Read Chothe Naga LUK 9 Bible Online

LUK 9 - Chothe Naga bible

LUK 9

¹Jisu na asom ani aruita kokveta hrano dijabol ta julla hla nea rang akha chu rai eja ta dampi rang jaitha manita bomtulpi weta pe ae.

²Hana Chungthieng rengram taranga rouril thingo akha chu ana asa ngei ta dam pi oh ta hla ae.

³Rouhi ril su nutienga nangei lampi thing juiya ephao choi ngei ang no ae, chuna ramhai taranga molbuk halkom nahoukom, budol kom, sum kom hana linglut phao ani su wa choi no oh.

⁴Ehalkom nangta ariemma kokna inn sung hana hulok ha houphur ra nathingma lim hata am mo.

⁵Mee ngei na nangei ta ariemma kok num no lea chu nangei honghuppa vokphul kopphao tha ah hulokha ranga thingo.”

⁶Arui ngei na houphurra, thing weta husung chang honna ahra trongsan rourilla akha chu ana asa amunt eja ah mee ngeita dampi.

⁷Galily ah reng Herod na shukka am eja lim pa matheipha juija malungrang shuk thei ni jo. Rouram chu Johon Baptias ha lea ringthou so ae ta meelim pa na rilhlak sha rukka.

⁸Adang ahre na chu hita ril hlak kae, Elija wolha pa ringso ae, hana adang ahre na chu amatienga rouphupa akha ring thou so ae.

⁹Chuna Herod na ril, “Keina Johon chu ahong tan su sange. Chuti weta hijong kathei ah ka-am rou spa hi atu mo nu?” Chuna amo na Jisu ta ri num ma ammeh.

¹⁰Arui ngei na lea weta mani lu tullu lim pa ha Jisu kolla ril. Chuna amona manita rui weta Bethsaida hulokka manithei chak thingso.

¹¹Wairul riha na mani hina rou thei ah manutieng juiso. Chuna mani lim ta Jisu na ariemma kokveta Chungthieng rengram hana rou rilla atujong darkar am mee ta ana asa kom dampi.

¹²Chuna ninu na luttang wakjuija arui ngei na ma am na ah wa weta ril. “Na malmashi ngei hi mani hu-wa julla hla jou oh rouram chu hina mani na am weta bakrang jalrang hija ram ala hina pha nea ang no ve.”

¹³Chuti weta Jisu na manita ril, “Nangeina manita ejongpa ahre te chak halkom bakrang pepi oh.” Mani na sangso. “Kani don thei te chu budol ranga lea tuiriek ani chak kae, mani lim pa taranga kani na thing weta leipi num ma che nangna?”

¹⁴(Hana mani ha spa chakka lising ranga ae.) Jisu na arui ngeita ril, “Mee ngei ha som nga, som nga bomtulla ongpi ha oh.”

¹⁵Arui ngei na naha ae su juija,

¹⁶Jisu na budol ranga akha chu tuiriek ani la ah wantinga hai ah Chungthieng kolla nie ah mani ta samma arui ngei ta mee ngei kolla sam ranga pe.

¹⁷Mani limpa na awon hoppa baksu nutienga mani houphur alim ha arui ngei na taidon asom ani shuk so.

¹⁸Nahani akha ah Jisu na athei chakka nie ah ma leija arui ngei na makolla wa ah, “Amo na arui ngeita sai wairul riha na chu keita alo ta ril mo ae?”

¹⁹Ahre na chu Johon Baptias ae ta ril ae hana ahre na chu Elija ae hana lei sunga ahre na chu apha eja matienga rouphupa ngei ha lea ah ringthou ae ta ril.”

²⁰Jisu na manita sai, “Nangeina chu keita alo ta rilla chau?” “Nang chu Chungthieng hina Messiya ae ta Pitar na sang.”

²¹Chuna Jisu na rou hi atu akha kolla ril shuk no ranga arat rou ril so manita.

²²Hi kom Jisu na manita ril “Mee sanao pa ta ulenchang ngei na julla hla ange hana aol ana pe pi ange hana chungtekti thiempu ngei na akha chu roukung ocha ngei na Jisu ta that tange chuti weta rungnie nathum takka lea ah ring thou ange.”

²³Manilimta Jisu na ril, “Atu jongpa na ka-am na a wa num lea amo na matarang lim makphur weta ma khross ha rungnie chunghonna ron weta kanutieng jui shu oh.

²⁴Chuna atu jongpa na maringchang sanpi pha num lea chu mang shu oh. Chuti weta atujongpa kasarukka maringchang mangpi lea chu sanpi pha ange.

²⁵Mee na simlei ram lim pa changveta maringchang mangpi akha chu nea no wa am lea chu makolla chu kana ei pha meh!

²⁶ejonga mee hana keita ajakka akhu chu kachupi katakpi ta jui no lea meesanao pana Pathieng hana jaitha athieng wanrui hitta mahung tolla jung juija amota kom ajakka am mange.

²⁷Keina adiek rou nangei kolla rillinge nangei kar hina Chungthieng rengram ri ma lim phao sunga athi mel ri ang no ae.”

²⁸Hapta akha nutienga Jisu na rilsu wa amo na Pitar Johon akha chu Jacob amo hitta mullon na nie ranga thinge.

²⁹Nie ah ma am lei sung mamai soun ha hlonga akha chu apunchoi kom ade awar tolla ngou wa so.

³⁰Edang dang no ah spa anie na amota trongthou wa am, manui ha chu Moses lea Elija.

