Read Chothe Naga LUK 13 Bible Online

LUK 13 - Chothe Naga bible

LUK 13

¹Halei matam ah malmashi arhe amunt hana amma manina Jisu kolla ril ae, “Pilate na Galily ngei ta manina Chungthiengta rithoi leiya manita that ae.”

²Jisu na sange manita, “Nangei na alo ta halla chao mathat Galily mee na adang Galily ta hella hrano akha chu pak chel mee ngei meh?

³Ano ae, kei na nangei ta rilla aminge nangei pak hai thou wa lunghlong am no lea nangei kom hata thi ange.

⁴Ano lea Siloam inn na triem ma dolla that mee asom arit ha alo ta halla chao? Anoleh mani ha Jerushalem sunga ringa am makhai ta hella hrano vokno ngei ae ta halla chao?

⁵Ano ae! Keina nangei kolla rilla am minge ejonga nangei na pak hai thou wa lunghlong no lea chu nangei kom mani thit hekta thi ange.”

⁶Hana Jisu na manita na panteem hi ril: “Apha akha ah spa akha na ma inn kul sunge theichang kung linga shi ah, Amo na nahani chu ma an thingjuija ara ephou tuk nijove.

⁷Chunapa chu amona ma inn kulla mashi mee kolla ril. ‘Anno, kum thum su so ae na theichang kung hi ara ra mo ta hakka a ka am keina awoni phao tuk nonge ara. Chuna akung hi tan na hou wo! Eje ranga lei hou makhai amona chuppa am mang sa?’

⁸Chuna pa chu innkul hakpa na sange, ‘Ocha kum akha te chak tou wa am ri shu oh; keina akung hi ahul tunga chau weta alei hrat rang athu anang shi ange.

⁹Hana chu nakum tienga chu ara leima ra ange hana ra no lea nang na tan na hou pi oh,’ ”

¹⁰Sabbath rungnie akha ah Jisu na synagogue sunga chupi takpi am lei ah.

¹¹Hrano muihla na lutta kum asom arit khak olla am snu akha hana am meh; Amo ha chu ounchokka chak am so ae akae ha athei chakka dokne no jarra.

¹²Jisu na amo ta ri jui ja amo na snu hata kokka ril, “Namei na ah na am hai thou wa dam jo oh!”

¹³Jisu na makut machunga shi weta hana chu namai nu na athei chakka dok shukka Chungthieng ta amona dom.

¹⁴Synagogue sunga am offisar na Jisu na Sabbath nie ah dampi sarukka lungsa so. Chuna pa chu amona meengei kolla rilsukso. “Ani tullu lu rang rungnie naruk am meh; chuna na lei apha sunga nangna rungnie sunga nang dampi ngei ae sabbath rungnie ano lutta!”

¹⁵Areng Jisu na sange makolla, “Oh hypokrite! nangei lim na nangei silchalpa akha chu Kormoh ren na shi hai thou hla weta sabbath rungnie ah tui enn pi no wa chao.

¹⁶Hina Abraham atu ate hai thou wa shuk namei nu hi Saitan na kum asom arit huppa shi hi sabbath ni ja hla ngei no meh?”

¹⁷Jisu na sang rou hana amo ta anda ngei ta ajak tukpi so mani theichakka meelim na ariemma am meh ma ae angakpi lei sunga.

¹⁸Jisu na sai, Chungthieng rengram hi ehek ti ang sha ta? Akha chu alo ta kei na hihek ti ange ta ae ang sha ril?

¹⁹Hihek ti ange. Spa akha na antam machi ha ma innkulla mawor juija tau wa hanga thingkung hek ti so. Chuna awa ngeina abak chunga abu ran nea ae.”

²⁰Woihapa Jisu na sai, “Chungthieng rengram hi ejongpa hitta mel mal hlakkae ta rillang sa?

²¹Ha chu hi hek ti ae. Namei akha na majam ha achol hita mapul juija majam lim purra shuk malim achol mahap jongpa ae.”

²²Jisu na hulok husin nei no lutta amo na thing, thing weta Jerushalem ma malampi thing lam ma chupi takpi ae.

²³Atujong ahre akha na makolla sai, “Arengpu, malmashi ahre te chak nangna sanpi anga che?” Jisu na manita sang.

²⁴“Narat nathei hana achip lam ma lutrang jullo; roulam chu mee atam pa na lut ranga jul hal kom mani na pak ka lut nea ang no ae.

²⁵Inn mitpu na inn kal ha kal su nutienga chu nangna inn kal awau wa ngirra am weta inn kal rei wa ah rillang che, ‘Arengpu kani ta rang inn kal hongpi oh!’ hana amo na hi sange nangta, ‘Keina nangta dang nonge hoija thou phao mo ti ha!’

²⁶Hana nangna hita sange, ‘Kani hulokka nachupi natakpi lei ah ani na bakha inn ha ha!’

²⁷Chuti weta amona woiha hita rillange, ‘keina nang hi hoija thou phao mo dang nonge ka am na hai thou wa thingjou oh hrano malmashi!’

²⁸Alo ta makhai natrap ang sa naha riella, Abraham, Isaac akha chu Jacob, hana Chungthieng rengram ma rouphu ngei ta nari jui ja, hana nang ta chu denga hou ang so ae.

²⁹Nasu natlak akha chu shaktieng hlang tienga malmashi ngei na phao weta Chungthieng rengram ma ba bakha rang ong ha ange.

³⁰Chuna juija chu rui nunga am ngei na masha ange akha chu masha ah am ngeina rui nung ange.”

³¹Hana lei apha ah Pharisis ahre na Jisu kolla phao weta makolla ril, “Nang hi amunt hina thou wa ram adanga shukka thing jou oh, roulam chu reng Herod na nangta that tange.”

³²Jisu na mani ta sang, “Nangei na thing weta ram ui ngei ta rillo: ‘Kei na dijabol ngei ta julla akha chu rai eja ta dampi ah awoni akha chu atuk phao am weta rungnie mathum nie ah ka tullu hi su ange.’

³³Chuti halkom keina awoni kom atukkom hana nathang ni ah ka lampi ah thinga ta sange, roulam chu rouphupa akha phao Jerushalem sunga thi ngei no ae!

³⁴“Oh, Jerushalem, Jerushalem! nangei na rouphu ngeita thatta, akha chu nangei tarang Chungthieng rouron ngeita alung denga! Arpinu na ate ngeita ahla rum sunga kulla shihekta shinum halkom nangei na chu ngeinum no ae!

³⁵Chuna anno nangei inn ha nangei kut chunga akaruksha ah hou phur sange keina nangei kolla diekka rillinge ha chu, ‘Chungtheing jaihra pi jo arengpu ming jung amoha ta’ nangei ril ma lim chu nangei na keita ripha nea ang ni jo weh.”