Read Chothe Naga LUK 17 Bible Online

LUK 17 - Chothe Naga bible

LUK 17

¹Jisu na arui ngei ta ril, Malmashi ngei hi pakka tul rang suino wa ahlem am mange, chuti weta eja ah ati pi mo nu pakka tulpi amo ha!

²Hijong asiante pak tullu ma pak ta pi ang saruk chu mataranga chu ahonga chakkari lung ren weta tuipi sunga denga houpa na hella hra tekkange.

³Chuna natullu lu ha min na an no! “Ejonga na u-nanao akha na pak tullu lu lea chu trongshi rillo, han ejonga amo na lung hlong lea chu ngakpi oh.

⁴Ejonga amo na nahani akha ah woi sari pak tullu nakolla ae lea chu amona alung hlonga woisari nakolla lea weta ko ngakpi oh ril lea chu amo ta ngakpi oh.”

⁵Arui ngei na Jisu kolla ril, “kani ngoiring hi rat pi oh.”

⁶Arengpu na ril, “Ejonga nangna antam muchi thapte nangoiring am lea chu nang na kabarang kung ta nangna nathei chakka atro tolla phoi weta tuipi sunga phun mo naril jui ange.”

⁷“Ejong nangei kar sunga akha na kor don na lou hui thing anoleh kelmo rungpi se weta ramma thou mahong juija nangna mabu bakka am lei ja ranga barro ta ril che?

⁸Nata ril no ae! Hana hutta makolla naril chu, kabu bak ranga su so ae chuna napun nani sem sa ah keita tun hlou ae pi oh. Kabak lei sunga kabak su nutienga nataranga bu hran na am mange?

⁹Kor hana matullu ae sarukka naril jui sarukka nangna amo ta ariem minge ta rilla che?

¹⁰Chuna sarukka nangei kolla pek trongsan lim pa ha ae su wa, ‘Ani chu matik chano kor, ani hi ae phung shuk tullu chak ae so ae ta nangei na rillo.’ ”

¹¹Jisu Jerushalem malampi tienga mathing juija amo na Samaria lea Galily apanga thinge.

¹²Mathing na husunga ae atipi ah untsha rai na asom spa ta aram lah hai thou wa ngirra am ripha.

¹³Hana mani na hita aou shukkae, “Arengpu Jisu! Kani ta ringrei ngei pi oh!”

¹⁴Jisu na mani ta rija ril, “Nangei takka thing weta thiempu ngei ta an pi oh.” Mani thingna lam ma mani ha dam so ae.

¹⁵Mani kar sunga akha na matak ma an juija damso ae. Amo na lea weta Chungthieng ta ariem sanrolla domso.

¹⁶Matak mathei chakka Jisu kae kunga bokka mokveta amota ariemma domso. Amo ha Samaritan malmashi ae.

¹⁷Jisu na ril, “Spa asom no meh dam pha ha chu, hoija am meh aku ahre chu?

¹⁸Alo sarukka ramdang sanao akha hina chak lea weta Chungthieng ta ariem minge ta ril meh?

¹⁹Chuna Jisu na makolla ril, “Thou jou oh; nangoiring jarra nang na dam pha so che.”

²⁰Pharisis ahre na Jisu kolla Chungthieng rengram hi etikka jung ang meh ta sai. Masang phur chu, “Chungthieng rengram chu ri chek-chekta jung ang no ae.

²¹Atu akha na rillang no ae, ‘Anno, hina amso weh!’ ah nolea, ‘hiso ae!’ roulam chu Chungthieng rengram chu nakolla am so ae.”

²²Hana Jisu na arui ngeita ril, “Meesanao pana jung ang rungnie ha nangei na rinum chau halkom rine no rungnie ha phao ange.

²³Nangei ta mee ngeina hita rillange, ‘Anno hako am so ae!’ ano lea, ‘hina am so ae!’ Chuti weta hana anthing rang shukka thingno oh.

²⁴Wochamplakna wan na mawar juija adang amunt tienga mawar pha nea hekta meesanaopa rungnie kom chu hekti ange.

²⁵Chuti weta masha ah aol ana eja pha ah awoni ah nangei mee ngei na kom nangta ngei num mang no ae.

²⁶Meesanaopa rungnie ah chu Noah apha hek ti ange.

²⁷Malmashi limpa na bakka inn na akha chu namei apa taichang lhakka Noah na kung sunga lut nie rungni phao wa tui lokka mani thit ha.

²⁸Hana jui ja chu Lot apha hekta. Malmashi limpa na bakka inn na pot lei ah jurra inn sha ah am mange.

²⁹Lot na Sodom hou wa mathing waitakka wan tieng hai thou wa sarmei na ru sur hekta junga mani limta that so.

³⁰Meesanaopa na rungnie hakom hi hek ta ripha ange.

³¹Nani rungnie hana chu atu mo akha na inn chunga am halkom tumma jungveta mapot la jung no shu oh; hahekta loupokka am mee na kom ma inn na lea ah an no shu oh.

³²Lot namei nu ta angei thei oh!

³³Atujong na maringchang tarang hal mee chu amang pha ange. Hana tujongna maringchang tarang hal no lea chu jaihra pha ange.

³⁴Keina nangei kolla rilla am minge nani rungnie ah chu kot chunga malmashi anie na jalla am sunga akha ta ruija thing ange akha ta na hou phur ange.

³⁵Namei anie na sangsu wa am mange akha tana ruija thing ange akha tana hou phur ange.”

³⁶(Loupokka malmashi anie na tullu lu ah amange akha tana ruija thing ange hana akha tana houphur ange.)

³⁷Arui ngei na makolla sai, “Hoija meh Arengpu?” Jisu na sang, “Hoiya amunt na hal athi sa ngei am na amunt na longkija kom pulla am mange.”