³¹Thangwan tienga mahung majai mel muh ah Jisu litta trong thou ah am roulam ha chu allota amona Chungthieng hina adien ha naha chu Jerushalem ma thit rang allota ranga tung ang sha.

³²Pitar akha chu atonpi ngei chu hoija enna na am lei ja mani na thou weta Jisu kolla spa anie na mahung majai tolla ngirra am manina riso.

³³Spa ani na Jisu ta houphur nutienga Pitar na Jisuta sai, “Arengpa hina kani am hi eja ah hra ah meh! Chuna kani na inn inthum sa tuk kae akha na natarang, akha na Moses tarang, akha na Elija tarang.” (Amo na marilla am emo ti kom rou takka chu dang no ae.)

³⁴Hita matronga amleija sumphai na manita worpi so. Hana arui ngei na manita sumphai na hlum ma am ri weta ati so.

³⁵Sumphai sunga heithou sanrol akha na ril, “Machunga kei na hal sange, na hi kalung shit sanao ae maril juijo!”

³⁶Sarol hana sol hlakjuija chu Jisu thei chak am so. Arui ngei chu na lim pa taranga daitikta am meh. Akha chu atu akha nakom mani riphur eja rilsukno ae.

³⁷Hana rungnie mathanga Jisu na arui inthum hitta mullon na hai thou wa tum ma junga wairul riha ngei ta Jisu na tuhlak.

³⁸Hiatam kar sunga spa akha na auwa ril shuk, “Arengpu! Oh, keina nakolla nija aminge akha chak kadon sanao ta anpi ri oh!

³⁹Hrano muihla na amota mant na edang dangno wa arol shukka auw ae achil phul shukka amota aol ana pe ae chuchak no wa amota leima ol pija hlanum no wa hla chak ti ae.

⁴⁰Keina narui ngei kolla julla hla pi rijota kaniek juija mani na julla hla nea no ae.”

⁴¹Jisu na sang, “Eja ah ngoiringno ngei akhuchu diekno meepok ngei! Echan sotta keina nangei kolla am ha ang?” Hana spa hata ril, “Nasanao ha hina ruija wa oh.”

⁴²Rungthar sanao ha hita ma wakka dijabol na amota alei chunga illa tupi so. Chuna Jisu na hrano muihla ta trongsan pe ah rilla rungthar ha dam pi so, akha chu mapa kolla peso.

⁴³Hana am lim pa na Chungthieng marat manea jaitha hana angak shukkae.

⁴⁴“Nangei na makno oh nangei kolla rillang ka ae rou hi! Meesanaopa ta malmashi ane angam ngei kut chunga pe ange.”

⁴⁵Chuti weta arui ngeina nahina rilna rouhi dang nea no weh. Nahi mani kolla chu athup sou chu mani na lungkim thei no ae, chuna mani hina rou sarukka sai ang kom ati ae.

⁴⁶Chuna arui ngei mani masel sunga hita trong ashang awai am hlakso atuna mani kar sunga lok tek ti ang meh,

⁴⁷Jisu na mani halhlakka am dangpha ah unga akha maningkolla ngir piveta.

⁴⁸Akha chu amo na rilso mani ta “Atujongpa na na unga hita kaminga ariemma lah mee ha keita lah ah ae; chuna atujongpa keita ariemma lah mee ha keita hla amotakom lah mee ae. Chuna nangei karra sin tek ti amona lokti ange.”

⁴⁹Johon na hita ril shukso. “Arengpu, kani na naminga dijabol julla houne ri unge. Chuna kani na amota hata ae no ranga ril unge rouram chu amo ha ani bom tul na karra am mee no ae.”

⁵⁰“Nangei na amota chan rang rou ril no oh,” ta Jisu na sang nge arui ngei kolla akha chu Johon kolla “Rouram chu atu jong akha na nang ta anda no lea amo ha namee ae.”

⁵¹Wanram ma Jisu ta rui ang apha neija wakka Jerushalem ma thingranga Jisu na alung ngirso.

⁵²Mama tienga amo na rouron akha Samaria husunga ehai limpa thouranga hakkanga hla so.

⁵³Chutiweta malmashi ngeina amota ariem ma hakpi no ae rouram chu amo ha Jerushalem tienga mathing sharukka.

⁵⁴Johon lea Jacob arui ani na nahi rijuija manui na ril, “Arengpu, thangwan hai thou wa sarmei kani na kok weta mani lim pa ripta kang shu oh ti meh?”

⁵⁵Jisu na mai hai weta manita lungsha so.

⁵⁶Chuna Jisu akha chu arui ngeina hu adanga thingso.

⁵⁷Mani na mani lampi ah hata thing juija spa akha na Jisu ta ril, “Amunt changhon na nathingna ah kei jui ange.”

⁵⁸Jisu na amota ril, “Ram mui ngei ahur am meh, hana awa ngei kom abu am meh, chuti weta meesanaopa sol hak rang chu amunt am no ae.”

⁵⁹Jisu na adang spa akha ta ril, “Kanutieng juijo,” chuti weta spa hana ril, “Arengpu, ma sha ah ka inn na lea weta kapa athi sa ui lea ri tikkae.”

⁶⁰Jisu na sang, “Hata athi chu athi ngei na ui song ange. Nang chu Chungthieng reng ram rou sam thingo.”

⁶¹Adang spa akha na ril, “Arengpa kei nanutieng jui tikkae chuti weta masha ah ka inn sung ngeita am joude ta ril thing tikkae.”

⁶²Jisu na makolla ril, “Atujong akha na lou hui thou nutienga anutienga hai lea chu amo na Chungthieng reng ram tullu lu nea ang no ae.”