Read Chothe Naga LUK 23 Bible Online

LUK 23 - Chothe Naga bible

LUK 23

¹Hana abom lim pana thou weta mani na Pilate maikunga Jisu ha ruiso.

²Mani na hita Jisu kolla neinunt pe thou so: “Kani na amo ta mant chu ani mee ngeita amona adanga lamkai ah mani kolla hita rilleh, Kaisar rengpa kolla tushal pe no oh akha chu mathei chakka keihi Reng Messiya inge ti ae.”

³Pilate na makolla sai, “Nanghi Jews ngei rengpa cha mo ae?” “Ha chu nangna rilso che,” ta Jisu na sang.

⁴Hana Pilate na chungtekti thiempu kolla akha chu wairul riha kolla ril, “Keina amo ta neinunt kapekkang jonga tuk nange.”

⁵Chuti weta mani na hella ane rang rou rilleh, “Machupi matakpi hana Judaea thouwa meelimpa ta ollangpi thou ae. Amona Galily hai thou, thou weta atun chu hina pha so ae.”

⁶Pilate na rou hi thei juija amo na sai, “Na spa hi Galily mee mo ae?”

⁷Amona Jisu hi Herod ram ma mee ae ta madang pha juija amo na Herod am na ah Jisu hi hlaso. Amo ha chu hana lei apha ah Jerushalem ma am meh.

⁸Herod na Jisu mel rijui ja leima ariem so. Rouram chu amona marou matrong mathei pha leima sot so ae hana apha eja matieng hai thou wa ri numma am meh. Hana mari num na chu Jisu na anealah ahre ae ha ri num ma ae.

⁹Chunapa chu Jisu kolla Herod na leimatam rou sai, chuti weta Jisu na ephao sang no ae.

¹⁰Hana chungtekti thiempu akha chu roukung ocha ngei manina maitienga sounna wa weta leima tam neinant Jisu kolla nont so.

¹¹Herod akha aral mee ngeina Jisu ta nuisho ah akha chu atri pi hita mun ha ah rou ajak ril, hana mani ahra punchul akha kom machunga wurpi weta Pilate kolla lea ah hla sier so.

¹²Nani rungnie hai thou wa Herod lea Pilate tonpi changso ve, hi matieng chu manui hi anshi anda hlakphur ae.

¹³Pilate rengpana chungtekti thiempu ngei lamkai ngei akha chu malmashi ngei ta bomtul ha ranga kok.

¹⁴Hana amo na manita ril, “Nangei na spa hi ka-am na ah rui ja phao wa amo hi malmashi ngeita lam adanga lamkai so ta nangei ril hi atun keina nangei maikunga amota chang ka anjuija keina makolla nangei neinunt pek hrano meethat meemant rang akha phao tuk nonge.

¹⁵Chuna Herod rengpa na kom mahratno na tukno jarra ani am na ah lea ah hla sier ah ae. Hana sarukka na spa hita athat rang ephao ma ae aral tullu am no ae.

¹⁶Chuna keina amota dandi ahre pe weta hla ang sange.”

¹⁷(Lanpina rungnie ah amona mani taranga dandi pha mee akha hla chakti ae.)

¹⁸Hana am wairul riha na aou shuk so, “Amota that to! Kani taranga Barabas hla pi oh!”

¹⁹(Barabbas hi meethat meemant akha chu hupi hana ollang sallang shukpi mee ae.)

²⁰Pilate na chu Jisu hi hla num meh, chuna amona malmashi ngei kolla angei lah ae.

²¹Chuti weta manina anungtienga aou wa hla ae, “Amota aban jamma thatto! Aban jamma thatto!”

²²Pilate na manita woithum suna pa ah ril, “Amona ejongpa hrano tullu lu shu jou meh? Keina makolla thija ngei mamaral ephao tuk nonge! Keina amota dandi peveta hla ang sange.”

²³Chuti weta manina ranga aou tek ka Jisu hi aban jamma that anga ae ta ril shukka atreem na ah chu mani aou hana maipakso.

²⁴Chuna Pilate na mani niek na juija hata ae ranga angei pe so.

²⁵Amona hajok sunga shi meethat meemant akha chu ollang sallang pi pa ta hla pi so. Hana Jisu ta mani dit na juija ae ranga mani kut chunga pe so.

²⁶Ralmee ngei na Jisu ta ruija thinga hata mani thingna ah Syreni ah Simon ti spa akha maram haithou wa hupi ah phao tukhlakso. Hana manina mant weta Jisu khross machunga shiveta Jisu nungtienga ron pi ah thingso.

²⁷Leima tam warui rul riha na manutieng juija, mani kar sunga namei nu ngei na chu Jisu tarang tappa alung olla am.

