Read Chothe Naga LUK 22 Bible Online

LUK 22 - Chothe Naga bible

LUK 22

¹Achol tolno badol reen lanpina ta dang apha nei ja wa ah,

²chungtekti thiempu akha chu roukung ocha ngeina malmashi ngei ta ati ae chuna sarukka mani na Jisu ta aruhan ta that ranga hot na ae.

³Chuna Judas Iskarot kolla saitan na lutso, amo ha arui asom ani sunga akha ae.

⁴Hana Judas na chungtek ti thiempu akha chu athieng inn sunga offisar ngei kolla ril ae mani kolla Jisu hi alota jur ang meh!

⁵Mant na amo ta ariem ma sum pe tukkae ta ngei so.

⁶Judas na ngei hlak nutienga ejongpa tancha ahra akha ah Jisu hi mani kut chunga malmashi ngei na nahana rou dang no lutta pek rang apha an thou so.

⁷Achol tolno budol reen rungnie sunga lanpina bu bakha ang kelmo that tang tienga.

⁸Jisu na Pitar lea Johon ta manui ni na ae rang rou hitta munt ha ah hla so. “Nanui na thing weta anina lanpina bak rang lim ha thourang ae thing hakko.

⁹‘Amunt hoija nangna di ah kanui ni ta sempi num cha mo ae ta manui na Jisu kolla sai?’ ”

¹⁰Jisu na sang, “Nanui na hata hupi sunga lut juija spa akha na tuibel ronna thing tuk hlak kange. Manu tienga juija thing weta malut na inn sunga hata latto.

¹¹Hana inn mitpu hata rillo, ‘Arengpu na nakolla rilleh. Karui ngei lea kanina lanpina bu bakha rang kah ha hoija am meh?’

¹²Amo na nangei ta ri pi ange achung tieng kah alok akha am mange, amunt hana nanui na eheilimpa tuk hlakange.”

¹³Manui na thing juija Jisuna manui ta ril makhai ha tukhlakso. Hana manui na lanpina bakha rang thourang ae thingso.

¹⁴Apha ha phajuija Jisu na ma am rang amunt doikunga ahal-rouron ngei hitta lutso.

¹⁵Amo na mani ta ril, “Keina ka ol matienga nangei hitta leima tam ma na lanpina bu hi bakha inn ha di inge!

¹⁶Rouram chu keina nangei kolla ril numinge, keina nangei hitta bakha inn ha pha angnijo ae, Chungthieng rengram pha ma lim chu.”

¹⁷Hana Jisu na tuidon choi weta Chungthieng kolla niek so. “Na hi nangei na lah weta nangei taranga sam hlakko.”

¹⁸Keina nangei kolla rilling atun hai thou wa keina nangei hitta mun ha ah Chungthieng rengram phao malim chu darkha tui inn ang ni ang ae.

¹⁹Hana woihapa amo na budol atan sar weta Chungthieng kolla niek ah budol atan, atan tan so. Akha chu manita peveta ril, “Nahi kapum ae nangei taranga pek sha so ae nangie na nahi na tullu lu oh keita ngai lea rang sa ae.”

²⁰Hahekta akha rukka tuidon kom budol baksu takka mani ta pe ah ril, “Na tuidon hi Chungthieng na athar ra chungnam weta pek sa kathee ae nahi chu nangei taranga peksa so ae.

²¹“Chuti weta an no! Keita jurra hou ang amo ha kei hitta doukang hina am ha ae!

²²Meesanaopa ha chu thi ah ta ae Chungthieng lungir sa ha nu juija, chuti weta eja ah atri pi mo nu amo ta jurra hou spa ha chu!”

²³Hana mani mashel sunga atujong akha na anikar sunga thing weta na tullu hi ae thing ang mo weta sai hlakthou so.

²⁴Arui ngei sunga trong jet hlak thou so mani kar sunga atu na loktek ta hal mo ae ta.

