram chu lung sung hai thou shuk hrano lunghal chu, aruthei, meethat, akha chu meenamei ta shimshi boron mee ae.

²²Hoplah pelah, hrano tullu lu murthei, namei apa hrano lunghal anar rat, hrano shukrang rou. Lokchokti mel akha chu lungmo.

²³Hi hrano eheilimpa hi lungsung hai thou wa shuk weta malmashi ta ‘thienglao changpi ae.’ ”

²⁴Jisu na, na amunt hai thou wa houphurra Tur akha chu Sidon tienga thinga atu akha dangno lutta innsunga lutnum hal kom amona aruhanta ma amna ah am theino ae.

²⁵Hrano muihla na ruija rol namei sanao akha hina manu na Jisu hina rouram ma mathei pha juija phao weta arengpu kae kunga mok so weh.

²⁶Namei ha chu adang jati ae Syrian Phoniciah ram ah pok mee ae. Namei nu hana asanao nu kolla am hrano muihla julla houranga Jisu kolla nie ae.

²⁷Chuti weta Jisu na sange, “Masha tekka unga ngeina awon hop masha shu oh. Rouram chu unga ngei bakrang budol ha ui ta pe no ae.”

²⁸Namei nu na sange, “Oh weh arengpu” “Chuti weta unga ngei bakna maicham thuija tul bak na in na alim ngei chu ui na kom bak no meh.”

²⁹Hana arengpu na namei nu ta ril, “Narou hina sarukka nang thingjou oh nasanao nu kolla hrano muihla shukka thingso ae!”

³⁰Namei nu na ma inn tienga maleh ah asanao nu ha kut chunga jalla am ripha so; hana hrano muihla na shukka thing so.

³¹Jisuna Tur akha chu Sidon ram hla ah hou phur weta Galily tuipi thui tieng tumma jung weta Dekapolis ramtieng thingso ae.

³²Hana mee ahre ngeina akurko set atrong lah apa akha Jisu am na ruija phao weta Jisu na ma chunga akut te shi ranga nie ae.

³³Chuna wairul rija ngei karra hai thou wa adanga ruija shuk weta Jisu na makur ani makka akut chal soun na, achil shak weta akha chu apa hana alei ah tongpi ae.

³⁴Amona wan ram tienga mai hai weta asorpi holla makolla rilleh. “Ephphatha!” hina rilna chu “hong jou oh!”

³⁵Hana pachu spa kur kom hongpiso akha chu alei rui suikom hla pa chu hrabak ta trong thou so.

³⁶Hana Jisu na mani ta atu akha kolla rou hi rilno oh ta trongsan pe ae. Chuti weta arengpu na hija ril halkom malmashi ngei na chu lella thangpi ae.

³⁷Chuna na rou thei meelim na ashi angak shukkae. “Amohi ehai limpa hrabakta ae nea ae,” mani na rilleh, “Akur set meekom thei pi nea ae hana atrong lah kom trongpi nea ae.”