Read Chothe Naga MAK 9 Bible Online

MAK 9 - Chothe Naga bible

MAK 9

¹Hana Arengpu na manita rilleh, “Keina adiek rou nangei kolla ril inge. Hina am ahre chu Chungthieng rengram na ane jaitha tolla jung malim ma athi ti dangpha ang no ae.”

²Rungnie aruk takka Jisu na Pitar, Jacob akha chu Johon tolla mullon sang nga manita ruija, hana chu mani ha mani thei chak rui kallea. Hana mani na anna am lei ah Jisu kolla ahlong waso ae.

³Akha chu apun adir chu deja warra haja war ae chuna aleiram ma atu akha na kom hahekti awar pun don nea no ae.

⁴Hana arui inthum na Moses hitta Elija na mani maikunga shuk weta manui na Jisu ta trong thou pi hari so ae.

⁵Jisu kolla Pitar na rillea, “Ocha, amunt hina ani amhi ehakta hra so weh. Thiel inthum ani na sa ei oh-akhana nataranga, akha na Moses tarang hana akhana Elija tarang.”

⁶Chuna amo akha chu adangei na elota rill ang mo dangthei no weh, ti chu mani na leima tri sarukka.

⁷Chuna mani chunga sumphai na li-weta sumphai sunga thou sanrol akha na ril shukkae, “Nahi kasanao pa ae, machunga keina lungshi inge maril hi ngai thei oh.”

⁸Edang dang nowa ahul tunga mani anjuija Jisu ano wa atu adang akha phao mani na ri pha ni jo weh.

⁹Chuna manina mulbung hai thou tumma junga Jisu na manita rillea meesanaopana athi ngei kar hai thou malim chu, atu akha kolla nangei na ri sa ha ril shuk no oh ta Jisu na rou manita rillea.

¹⁰Mani thei chakka hita ngai tu hlak thouso, “Athi hai thou wa ringthou tina meh.”

¹¹Jisu ta manina hita sai, “Alo sarukka rouphun chui ngei na Elija na masha phao ange ta rilla meh?”

¹²Matrong sang chu, “Elija na masha jungweta eheilim pa hi tamasha ae ange ti ha adiek takkae. Chutiweta ejeranga abai sunga jiekka shi ah meh meesanao pana aol ana eja dong anga mee na junna hou anga meh?

¹³Chuti weta nangei kolla karil chu, Elija chu phao so weh hana marou hana jiekka shi hekta mani na dit ha makolla ae so weh.”

¹⁴Amona arui ngei am na mawakka ehakta tam wairol rija na mani ta hulla rouphun chupi takpi ngeina trong sum hlakka am ripha so.

¹⁵Jisu wakhi meelim na rijuija mani na edang dangno wa angak shukka ma am na ah tanna thing weta amota mokso.

¹⁶Jisu na sai, “Ejongpa sarukka nangei na manita trong sum hlak chao?”

¹⁷Hana wairol rija sunga apa akhana sange “Ocha, kasanaopa ha hraihru na sunna atrong shukno akha nakolla ruija wa inge.

¹⁸Chuna amunt chang honna amota hlawang na sunna athei chakka alei chunga tabu ah athei chakka aha ril weta achel phul shukka keina narui ngei ta hraihru muihla jullanga karilla manina julla hao nea nijo weh,” Jisu na rilleh.

¹⁹“Ngoiring thei lou mee ngei.” “Echan sotta keina nangei hitta amha ang meh? Echan sotta keina nangei ta dangpi song ang meh? ruija wa oh apa sanao ha ka-am na ah.”

²⁰Chunapa chu manina Jisu am na apa sanao ha ruija hlawang muihla na Jisu ta ri len apha hana makka apasanao hata ratta soum ma houphur weta alei chunga letta tu wa achilphul sakso ae.

²¹Apa sanao hina mapa kolla Jisu na sai, “Apha Eja sotta amona hihakta ae mo weh?” “Mapa na sange unga hai thou ah.”

²²“Apha chang honna amota that ranga tuisunga maisunga denga hou ae. Chuna kani ta lungshi ringrei ah san changa nangna na ae nea tullu te lu pi oh.”

²³Jisuna makolla rilleh, “Ejonga nangna ngoiring ta lea chu eheilim aneno am no ae atujong ngoiring mee taranga.”

²⁴Hata leitakka mapana tappa aushukke, kangoi ringchu aminge chuti weta hane shulinge, “Ka ngoiring lel ranga sanpi oh!”

