Read Chothe Naga LUK 24 Bible Online

LUK 24 - Chothe Naga bible

LUK 24

¹Leima angal apha lameiching nie nitukka namei ngeina hlan kunga mani semsasa ariem hoi siktui ron weta thingso.

²Hlun hur lut na sumlung ha chu letta am hakka tukhlakso.

³Chuna mani na lut juija arengpa Jisu hina pum ha ri pha nijo.

⁴Manina hina taranga ae rang dang thei no wa ngirra am ma, edang dangno wa ehekta ade awar pun setveta spa ani mani am na ngir so.

⁵Namei nu ngei na ati na shihakta alei chunga mok so. “Ejaranga nangei na athi ngei kar sunga aring mee ta junga am ma chau?

⁶Amo ha hina am nijo ve, Amo ha ringthou so ae. Galily ah ma am lei ah nangei ta maril phur ha angei theino chau.

⁷‘Meesanaopa ha pakchel ngei kut chunga pe ange, hana aban jamma thattange, hana rungnie nathum nie ah ringthou ange.’ ”

⁸Namei ngei na marou ha angei lea so.

⁹Hlan kung hai thou wa lea weta arui asom akhata nalim pa hi takso, hana adangei ta kom.

¹⁰Namei ngei ha chu Mary Madalini, Joanna, akhu chu Jacob manu Mary; Mani hitta thing ha namei adangei na na rou hi ahal-rouron ngei kolla takso.

¹¹Chuti weta ahal-rouron ngei na hita halleh, na namei nu ngei na ril hi apang ngei ae, hana mani na manita ngoiring no ae.

¹²Chuti weta Pitar na thouveta hlan kunga tanna thignso. amona akong unt weta ma an juija anal pun ahlum na ah no wa ephao ri no ae, hana amona inn na lea weta shukka am hata leima angak shukso.

¹³Nani rungnie makka Jisu nutieng jui mee anina Jerushalem hai thou kilometres asom akha aram lah Emmaus hu wa thinge.

¹⁴Hana manui na shukka am rou ha manui na trong lam ma thing.

¹⁵Hata manui na tronghlakka halhlakka manui thing jui Jisu kom manui ta leima nei ah wa ah manui hita thing ha so.

¹⁶Manui na amo ta ripha halkom alo ta mo manui na amota mel dongpha nea nijo ve.

¹⁷Jisu na manui ta ril, “Nanui mashel ejongpa rou ah nanui thinglam ma tronga chau?” hana manui na aol mai muh ah ngirso.

¹⁸Manui ani sunga Cleopas ti pa akha na Jisu kolla sai, “Nang hi Jerushalem ma meethar ah cha meh. Atunlei rungnie sunga shukka am rou ha nangna dangno wa cha meh?

¹⁹“Ejongpa shukka meh?” Jisu na sai, manui na sang, “Nazareth ta Jisu kolla shukka am rou ae.” “Na spa hi matullu ae marouril eheilimpa hi malmashi ngei na akha chung Chungthieng na kom Chungthieng rouphupa ae ta ril hlakkae.

²⁰Ani chungtekti thiempu ngei na akha chu ane tullu ngeina amo ta athit ranga pe ah amota khrose chung aban jamma that ae.

²¹Hana kani na amota hal chu amo hi Israel ngei ta sanpi pa ange ta! Hana chunga na rou lim shukhi awoni hitta rungnie nathum shu so ae.

²²Kani kar sunga namei abom ahre na mahlan kunga thingei na angak shukkae.

²³Manina mapum ha tukno wa mani na lea juija mani na hita rilleh mani na ri ah wanrui na hita rille amo ha ringthou so ae.

²⁴Kani bom kar sunga kom ahre na hlan kunga thinga namei ngei na ril makha routakka shukso chuti veta manikom amota ri no ae.”

²⁵Hana Jisu na manuita ril, “Eja ah lungmo meh nanui, alota haja nalung thilla Chungthieng rouphupa na ril phur eheilimpa ngoiring no the chau!

