Read Chothe Naga LUK 5 Bible Online

LUK 5 - Chothe Naga bible

LUK 5

¹Jisu na Gennesaret tuikum hou wa ngirra Chungthieng rou rilla malmashi ngei na marou ngei num ma makolla julla wahom leija.

²Amona tuikum sunga kung ani am ri so, chuti weta kung sunga tuiriek mant mee chu mani len sella kung sunga am no ae.

³Jisu na Saimon kungsunga lut weta, tui hou wa kung ella wakranga rilla Jisu na kung chunga onga wairul riha ta chupi takpi thou so.

⁴Jisu na rou ril su takka, Saimon kolla ril, “Kung hi tui athuk tienga ella lut oh, hana nanui ani na len ha tuiriek mant ranga dengo.”

⁵Saimon na sang, “Mitpu, janjei shotta kanuina ephao mant nea no ae, chuti weta narou anu juija kei na len hi deng ang singe.”

⁶Manui na len denga tuiriek haja matik tolla len ha ther ang ae so.

⁷Chuna adang manui tonpi ta sanpi rang kokka atronpi ngei na wa weta sanpi so, hana kung animakha tuiriek na shihak ti ah kung animak tui sunga luttang ae so.

⁸Saimon Pitar na shukka am hi riveta Jisu maikunga huk hrun weta mokka ril, “Ka am na hai thou wa thingo Arengpu! Kei chu ehekta jaishi spa inge!”

⁹Amo akha chu adang makolla amtol ngei na haja matik tam tui riek mant ri weta angak shukso.

¹⁰Chuhekta Zebedee sanao rel Jacob lea Johon manui ha Saimon tonpi ae, hana Jisu na Saimon ta ril, “Hina sarukka ephao atri no oh, nang mee mant mee chang ang so che.”

¹¹Hana mani kung ha tui hou wa choija wakjui ja manina eheilimpa houphur weta Jisu nutieng juiso.

¹²Jisu na hulok akha ah amlei apha ah raichi spa akha na phao ah Jisu mel mari juija amai alei tienga hai weta hita ril, “Arengpu oh ejonga nangna ngei pi lea chu keita nang na thiengpi nea che ae.”

¹³Chuna Jisu na makut dok shuk weta makolla tonga ril, “Ngeipi sange; thieng jou oh.” Hana apha makka raichi na makolla houphurra dam so.

¹⁴Jisuna makolla hita rou ril, “Atu akha kolla rilno oh; Chuti weta jang nga thiempu kolla, hana amona nakolla an su oh, chuna meelim kolla nangha hra so ae ti dang su, Moses na trongsan pek hekta rithoi Dorh peh shukko.”

¹⁵Chuti weta Jisu rou hi ram lim ma thanga wairul riha na makolla phao weta rou ngei ah mani rai eja kom dampi ae.

¹⁶Chuna Jisu na athei chakka nie ranga ram rukka thingso.

¹⁷Rungnie akha ah Jisu na machupi ah amlei ah. Galily ram husung chang honna Pharisis lea roukung ocha ngei akha chu Judiah hana Jerushalem hai thou phao ngei kom aning kolla onga am meh.

¹⁸Malmashi ahre na pum ahui athisa kut chunga ruija phao ah mani na Jisu am na inn hana rui lutta Jisu maikunga shi num ae.

¹⁹Chuti weta wairul riha ban ma-am sharukka mani na amota ruilut rang lam tuk no ae. Chuna mani na inn chunga kalweta chek ahre la ah ahur ongpi ah Jisu maikunga makut chunga jalpi ah hla so.

²⁰Jisu na mani ngoiring ri weta spa, “Kolla amona ril, tonpi oh, napak ha keina silpi sange.”

²¹Chuna Pharisis lea roukung ocha ngei na hita Jisu kolla saithou so, “Na spa hi atu meh hijong plouril hi! Chungthieng ano wa chu atu akha na pak silpi nea am no ae?”

²²Jisu na mani lunghal ha dangpha juija anona manita ril, “Ejeranga hajong lunghal nangei lung songa sanga chao?

²³Hoipa rilna leitek kang sha, ‘napak silpi sange’ ah no lea, ‘thou weta thingo?’

²⁴Chuna keina nangei kolla meesanao pana aleiram ma pak silne jaitha am meh ti hi dang pi ang inge.” Amona pum ahui athisa spa ta hita ril, “Keina nakolla rilla aminge, thou wo hana nakotchung choi weta na inn na thing jou oh!”

²⁵Hana apha makka amona mani maikunga thou weta majalna kotchung ha ma inn lam tienga choi weta Chungthieng ta dom so.

²⁶Mani limpa angak shukka Chungthieng ta domma mani lungsunga kom ati ah ril, “Awoni ah kani mitta eja ah angakpi akha ripha unge!”

²⁷Hina nutienga Jisu na shukka thinga khasana hrai ngei office ah Levi onga am riphaso. Chuna Jisu na makolla ril, “Kanutieng juijo.”

²⁸Hana Levi na eheilim houp hurra thou weta Jisu nutieng jui so.

²⁹Chuna Levi na ma inn sunga ehekta alok lochao ah ehekta tam khasana hrai eja na kom ma am na karra baktol ha ae.

³⁰Hana Pharisis ngei lea roukung ocha ngei na marui ngei kolla manilung sunga pelno ah ril, “Alo sarukka nangei na khasana hrai ngei lea jaishi ngei hitta bakha inha ah chao?”

³¹Jisu na manita sang, “Atujong pum ahra ngei tarang doctor darkar am no ae, chuti weta pum hrano ngei tarang sa ae,

³²hina kaphao hi dramo chel ngei taranga no ae pakchel ngei ta shilung hlong ranga ae.”

³³Hana manina Jisu ta ril, “Johon hina rui ngei chu marak marakka bu hai weta nie, hana Pharisis ngei rui nakom ha hekta ae chuti weta narui ngei chu bakka inn na am meh.”

³⁴Jisu na sang, “Taichang nie ah aphao atronpi ngeina taichang angpa na mani hitta am ha lei lim ma bu hai ah am ange ta halla chao? nahi uithukno ae.

³⁵Chuti weta nahani akha chu phao ange taichang angpa ta mani kar hai thou ruija thing ange, hana juija mani kom bu hai ange.”

³⁶Jisu na manita na panteem hi kom rile, “Atu akha na pun athar atan ther weta pun alui chunga bal no ae, ejonga amo na ae lea chu pun athar ha ther weta pun athar ra bal ae, hana pun lui ha chu ajon kom ano ae.

³⁷Atu nakom darkha tui athar ha savunt hou alui sunga thalno ae, atu jong na darkha tui athar ha thal lea chu savunt hou ha tittange, chu na darkha tui ha leija hou ange.

³⁸Hana saruk chu athar darkha tui ha athar savunt hou sunga sunge!

³⁹Chuna asotta shi darkha tui inn su nutienga athar darkha tui inn num no ae, rouram chu ‘asotta shi darkha tuina tuitek kae,’ amona ril.”