²⁸Jisu na manita nu lea ah an weta ril, “Jerushalem ma am namei ngei oh. Katarang tapno oh, chuti weta nangei sanao ngei taranga akha nangei taranga.

²⁹Rouram chu malmashi ngei na trong shuk kang rungnie akha phao ange, ‘Nao am no ngei hi eja ah jahra meh hana naosan don no ngei ha. Hana naosan jokno ngei ha!’

³⁰Hana malmashi ngeina mullon oh kani chunga dolla jungo kanita bi pi oh ta ril shuk kang apha phao ange.

³¹Chuna thing ring ta hajongpa tullu lu lea chu, thingkang chu ejongpa shuk kang meh?”

³²Mee hrano meethat spa ani ta kom mani kar sunga ruija shukveta Jisu hitta manina that.

³³Manina, “Alu Suru” ti amunt pha wakjuija manina Jisu ta aban jamma that hana hrano meethat rel kom. Akha na maban changtienga akha pana aban uitienga.

³⁴Jisu na ril, “Pathieng manita ngakpi oh! manina ejongpa tullu lu mo dang pha no ae.” Hana arengpu linglut ha mani na ther weta rawon na sam meh.

³⁵Malmashi ngei na ngirveta anna am meh. Jewish lamkai ngeina nuiso na nei ah ril, “Mee ta chu amona sanne ae; amo kam matak na matak ta kal shu oh, ejonga amo hi Chungthieng na halsa Messiya makleh chu!”

³⁶Ralmee ngei nakom nuiso tolla ma am na kolla wa weta athur ju tui pe ae.

³⁷Hana ril, “Nongna Jews ngei rengpa makleh chu nathei chakka kallo.”

³⁸Machunga trongsan na jiekka shi ae “Nahi Jews ngei Rengpa ae.”

³⁹Hai ah shi hrano meethat hana amo ta ushit no wa nuisho wa ril, “Nang ha Messiya no wa cha meh? Natak ta kal weta kanui ta kom kallo!”

⁴⁰Hana adang akha na chu trongraan ah makolla ril. “Nangna Chungthieng ta ti no che? Nangna mathit pha hekta nathit hi.

⁴¹Anui na pha chu routakka pha phung shuk pha ah ae rouram chu anui lu na tullu anu juija; chuti weta amo chu ephao aral am no ae.”

⁴²Hana amona Jisu ta ril, “Rengpa changa najung juija keita angailen pi oh de Jisu!”

⁴³Jisu na makolla ril, “Awoni keina nakolla soro ei inge hachu nang hi Paradise ah kei hitta am ha ange.”

⁴⁴Apha asom ani tulso ae hana nienu na mawar war no wa simlei lim ta athim na hunna apha inn thum tulphao ah.

⁴⁵Hana athieng innsunga banga shi pun kom ajai ja therra ani shukso.

⁴⁶Jisu na arol kalla aou shukkae, “Pathieng! Kamuihla hi nakut chung pe singe!” Amo na natrongsan hi ril weta thi so.

⁴⁷Ralmee offisar na shukka am eheilimpa ripha ah, Chungthieng ta dom ma, hita ril, “Adiek mak kea amo hi ahra spa ae!”

⁴⁸Hana ranchon na an na am malmashi ngeina shukka am eheilimpa ripha ah mani inn lam ma atang benga alung olla lea so.

⁴⁹Jisu ta matak makna hrabak ta dangei hana Galily hai thou wa manutieng jui ja hong namei ngeina aram lah hai thou wa an na am meh.

⁵⁰Judiah hulok Arimathiah ah Josep ti spa amo ha chu ahra mee hana ajak atri sak mee ae amo ha chu Chungthieng rengram jung ang apha hakka am spa akha ae. Amo kom mani ulien changei karra tolla rou ril mee halkom mani lungir na ah ngir tolno ae hana mani lu tullu kom ngei no ae.

⁵¹

⁵²Amona Pilate rengpa am na thing weta Jisu Khrista pum ta niek ranga thing.

⁵³Hana amo na Jisu pum ha choija tum weta pun anal ahra takka hlumma ahir alunga hakka sak hlanhur atu akha phao phum no na ah phum so.

⁵⁴Nani rungnie ha chu erainie ae sabbath rungie kom leima neiso ae.

⁵⁵Galily haithou wa Jisu nungtieng juija phao ngei na Josep hitta thing ha ah alo ta Jisu ta hlan hur sunga phum mo ti ha ripha so.

⁵⁶Hana manina inn lam tienga lea weta ariem ahoi siktai eja Jisu pum not ranga semsa thingso. Roukung anu juija mani na Sabbath nie chu solhlaso.