Read Chothe Naga LUK 12 Bible Online

LUK 12 - Chothe Naga bible

LUK 12

¹Wairul lasing malmashi eja na bom tulla akha na akha chunga kae tro hlakka am ha juija Jisu na masha ah arui ngei ta ril, “Hra bakta am mo ha chu Pharisis ngei na ahra sa ae.

²Rouram chu eheilimpa hi thuppa shi ngei ephao ngai ang no ae hana wurra shi ang kom wurra ngei ang no ae.

³Chuna sarukka athim thuija ehal kom naril ha nisoun awar ra theija am meh. Akha chu eheilim pa nangei thei chakka aruhan ta nangei inn sunga ril hlak rou ha inn chunga ringa thei ja am meh.

⁴“Tonpi ngei jo kei na nangei kolla ril tikkae nangei nangei pum ta that nea mee kolla ephao ati no oh, rouram chu amona anutienga ephao hrano tullu lu nea ang no ae.

⁵Kei na atu ta ti anga meh ti ha ri pi tikkae: Chungthieng ta ati oh amo na chu nangei ta that sanutienga kom sarmei kum ma denga hou nea ae. Karil rou hi ngoiringo, amo ae nangei tit rang chu!

⁶“Naija peisha ani taranga ushak ranga jurra no meh? Chuti phao sunga Chungthieng na chu mani ta makka hou nea no ae.

⁷Nalu ah nasam lim takom amo na masing danga am meh. Chuna sarukka ephao ati no oh: nangei chu atam ushak ngei ta hella nangei chu amant tam meh!

⁸“Kei na nangei kolla adiek rou rillinge atujongna meelim maikunga hrabakta ril shuk nea mee amo ha ka mee ae chuna meesanao pa na kom wanrui ngei akha chu Chungthieng mai kunga hekta ae ange.

⁹Chuti weta atujongna keita meelim maikunga ngeinum no lea meesanaopa na kom wanrui ngei akha chu Chungthieng maikunga ngeinum mang no ae.

¹⁰“Atujong akha na meesanaopa ta trongshi ril chu ngakpi ange; chuti weta muihla athieng ta trongshi rilla anda lea chu ngak pi nea ang no ae.

¹¹“Chuna nangei ta synagogue sunga lamkai ngei ane angam akha chu Governore ngei maikunga rui ja phao juija alo ta nakkang sa hana alo ta sang ang sa ta nalung ephao olno oh.

¹²Roulam chu muihla athieng hana apha hana alo ta nangna rillang mo ti chu pi ange.”

¹³Wairul riha sunga spa akha na Jisu ta ril, “Ocha kata kolla kapa houphur anei adon limpa ha keita sampi rang ril pi oh.”

¹⁴Jisu na makolla sang, “Tonpi oh, atu na keita nanui ani anei adon sam ranga karou am nonge?”

¹⁵Chuna meelim ta kom amona channo lutta ril, “Natakna natakta chekshilla am mo karam paicha ngei kar sunga, roulam chu malmashi adiek ringchan ma am madon hana ah no ae, machong mareng hana kom ah no ae.”

¹⁶Hana Jisu na manita panteem akha ril ae: “Atu jong achongpu akha eenkulla muchi balna leima ra ae.

¹⁷Chuna amo na hita hal thou so, mathei chakka, ‘Keina amunt limpa ah muchi balna shi hap sange kei alo ta ae ang jou sha?

¹⁸Hiso ae ka ae rang tullu chu,’ mathei chakka ril; ‘Keina kasier hi hri weta hita hel alok akha sha weta muchi balna limpa hi hrabakta shi ang singe.

¹⁹Hana keina kathei chakka rillange, jaihra spa! Akum eja taranga nadarkar makhai shi sange naringchang ha bakka inn na riem ma nathei chakka ringo!’

²⁰Chuti weta Chungthieng na makolla ril, ‘Lungmo nang! Awoni jantieng mak hina naring chang pe ta so che; chuna sarukka atu na ahra pot nashi limpa hi pha ang sa nataranga na shi ha?’ ”

²¹Hana Jisu na hita chan, “Chungthieng ningtienga achong areng changno mathei chak tarang anei adon shi ngei chu hi hek ti ange.”

²²Hana Jisu na arui ngei ta ril, “Keina nangei kolla rilla aminge, ha chu ephao olno oh, bakranga ring ranga darkar ngei kom, hana nangei pum taranga punchoi.

²³Ringchang na bu an ta hella amant tam tekkae hana pum na kom pun choi derchoi ta hella kom amant tam tekkae.

²⁴Anno waak ngei ta; manina muchi kom wor no ae hana hom ma kom shi no ae; Mani shang shi na sier kom am no ae chuti weta Chungthieng na manita bakpi inn pi ah am meh! nangei chu awa ngei ta hella amant tam tekkae.

²⁵Atuna nangei na olla so ae ta nangei ringchang ha huningchan thap sai pine sha?

²⁶Chuna nangei na hajong atan te tarang phao nangei nea am no weta eje ranga adang adangei taranga olla am ma chao.

²⁷Anno ahlam rei na tau wa hang, mani taranga mani na ephao wa laharra pun choi no ae chuna keina nangei kolla rilla amminge Solomon na phao wa rei ngei ta hella ahra punchoi am nea no ae.

²⁸Awoni ah par weta atukka tuijang thingna rampa ngeita eja ah hra pi lea chu, nangei ta chu eja ah hella punchoi dirchoi jon pi ang sha? Oh ngoiring thei lou nang!

