Read Chothe Naga LUK 20 Bible Online

LUK 20 - Chothe Naga bible

LUK 20

¹Nahani akha ah Jisu na athieng inn na malmashi ngei ta chupi takpi akha chu Chungthieng ahra rou samma am leija chungtekti thiempu Lea roukung ocha na Lamkai ahre hitta rachun na phao.

²Hana mani makolla ril, “Nangna ejong nane am ma hejong tullu hi lu ah am ma che? Atu na nangta hijong tullu lu rang roupe ah meh? Kani maikunga rillo.”

³Jisu na sange manita, “Keina kom nangei kolla rou akha kom saitikkae” naha keita rille.

⁴Johon na baptias ae pi tullu ha Chungthieng ningtienga mo anoleh malmashi ngei ningtienga mo?”

⁵Mani na mathei chakka hal hlak thou so. “Anina alota rillei sa? Ejonga anina Chungthieng ningtienga ae rilleh amona hita rillange, ‘chuleh chu nangei na Johon ta ngoiring no chou ae?’

⁶Chuti weta anina, ‘malmashi hai thou ae’ ta rilleh chu hina am wairol riha na anita alung deng ang roulam chu mani na Johon hi rouphupa akha ae ta ngoiring so ae.”

⁷Chuna pa chu mani na sange, “Kani na dang nonge hoi thou wa phao mo ti ha.”

⁸Hana Jisu na sang manita, “Keina kom nangei kolla rillang nonge ka lu tullu hi alo sarukka ae mo ti ha.”

⁹Hana Jisu na panteem hi mani ta ril, “Apha akha ah spa akha na darkha inkul akha ae weta malmashi adang akha kolla rungpi hakveta amona apha sot ta inn houphurra shukka thingso.

¹⁰Darkha ha lukkung apha wakjuija amo na masuuk makor ngei hla weta mapha phung shuk lukranga hla so. Chuti weta innkul runga am pa na manita phitta julla lea pi so.

¹¹Chuna pa chu amona adang kor hla ser so. Chuti weta woiha pa amona manita phitta leima ajak peh ah julla lea piser so. Ephao pe no wa.

¹²Hana amona woithum suna pa ah kor hla ser so. Runga am pa na alem akui shukpi ah denga hou so ae.

¹³Chunapa innkul mitpu na ril, ‘Alo ta kei na ae ang sa? Keina kasonaopa mak hla ang sange; chuleh chu manina atri ajakkange amota chu!’

¹⁴Chuti weta innkul hak pa na amota rijuija mani mashel rilhlakso. Hi chu innkul mitpu sanaopa ae ani na amo ta that ei oh, ‘chu lea chu ani na maram hi changpha ange!’

¹⁵Chunapa chu mani na that weta innkul wau wa denga hou so. Chu lea chu innkul mitpu na inkul hakka am pa ta alo ta ae ang sa ta Jisu na sai?”

¹⁶“Amo na phao weta mani lim ta thatveta akha chu innkul kom malmashi adang kolla pe ange.” Malmashi hana am ngei na rou hi thei juija mani na ril, “Naha shuk no shu oh!”

¹⁷Jisu na manita anveta sai, “Jieksha rou ha na rilna artha hi chu alo timeh? ‘Inn sapana ngeino ae ta ril alungha wulla eheilim karra amo na tieng hella marui oi tekkae.’

¹⁸Atujong akha na alung chunga tu lea chu amo ta atan, atan, tan ange; hana ejonga alung na atujong akha chunga dol lea chu wokphul changa mang ange.

¹⁹Roukung ocha ngei lea chungtekti thiempu ngei na Jisu ta mant ranga tullu thou so, roulam chu mani na dangpha so mapanteem hi ani ta rilna ae. Chuti weta mani na malmashi ngei ta atri ae.

²⁰Chuna manina tancha ahra hakka am meh. Mathei chakka ahra sa mee alung thieng sa lak rouron hre Jisu kolla hlaveta marou matronga chunga lutveta manina Raman sarkar ra ane angam ngeita pekrang hot na so.