²⁵Jisu na manita ril, “Adang jati ah rengpa ngeina mani chunga mitpu ngei hekta tullu lu hana mani chunga tullu lu pi ngeita, ‘Mee ngei ta tonpi’ ngei ae ta kokkae.

²⁶Chuti weta nani chu hajong ah nao no ae; chuti weta, nani chunga lok tekti pana naopong hekta, akha chu lamkai mee hana rui sanao ngei hek tullu lu su oh.

²⁷Atu na loktek ti mo ae, ongveta bakka am pa lea ano lea amo ta bakpi innpi am pa ha? Ow ve, ongveta bakka am pa ae chuti weta nangei kar sunga chu bakpi innpi ah ae ah am chu kei inge.

²⁸“Chuna nangei chu ka-ol lei sunga kei hitta am ha so chau;

²⁹Pathieng na keita rengram pek chuhekta keina kom nangei kolla pe singe.

³⁰Nangei kom ka rengram ma kei hitta bakha inn ha pha ange hana nangei na Israel sakai asom ani chunga rourillanga phomlu chunga ong ange.”

³¹“Simon, Simon! Anno, saitan na nangei lim pa ta chang anranga rou lah so ve, hrano karra ahra am no rang, lou mee pana sangshi hran hekta.

³²Chuti weta keina nataranga neik ja aminge nangoiring ha nuleh no ranga Simon. Chuna nangna ka am na ah na lea jui ja nangna na-u-nanao ngei ta jaitha pe oh.”

³³Pitar na sang, “Arengpu, keina nathingna amunt chang honna raen-inn sunga hal akha chu nathit na amunt na thit ang inge!”

³⁴“Keina rilling, Pitar,” Jisu na ril, “Awoni jintienghi arhongpa na hung ang no ae nangna keita woithum dang nonge ta naril ma lim ma.”

³⁵Jisu na arui ngeita sai, “Nangeita sumhou tolno wa akha keabur tolno wa kahla jui apha ah nangei na ejongpa watta chau?” Mani na sang, “Ephou wat no weh.”

³⁶“Atun chu,” Jisu na ril, “Ejonga atu jongna sumhou am lea chu choijo oh; hana atu jong na chamsei am no lea malinglut jurveta leithingo.

³⁷Rouram chu nangei kolla keina rilla aminge abai sunga jiekka shi na ril, ‘Amo ha maral am ngei karra masing ten then so weh.’ Chuna keina nangei kolla rillinge nahi keina thungpi ange. Kasarukka jieksha ha atun chu pha ah wa so oh.”

³⁸Arui ngeina ril, “Anno! hina chamsai ani am meh arengpu!” “Hana ngei so ae! amona sang.”

³⁹Jisu na hupi houphurra mathing na chak ti mullon olive ah; hana arui ngei na kom amo hita thing ha.

⁴⁰Amunt ha mapha juija amona manita ril, “Niek ah am mo, chu na nangei ha ahlem na nea no rang.

⁴¹Hana amona alung denga hla alal na changa mamita houphurra ahuk hrun weta niek so.

⁴²“Amo na ril, “Pathieng,” Ejonga nahi nahal nalung aleh chu olla ka-am kakap hi lah pi oh. Kahal ano shu oh, chuti weta nahal hana tullu lu oh.”

⁴³Thangwan tieng hai thou wa wanrui ngei na makolla mel muh ah jaitha hap so machunga.

⁴⁴Alung tonga amona alung thienga niek ae; chuna ahlan tui tulla jung kom alei chunga chu athi hekti ae.

⁴⁵Niek ma am na mun hai thou wa marui ngei am na maleh juija ol happa inn hlakka am so ae.

⁴⁶Amo na mani ta ril, “Alowa inn hlakka am ma chau? Thou weta nie oh ahlem pa na nea no ranga.”

⁴⁷Judas na lamkai weta wairul riha na mani kolla tungphao Jisu tronga am song. Arui asom anie sunga akha na Jisu am na wa veta abe ah chup so.