²⁶Messiya na aol ana hi pha weta hana amona ahung ajai pha ang no meh?”

²⁷Akha chu Jisu na manui ta hrabakta takpi so, abai sunga jieksha na mataranga alo ta ril meh, Moses na athou na hai thou jiekka shi hana Chungthieng rouphu ngei na jiekka shi.

²⁸Manina luttang husung neija wakjuija Jisu na chu aram lah tekka thing ang ae ah.

²⁹Manui na amota lea rang rou ril, “Kanui hitta am ha jou oh; semnie tah ang nei so chuna thiem manga ae wa so ae chunapa chu amona manui hitta am ha so.

³⁰Amona manui hita bakha rang mani kara ong tolso. Hana budol choiveta therra jaihra pe ah mani ta amo na pe so.

³¹Hana mani mit manga manina amota mel dangphaso chuti weta amo na mani am na thou mang so ae.

³²Mani mashel rilhlakso, “Amona ani ta trongthou lei ah sarmei kung hekti no meh lampi ah thingha lei ah ajieksha abai sunga anita takpi ha?”

³³Manui na thouveta Jerushalem tienga lea so ae, hana manuina arui asom akha rachon na mee adang ngei hitta mun ha ah.

³⁴Hana ril, “Arengpu ha ringthou so ae! Amo na Simon kolla kom ri pi ae!”

³⁵Hana manui ani na lampi ah alo ta shuk mo ti ha kom takso. Hana amona budol ther juija alota manui na mel dang mo.

³⁶Spa ani hana mani maikunga na rou hi rilla amlei ah edang dang no wa Jisu matak mak mani karra ngir weta mani kolla ril, “Nangei kolla adai chang shu oh.”

³⁷Mani na atri hai sulla hi thimplop ri range ta hal so.

³⁸Chuti weta amona mani ta ril, “Alowa nangei na lung olla chau? Alo wa nalung sungu hajong chingna ah chau?

³⁹Anno kakae kakut nangei rijuija keimak no meh, kei makkae ta hallo, hana nangei danga am ha ae thimplop na asaru atak am no ae keita nangei ri hekti no ae.”

⁴⁰Rou hi amona rilla makae makut manita ri pi so.

⁴¹Chu phao sunga manina ngoiring no ah am hal kom ariem na shi hakti akha chu angak shukka amlei ah Jisu na manita sai, “Hina ngei kolla abakkang inn nang ejongpa am chau?”

⁴²Manina tuiriek aro sa atan akha peso.

⁴³Amo na mani maikunga lah weta bakso.

⁴⁴Hana amo na manita ril, “Na hi ae kei na eheilimpa nangei hitta ka am ha lei ah karou karilha Moses na kom roukung abai sunga jiekka shi sa so ae, hana Chungthieng rou phupa ngei na jieksha ha akha chu Psalm sunga jiek limpa adiekka tung rang ae.”

⁴⁵Hana mani lung thong honga jiek sha rou ha lungkim thei so.

⁴⁶Hana mani kolla ril, “Na hi jieksha ha ae. Messiya na aol donga thi ange chuti weta rungnie innthum nu tienga ringthou ange.

⁴⁷Akha chu maninga lunghlong ranga pak silpi ranga rouril ngei na lam chang honna rou choi ah, Jerushalem thou ange.

⁴⁸Nangei na hi limpa hina saro ei tah ae.

⁴⁹Akha chu kei katak makna pathiengna keita saro ei nu juija nangei tah keina hla ange. Chuti weta nangei na hupi hana hakka am mo chungtienga jaitha akha na nangei chung jung malim ma.”

⁵⁰Chuna amo na mani ta hupi hai thou rui ja shukka Bethany phau ah, hana amona makut don weta manita jaihra bo pi so.

⁵¹Amona manita jaihra pe ah am lei ah amota thangwanna rui ja kalla hranphur so manita.

⁵²Manina amota mokka Jerushalem tienga lea so, ariem na shi hakta.

⁵³Akha chu mani apha limpa athieng inn sunga am ma Chungthieng ta riem ma domso.