²¹Na aru rouron ngei na Jisu ta ril, “Arengpu, kanina nachupi natakpi ha adiek makkae ta dangpha unge, nang chu eichang eioi nei no hana Chungthieng ningtienga adiek ha an weta chupi takpi che ae.

²²Kaisar rengpa kolla khasana kani pekhi pekphung shukmo anoleh kani pekhi adiek takjou meh?”

²³Chuna Jisu na mani lu tullu dangpha ah mani kolla Jisu na ril.

²⁴“Keita sum chui akha ri pi oh hana atu hina mel aming jiekka shi meh?” Mani na sange, “Kaisar rengpa.”

²⁵Chuna Jisu na sang, “Hra so ae, nangei na Kaisar rengpa ta ha Kaisar rengpa ta pe oh, akha chu Chungthieng ta ha Chungthieng ta pe oh.”

²⁶Manina mee ngei maikung hana Jisu ta mant ranga ephao ae nea no ae, hana mani na Jisu sang ha angak shukka dai tikta am so.

²⁷Saddusis ahre na Jisu kolla wa weta ril, athi sa ngei na ringthou ang no ae.

²⁸“Arengpu, Moses na kani taranga jiekka hou phur ae, ‘Atujongpa uleh nao akha na namei neiveta asanao don no ah amo ha thi lea chu manao ngei na namei hata nei weta mata pa taranga sanao donpi anga ae ta rilleh.’

²⁹Apha akha ah uleh nao sari amphur ae; ulien tekpa na namei nei phur weta asanao am mo ah thi so ae.

³⁰Ani sunapa anao pa na namei nu hata nei sier so.

³¹Hana innthum shupa anao pa na nei ah hahekta mani sari mak na nei weta asanao houphur no wa thi hapso.

³²Achana ah chu namei nu hakom thi so ae.

³³Atun chu, athi hai thou wa ringthou ang nie ah chu namei nu ha atu namei chang anga meh? Roulam chu mani sari mak hana namei chang phur ae?”

³⁴Mani ta Jisu na sang. “Atunpa ringchang hina chu nameinu ngei apa ngei na innpalla tuichang hlakkae.

³⁵Chuti weta athi hai thou ring thou ang matik cha mee snu spa ngei na phao angpa ringchanga mani ring rang chu taichang ti am mang no ae.

³⁶Mani ha chu wanrui ngei hek ti ange hana athi am mang no ae hana mani hata Chungthieng sanao ngei ae, roulam chu mani ha athi hai thou wa ringthou sarukka.

³⁷Chuna Moses na thiengvikta dangpi so ae athi hai thou maring hana apun sunga sarmei kang tamin sunga Moses na arengpa ta trongpi, ‘Abraham hina Chungthieng, Isaac hina Chungthieng, akha chu Jacob hina Chungthieng ae.’

³⁸Amo chu aring Chungthieng ae athi ha ah no ae makolla chu meelim pa na aring pha ange.

³⁹Roukung ocha ngei na trong ril shuk so, “leima hra ah sang so che Arengpu!”

⁴⁰Chuna sarukka manina lea ah makolla rou sai ang thanum thawak am nijo weh.

⁴¹Jisu na mani ta sai, “Alota mani na Messiya hi David sakai sunga ae ta rilla meh?

⁴²David amo mak na Psalm abai sunga thienga jiekka shi ae, ‘Karengpu na ril karengpa ta: Kaban chang tiengpa am na ah ongo

⁴³kai na nangta anda mee makhai ha nakae tro wa nachung malim ma ongo.’

⁴⁴David na amota ‘Arengpu’ ta kokkae hativeta alota Messiya hi David sanao chang anga meh?”

⁴⁵Malmashi limpa na marou ngei ja am ma Jisu na arui ngei ta ril.

⁴⁶“Roukung lamkai ngei ha cheksilla ammo, mani chu punchul hapveta lampi sorokka mee ngei na mani ta ajak atri leima dije mani chu malmashi atam maikunga hana synagogues sunga kom mani ong na lingno wa am pi num hana lochau malhrun na kom hra tek ti munna onga bak num meh;

⁴⁷mani na arongnu ngei inn lah weta akha chu malmashi ngei mai ja asot nei ae! Mani na hana aol saruk chu atri pi tek ti ae!”