²⁹“Chuna nangei lung sunga ephao wa olla hal no oh ebakkang e-ennang sa ta.

³⁰(Shimlei jati meelim na chu nahi na taranga jonga rolleh.) Na pathieng na nangei na nahi darkar am meh ta danga am meh.

³¹Chuna saruk chu nangei na Chungtheing rengram ha jong ma sha oh, amo na nalim pa ha nangei ta pe ange.

³²“Atri no oh, kelmo naongei, roulam chu patieng na nangei kolla Chungtheing rengram pe num meh.

³³Na am nadon lim jur weta sara ringrei ngei kolla napha sum ha pe oh, amang am lou sum hou sem ma shi oh, ha chu aru thei ngei na kom ruk no na akha chu soum na kom bak no na thangwan ram ma chuna athang ti kom am no ae.

³⁴Chu lea chu nangei sona rupa am na amunt na nangei lungkom hana amange.

³⁵“Nakung rui chetta huppa amo akha chu Nata dewankari warpi ah.

³⁶Mitpu akha na taichang na thinga ma lea arui na hakka am hekta ha chu maleh jui ja inn kal ha woiha chakka rei jui ja inn kal ha woiha chakka hong rang.

³⁷Mitpuna lea juija aol donga hakka am ngei ha jaihra ae nu. Keina nangei kolla diekka rillinge malut juija amo na malinglut lep weta ma doukang chunga onga bakha pha ange.

³⁸Eja ah jaihra ang sa thou rang ae ah hakka am ngei ha, amo na janjei ah phao hal anutienga phao hal!

³⁹Chuna inn mitpu na aru theipa phao rang apha dang lea chu aru theipa na etikka kom ma inn thu gai weta lut nea ang no ae.

⁴⁰Chuna nangei kom thourang ae ah hakko. Roulam chu mee sanao pa na jung ang apha ha nangei ngoiring no jui ja kom ngei ae.”

⁴¹Pitar na ril, “Arengpu na panteem hi kani taranga mo ano lea malmashi lim ngei na lak ranga etina mo ae?”

⁴²Arengpuna sang. “Atuna chu ngoiring chet akha chu lungwar shuk rui mo ae? Atujong kolla mitpu na ma inn sunga pot lim pa kut shilna ah apha cha ah bakrang pe ah ngoiring sa?

⁴³Hijongpa hra tullu lu ja am rui ha mitpu na tuk hlak juija eja ah jaihra ang sa!

⁴⁴Chuna keina nangei kolla rillinge mitpu hana hajong rui hata inn sunga pot lim pa ha makut chunga silna ange.

⁴⁵Chuti weta atujong rui akha na athei chakka hita rilla, kamitpu hi lea nei nijo ve ta adang arui namei apa makhai ta bakka inn weta phitta.

⁴⁶Hana naha nie chu mangoiring no na apha ah ma mitpu lea juija amitpu na amota atan, atan tan weta aril jui no ngei kolla saruk pha pi ange.

⁴⁷“Amitpu lunghal dangpha rui chuti weta tullu chu lu no akha chu thourang ae no rui amo ta chu ringphur-mea sha chokta makhai pittange.

⁴⁸Chuti weta amitpu lunghal dangpha no rui chuti phao sunga ma lu na tullu anu juija phitta ngei mee ta chu haja panu phittang no ae. Hana atam pe meelim ngei hai thou wa atom la tikta rillange hana mee ngei na tamma hou phur na mee kol hai thou wa tam ma nie ange.

⁴⁹Simlei chunga kajung hi sermei huljung inge chuna alota kadit hi atun chu thou so ve!

⁵⁰Keina baptias pharang am ae, chuna nahi kasu ma lim ma keita eja ah lung aol pi meh!

⁵¹Simlei chunga adai pe junge ta nangei na halla chau, ah nonge hella tieng ahran tul sukranga ae.

⁵²Atun hai thou chu inn sung am mee ranga sunga inthum na ani ta hran hlakka ani na inthum ngarchang ange.

⁵³Mapa ngei na kom asanaopa ngei ta ngarchang ange hana asanaopangei na kom mapa ta ngarchang ange. Hana manu ngeina kom asanaonu ngei ta anda ange hana asanao nu ngei na kom manu ngita ngarchang ange; Hana mani ngei na kom amao ngei ta ngarchang ange hana amao ngei na kam mani ngei ta ngarchang ange.”

⁵⁴Jisu na malmashi ngei ta kom ril, “Nangei na nattak tienga hai thou wa sumphai na hang juija nangei na ril hlakkae ru sur ange hana ru kom hata rukom sur ae.

⁵⁵Akha chu hlangtienga hai thou thirang ranga hang juija nangei na dangpha nea ae semnie hi leima sa ange ta naha, hata sa takkae.

⁵⁶Oh, taat-tool! nangei na wan na akha alei ah anna re weta danga chau ae chuti weta atun apha hi ejongpa apha meh ti chu dangne no chau ae?

⁵⁷“Chuna alo wa nathei chakna adiek dangveta ahra tullu lu no wa chau?

⁵⁸Hana nang hitta rou shukka am hana mitpu am na lam ma thing ha leija lampi ah makolla na maral sanpirang ril hou jou oh, ano lea amo na nangta routreem mitpu am na mun phao ruija thing weta routreem mitpu na alok ashai sanao ngei kut chunga pe ah mani na nangta aol raen-inn sunga si ange.

⁵⁹Chuna keina nangei kolla rillinge amunt hana nasum ding hap ma lim ma hata raen - inn sunga am mang che.”