Read Chothe Naga LUK 4 Bible Online

LUK 4 - Chothe Naga bible

LUK 4

¹Jordon hai thou wa Jisu hi muihla athieng na shihakta maleh juiya Muihla na amota ram rukka rui so.

²Hana amota rungnie somly hrano muihla na hlemma, na rungnie lei sunga ephao bakno inn no. Hana atreem ang tieng chu amo hi vontam thouso.

³Hrano Muihla na amota ril, “Ejonga nang Chungthieng sanaopa lea chu, na alung ngei hi budol changrang rillo.”

⁴Jisu na sange, nahi jieksha ae, “Nalmashi ngei na budol chak bak weta ringno ae.”

⁵Hrano muihla na amota chungtekti amunt akha ah lamkai ah thing weta simlei chunga ram lim ripi so ae.

⁶Hana amo na makolla ril, “Keina mangta nalimpa hi nakut chunga pe ange nahi ka kut chunga pek sa so ae, chuna atu mo tieng kapek num mee akha ta keina pe nea inge.

⁷Chuna nangna kei ta mok ta lea chu na lim pa hi natarang ae.”

⁸Jisu na sange, “Nahi jieksha so ae, nangna narengpa Chungthieng ta chak mok weta matun mahlou dom su oh.”

⁹Hrano muihla na Jerushalem ma chungtekti athieng inn chunga ngir pi ah, “Ejonga nangna Chungthieng sanaopa ta lea chu nathei chakka chomma hina hai thou tummo, amo naril.

¹⁰Roulam chu jiekka shi so ae, ‘Nataranga Chungthieng wanrui ngei nangta san ranga trongsan pe ange.’

¹¹Hita ko rilla shi ae, ‘Manikutta nangta domma shi ange chuna nakae ah alung theng pi ang no ae.’ ”

¹²Jisu na sang, “Jiekka shi sha na ril, ‘Nangna narangpu Chungthiengta chang anno oh.’ ”

¹³Chuna mahlem manglim sunutienga tan cha akha phamalim taranga hrano Muihla na arengpu am na haithou shukka thingso.

¹⁴Muihla athieng jaitha ha makolla am ma, Jisu na Galily ah lea so. Chuna marou hi ram sanglim ah.

¹⁵Synagogue sunga machu pi hi meelim na amo ta dom so weh.

¹⁶Malok mashei hangna Nazareth ta amona thinga Sabbath rungnie ah mani talit nujuja synagogue ka lut so. Hana amona ngir thou weta athieng rou ril pha so.

¹⁷Akha chu rouphupa Isaiah abai ha makut chunga pe so ae chuna abai ha hong weta jiekka shi sa roumunt akha tukso.

¹⁸“Arengpu muihla athieng na kakolla am meh, roulam chu amo na kei ta sara ngei taranga routhar sam rang hal pi so ae. Hana amo na hajook sunga am ngei ta kom hla ranga keita hla so ae hana mitcho ngei ri pi ranga; athuiya dolla shi ngei ta phong ranga.

¹⁹Arengpu na mamee ngei ta san ranga apha neiso ae ta dang pi ranga.”

²⁰Chuna abai ha hlep sier weta hana am meeta lehpi weta amona ong so. Chuna synagogue sunga am malmashi lim mit na amota ann so.

²¹Hana amona manita hita ril thou so. “Awoni nangei thei rou chu jiek sha abai hi adiek ka shuk so ae.”

²²Chuna mani na ahra marou matrong rilhlakka arengpu mur hai thou lungshi trongsan hana manina ngakka rilleh, “Amo hi Josep sanao pa no mo ae?”

²³Hana amona manita ril, “Suinowa nangei na keita na pramant hi ril ange, ‘maipa nang dam mo.’ Hana Kapharnahum ma na ae kani thei chu hekta nahu mak hina kom aeyo.”

²⁴Chuna arengpa na ril, “Keina nangei ta adiek takka rillinge, Chungthieng rou sam ngei ta atu akha na phao maram sunga mee na riemtuk num no ae.”

²⁵“Hana keina routakka nangei kolla rillinge Elija apha ah kum inthum hla ruk thangwan thinga simlei chung ehekta bu tang utang shukka Israel ngei hi atam pa arong chang hom meh;

²⁶Chuphao sunga atu akha na Israel karra Elija ta hla no ae. Chuti weta Sidon ram ma Zarephath arongnu na chak hla ae.

²⁷Akha chu Elisha rouphupa mapha ah kom Israel sunga raichi ehekta am hom meh, chuti chun atu akha phao dam no ae Syrian Naaman chakke.”

²⁸Synagogue sunga am malmashi lim na rou hi thei jui ya lungsha so.

²⁹Mani lim na ngir thou weta amota hulok hai thou ruiya shukka mani hulok sak rang mullon na ruiya kalso, mani ae chu amo hi ahai rakotta luiya hla ranga.

³⁰Chuti weta amo chu mani kar sunga lenga hata malampi ah thingso.

³¹Kapharnahum Galily hulokka amona tumma jung weta Sabbath rungnie ah malmashi ngei ta chupi takpi thouso.

³²Machupi matakpi rou hi mane-matik tolla mani lim na angak shukso.

³³Synagogue sunga hrano muihla dijabol na lut spa akha am meh, amona sanrol shukka au weh.

³⁴“Kani ta ejongpa di ah cha meh? Nazareth ta Jisu. Naphao hi kanita thugai anga che? keina nangta dang unge atu mo ti ha, Chungthieng hina rouril mee ae!”

³⁵Jisu na ril, “Lang no oh!” makolla hai thou shukko!” chuna mani lim maikunga spa hata denga hou phurra alim akai am no lutta shukka thingso.

³⁶Malmashi lim pana ngakka akha lea akha ril hlakkae, “Hahi eyongpa rou ah sa? Ane jaitha akha tolla hi spana hra no muihla ta kom shukranga trongsan ril nea hi, hana manna shukka thing!”

³⁷Chuna routhar hi mani ram sunga ahul tunga thangso.

³⁸Jisu na Synagogue hou phurra Simon inn na thingso. Hana leiya Simon mapi chu atrun nokka am meh, chuna mani na Jisu kolla ril.

³⁹Chunapa chu Jisu na thinga mapanga ngir weta hitta ril atrun nok mak nang makol hei thou dam oh rilpa chu atrun nok ha damsho, hana amoha thou ah mani karra hak tol sho.

⁴⁰Semnie na lut su takka malmashi ngei na Jisu kolla adang adang rai eja rui phao wa Jisu na mani chunga makut shi weta dam pi so.

⁴¹Chu-chunga hrano dijabol na kom mee ngei hai thou shukka Khrista chu Chungthieng sanaopa ae ta rol shukka au wa shuk so. Chuti weta Jisu na hrano muihla ngeita trongno ranga rou ril ae, roulam chu manina amoha Messaiah ae ti hi dange.

⁴²Hu war juiya Jisu na adai ram munt akha ah shukka thingso. Chuna meelim na chu amota jonga jonga ma am na phao weta mani am na hai thou shukka thingno rang hamma shi num meh.

⁴³Chuti weta amona ril, “Kei hi Chungthieng rengram ahra rou trong hi hullok adanga kom ril thing ange, rouram chu keita hana taranga hla ae.”

⁴⁴Chuna ram sunga am Synagogue amunt chang honna rourille.