⁴⁸Chuti weta Jisu na Judas ta ril, “Abe chuppa nangna meesanaopa ta jur so che nu?”

⁴⁹Jisu hitta am arui ngei na ejong pa shuk shijove ta ripha so, mani na Jisu ta sai, “Arengpu kani champ sai hi tol pi ang meh?”

⁵⁰Hana mani kar sunga akha na chungtekti Thiempu shuk kor akha hina akur changtiengpa tanso.

⁵¹Chuti weta Jisu na ril, “Na hina ngei so ae!” Chuna amona spa hana kur tonga dampi so.

⁵²Hana Jisu chungtekti thiempu akha chu athieng inn sunga offisars hana ulien changei amota mant wa eja kolla ril, “Hrano mee ta mant nang hekta nangei na mollo champ mo ta phao ah chau?

⁵³Rungnie chang honna keina nangei hitta athieng inn sunga am ha lei ah chu nangei na mant rang hotna no chao, chuti weta nahi apha so ae nangei taranga athim na rou choija jaitha pha ah nangei tullu lu ranga.”

⁵⁴Manina Jisuta mant na amo ta chungtek ti thimpu inn na rui ah thingso. Pitar na kom aram lah hai thou anu juija wa ae.

⁵⁵Inn tumai ah sarmei hlan weta manina ahul tunga ongna ah Pitar kom ong tolla am meh.

⁵⁶Meesuuk namei sanao akha na sarmei am na onga ma-am ri weta amona ma am na ah mun na an weta makolla ril, “Na spa hikom Jisu hitta am ha mee ae!”

⁵⁷Chuti weta Pitar na ngei no oh ril, “Namei, keina amota dang nange!”

⁵⁸Apha atante takka spa akha na dangpi sier so Pitar ta “Mani karrak sunga nangkom akha ae!”

⁵⁹Hana atente akha nutienga adang spa akha na makolla ril, “Ephao ngoiring no rang am no ae na spa hi Jisu hitta am ha houphur mee ae rouram chu amo hikom Galily mee ae!”

⁶⁰Chuti weta Pitar na ril, “Spa, keina dang nonge nangna rilla am rou ha!” Hata mani tronghlakka am lei ah arhongpa na hungso.

⁶¹Arengpu na ahul tunga an na rolla Pitar kolla munna anna Pitar na Arengpu na makolla rilphur ngeileh thei so. “Arhongpa na hung malim ma awoni jintieng hi nangna keita woithum ngei ang no che ti rou.”

⁶²Pitar na shukka thing weta alung kha ah tapso.

⁶³Jisu ta hakka am ngei na makolla phitta akha chu nuiso ae.

⁶⁴Manina Jisu ta mamit hlum ma rou sai makolla, “Atu na nangta phit mo ae rillan oh!”

⁶⁵Hana mani na leima tam ajak tukpi rang rou makolla ril ae.

⁶⁶Nie nu na shukjuija lamkai ahre chungtekti thiempu ngei akha chu roukung ocha ngei na bomtulla mani maikunga Jisu ta ruija wa pi so.

⁶⁷“Kani ta rillo,” mani na ril, “Nanghi Messiya ah che?” Amona sange, “Ejonga keina nangei kolla ril lea chu nangei na keita ngoiring ang no chau ae.

⁶⁸Hana ejonga keina nangei kolla rou sai lea chu nangei na sang ang no chau ae.

⁶⁹Chuti weta atun hai thou wa meesanao pa chu ineh-nepa Chungthieng ban changtieng pa ah onga am shijo ae.”

⁷⁰Mani lim pana ril, “Chuleh chu nang hi Chungthieng sanao pa che meh?” amona sange manita, “Kei ae ta nangei na ril so chau.”

⁷¹Hana mani na ril, “Kani na rou ngir tollang mee darkar am no ae! Kani na kanithei ah naril rou ha thei songe!”