²⁵Wairul rija na mani kolla naija wak juija Jisu na ri ah, hrano muihla ta amona trongshi rilleh, “Atrong shukno akha chu kurset muihla,” amona lul lea, “Keina nangta rou ril inge, na unga heithou woiha shuk jouwo waiha lea ah lutno sa oh.”

²⁶Hrano muihla na amota mant phura aol ana pe hao phur weta shukka thingso. Chuna rungthar apa sanao ha athi sa hekso weh meelim na ko thi so weh ta rilleh.

²⁷Chuti weta Jisu na makut ha ao weta thoupi so weh hana amoha ngir thou so weh.

²⁸Jisu na inn sunga malut juija marui ngeina aru hanta amota sai, “Alo sarukka kanina hrano muihla hata julla hao nea no wa meh?”

²⁹Jisu na sange, “Hijongpa hi chu ani nachakka julne ae.”

³⁰Chuna nutienga Jisu akha chu arui ngei na rammun ha hau phurra Galily lalla thingso. Mani na thingna munt ha Jisu na chu atu akha ta dangpi num no ae.

³¹Rouram chu arengpu na arui ngeita chupi ah, takpi ah hita rilleh, manita, “Meesanaopa hata meengei kut chunga pe ange akha chu mani na amota that tange. Chutihal kom rungnie na thum takka amo na ringthou ange.

³²Chuti weta rilla am hi mani na dangpha nea no ae chu chakno ah manina hina rilna rouram kom sai angphao atri ae.”

³³Manina Kaphernahum wakjuija mani lutna innsunga amona manita hita sai, “Ejongpa rou sarukka nangeina lampi ah trong sella chao?”

³⁴Chuti weta manilim na daisiem ti ae rouram chu manina lampiah atu na atuta loktek mo ae ti hi trong shell hlakkae.

³⁵Hana Jisu ong weta asom ani hata kok weta rilleh, “Ejong atu motieng na masha di lea chu, amo ha meenu tek ti ha chang weta meelim rui changa ta ae.”

³⁶Amo na unga akha mani karra ngir pi weta amona kolku wa mani ta ril.

³⁷“Atu jong pana na unga akha hita ariem tukka kaminga lapi lea chu kaita lapi ah ae; hana atu jong pana keita ariemma ngai pi lea chu keita ano weh chuti weta keita hlapa ta ngaipi ah ae.”

³⁸Johon na rilleh, “Ocha, malmashi ngei na naminga hrano triek julla hou juija kanina manita ha tullu ha lu no ranga ham unge, rouram chu amoha ani sunga ano weh.”

³⁹Jisu na manita rilleh, “Amota nangei na hamma si no oh,” “Rouram chu kaminga atu jongna ae nea tullu lu weta hana nutienga kaming taranga hrano tronga rollang mee amono ae.

⁴⁰Chuna atu motieng na anita anda no ngei ha ani taranga ae.

⁴¹Nangei hi Khrista mee ae ta hana minga atu jong pana in-ranga tui don pi lea chu keina adiek takka rilsinge ma ae na amant pha ange.

⁴²“Atu jongpa ung sanao akhana keita ngoiring amota nangei karra atu jong pana amota pakka tulpi lea chu, mataranga shum alung ahonga ren weta tui pi linna denga haopana hella hratek kange.

⁴³Hana ejonga nakut na nangta pakka tul pi lea chu, nakut tan na hao oh, rouram chu nakut akha chakka aring ringchang pha pa na hella hratek kae, nakut ani su wa sarmei ah luttang saruk chu.

⁴⁴Amunt hana sarmei chu amit ti am no ae, hana alung na bakka athi ti am no ae.

⁴⁵Hana ejonga nakae nakom nangta pakka tulpi lea chu, nakae tan na hao oh, rouram chu nakae hurra aring ringchang pha pa na hella hra tekka nakae ani su wa sermei ah luttang saruk chu.

⁴⁶Amunt hana sarmei chu amit ti am no ae, hana alung na bakka athi ti am no ae.

⁴⁷Hana ejonga namit na kom nangta pak tulpi lea chu lah ah hao oh, Chungthieng rengram ma namit akha chakna lutpa na hella hra tekke mit ani su wa sarmei kum ma deng ang saruk chu.

⁴⁸‘Amunt hana ringphur lung ha adai am no ae hana sarmei kom adai am no ae.’

⁴⁹“Sarmei ah malmashi lim pa hi chi-al an hek ti ange.

⁵⁰“Chi hi hra ae; chuti weta ejonga chi-al ha am no lea chu nangei na olata al pi ang chau? “Nangei karra chi hekti tonpi chang chu oh, akha chu akha lea akha adai am ha oh.”