Read Chothe Naga LUK 16 Bible Online

LUK 16 - Chothe Naga bible

LUK 16

¹Jisu na marui ngei ta ril, “Apha akha ah achongpu spa akha na atujong kor akha ta manei madon lampa kutsilna ah, achongpu spa na halimpa pana ah am pa ta nangna sum limpa hi ariem salla houso ae.

²Chuna amo na amota kokveta ril, ‘Hina narou kathei ah am hi alo wa meh? Chuna sarukka nakolla am sum limpa ha hrabakta an weta pejou oh, nangna pana ngei ang nijo weh?’

³Akor hana matheichakka ril, ‘Ka mitpu na katullu hai thou wa chan pi ang ae so kei alota ae ang sha? Alei chau wa rol lang kom kajaitha am nonge, hana meekolla nieja rollang kam ajak sange.

⁴Atun chu ka ae rang dang sange! Katullu ha theng halkom, keita ariem lamtuk ang mee tonpi inn am mange.’

⁵Chuna mitpu na masum don limpata amona kokso. Amo na masha pa ta sai, ‘nangna mitpu sum eja don na che?’

⁶Amona sang, ‘kei chu siktui mant riha chak don inge?’ Amona sang, ‘hina am so ae nadon’ Shilrang pana ril, ‘ong weta som nga ae ta jiekka shi oh.’

⁷Hana adang akha ta amona sai, ‘Nang na chu eja donna am che?’ Amona sang, ‘Gehu hou lising akha borra don inge’ ‘hina am so ae nadon asum’ arengpa na ril, ‘ri ha rit ta jiekka shi oh.’

⁸“Chuna dramo am lou kor ha theija singa ma ae na sarukka marengpuna amota domso. Rouram chu awar sanao ngei ta hella simlei sanao ngei na mani taranga hella athei singe.”

⁹Hana Jisu na hata rilla am songe, “Keina nangei kolla rilla aminge: nangna hrano diek lao tullu jarra natonpi nasem ma amona mane nojuija chu manina nangeita atreem nei no amunt hana rui ah shi ange.

¹⁰Atujong akha na asiente ah tullu ma ngoiringa ngei lea chu alok tullu ma kom ngoiringa ngei ae atujong akha na asiente tullu ma lung thiengno lea atam tullu ma kon alung thiengne ang no ae.

¹¹Chuna sarukka nongei na dramo ah lou anei adon taranga ngoiring ngei lou mee lea atu na chu nangeita ahra anei adon ta pe ang meh?

¹²Hana nangei hi adang akha taranga ngoiring ngei no lea atu na nangei taranga nangeita pe anga meh?

¹³“Atu kor akha na mitpu anie ta rui chang nea no ae; roulam chu akha tana atier weta akha ta chu lungshi ange; anoleh akha taranga chu ngir pi weta akha taranga chu ngir num mang no ae. Nangei na Chungthieng akha chu anei adonta ranga rui chang ngai ang no ae.”

¹⁴Pharisis ngei na roulim hi theijuija mani na Jisu ta nuiso ae roulamchu mani ha sum leima dit jarra.

¹⁵Jisu na manita ril, “Malmashi ngei mit an na nangei thei chakka ahra sa ngei ae, chuti weta Chungtheing na chu nangei lung danga am meh. Roulam chu nalim pa hi mee ngei taranga chu lei ma tam amant tam meh. Chungtheing ningtienga chu ephao am no ae.

¹⁶“Moses na roukung akha chu rouphu ngei na jiekka shi chu, Johan Baptias hana apha phao te chakkae; hana hai thou wa Chungthieng rengram hina Ahra Rou hita rilla am meh, akha chu malmashi limpa ta nahana lampi ah lut no ngei no ae.

¹⁷Chuna sarukka jiek sha roukung sunga bindu akha mang ang saruk chu wan lea alei ram mangpa na lai tekkae.

¹⁸“Atujong spa akha na manamei hran weta adang nameita luhongleh chu simsi-bohrong ti ae. Akha chu mee hran namei hata anei spa hakom simsi-bohrong lal thing ti ae.

¹⁹“Apha akha ah achongpu akha am phur ae mapun choi dier choi hi leima amant tam ma senge hana nahani ah maring hi chu ta makhai ah hoija ringe.

²⁰Hana hitta mun ha ah ehekta sara spa Lazaras ti pa apan anum na shihakti pa achongpu inn mai ja ruija wak chak ti pa akha kom am phur ae.

²¹Hana ruija wakna lungrang chu achongpu pa doukang chunga tulla jung bu lem anlem te na awon hop ranga akha chu ui na kom matakka apat anum liek chak ti ae.

²²“Sara spa ha thija amo ta wanrui ngei na wanramma Abraham ningkolla ong ha rang ruija thingso. Hana achongpu pa kom thija alei ram ma phum so.

²³Sarmei kum sunga aol ana donga ma am na amunt hana thou wa aram lah ah Abraham ning kolla Lazaras onga am ripha so.

²⁴Chuna pa chu amo na kokso, ‘Apa Abraham! Keita ringrei ngei pi oh, chuna Lazaras ha sarmei kum ma olla ka am na mun na kut chal ta hana tui luppi weta kaleipar te ah daipi shu oh!’

²⁵“Chuveta Abraham na ril, ‘Angai len thei oh kasanaopa naring lei apha ah nataranga ahra eja pe so ae hana lei apha ah Lazaras chu hra no ngei chak pha phur ae chuna amo matak makna amunt hina ariem ma am ma ae nangna aol ana napha lei sunga.

²⁶Hi chak no wa anie karakko leima thuk kum akha kom am meh. Chuna sarukka hina kani am na ah atu jong akha na wa num hal wa nea no ae. Hana atu akha na kani am na mun na hai thou wa nea no ae.’

²⁷Achongpu pa na ril, ‘Apa Abraham nakolla nieja aminge Lazaras ta kapa inn na hla pi oh.

²⁸Hana kau-kanao ringa am meh, hana amo na manita tak shu oh mani na aol an amunt hina chak chu tungno shu oh.’

²⁹“Abraham na ril, ‘Na-u-nanao ngei ha rouphu ngei akha chu Moses hitta am ha ae manita rou ril ranga; na-u-nanao ngei ha mani ril ha jui ja ta ae.’

³⁰Achongpu hana sange, ‘Apa Abraham hana pel nonge! Athi sa ngei sunga akha na ringthou weta mani am na thing weta lea le-chu mani na pak hai thou wa lung hlong ange.’

³¹Abraham na ril, ‘Ejonga Moses akha chu rouphu ngei ril jui no lea chu mani na etikka kom athi sa ngei sunga akha na ril hal kom jui num mang no ae.’ ”