Read Chothe Naga JOHON 1 Bible Online

JOHON 1 - Chothe Naga bible

JOHON 1

¹Ehei limpa sak matienga, trongsan ha chu am phur so weh; amo chu Chungthieng hitta am ha ae, hana amo ha Chungthieng ae.

²Athou hai thou wa trongsan ha chu Chungthieng hitta am ha ae.

³Ma jarra Chungthieng na eheilim pa sa ae; kutsem limpa hi amo tolno wa ephao sem no ae.

⁴Trongsa hana ringchang hina shukna ae, akha chu na ring changna malmashi lim ta awar choi phao ae.

⁵Awar hana athim sunga war ae, hana athim hana na awar hata nea no ae.

⁶Chungthieng na marouron Johon ta hla ae.

⁷Amo na mee ngeita awar hana maramma rilranga phao ae, chuna meelim pana rouril ha thei weta ngoiring ranga ae.

⁸Amo matak mak chu awar ha ah no ae; amo na awar hana rou ril ranga phao ae.

⁹Na awar hi adiek awar sha ae, na awar hina simlei ah phao hi malmashi limpa chunga awarranga ae.

¹⁰Trongsan ha simlei chunga amphur so ae, hana Chungthieng majarra shimlei lim hi sem ae, chu phao sunga simlei ngei na chu amo ta dangno ae.

¹¹Amona mahu maram sunga phao ae, chuti weta mamee ngeina amota lah no ae.

¹²Chuti halkom, ahre na chu, amota lah ae akha chu amo ta ngoiring ae; chuna amo na manita Chungthieng sanao ngei hina phaphung shuk pha pi so ae.

¹³Mani hi don hei thou wa chu Chungthieng sanao ngei no ae, maram chu mani hi malmashi pa ngei thouwa don sha ae; chuti weta Chungthieng hi mani pa maksa ae.

¹⁴Trongsa hana mee changa lungshi lea adiek hana shi ah ani karra am phur ae. Hana mapa haithou wa akha chakka don sanao na pha mahung majai ha kani na riphur songe.

¹⁵Johonna maramma trongphur ae, amona rilsukke, “Hi akha hina maramma ae keina karilphurha, ‘Amona kanutinga phao ae, chuti weta amona keita lella loktekke, maram chu keita donma hei thouwa amochu amphur so weh.’ ”

¹⁶Malungshit hana shihakti hei thouwa amona anilimta yaihra bopi so weh, anita yaihra akha nuteinga akha pepi ae.

¹⁷Chungthieng na Moses hei thouwa roukung pe ae, Chuti weta lungshi thei lea adiek chu Khrista Jisu kol hei thou phao phur ae.

¹⁸Atu akha na kom Chungthieng ta etikka kom ri nosonge. Akha chak don Asanaopa, Chungthieng, hitta akharukti akha chu Mapa ningtinga am, amona amota dangpi so weh.

¹⁹Jerushalem ma am rouril nea Jewish ngei na Thiempu ahre lea Levites ngeita Johon kolla “Nang atu acha meh?” ta sairang hla ae.

²⁰Johon na sangnum no ae no lutta thienga ta amo na ril shuk kae, “Kei hi Messiya ha ah nonge.”

²¹“Chuleh chu, nang atu che meh?” ta mani na sai. “Nang Elija che?” “A-no ae, kei a-nonge,” Johonna sangphure. “Nanghi Thiempu che? ta manina sai. “Ah nonge” ta amona sange.

²²“Chuleh chu kanita atu cha mo rillo.” mani na ril. “Kani ta hla ngei am na ah nasang rou ha ron na lea ange nang natak mak hi atu inge ti cha meh?”

²³Johon na roumaphu Isaiya rilphur rouha rilsir ae; “Arengpu mathingrang lamha tingpi-oh-ta ramrukka ao sanrolha kei inge!”

²⁴Pharisis ngei na hla rouron ngei na.

²⁵Johon kolla sai, “Ejonga nang hi Messiya anole Elija ano lea roumaphu anonge ti lea alo wa nangna meeta baptias ae pi ah che?

²⁶Johon na sang, “Keina tui ah baptias ae pi inge, chuti weta nangei kar sunga ngir tolla am akha ha chu nangei na dang nijo chou ae.

²⁷Amo ha kanutinga phao halkom kei na mahuirang rui sui pi phao kei chu matik cha nonge.”

²⁸Nalimpa hi Bethany ah Jordon tuiwa nasutienga shuk sha ae amunt hana ae Johon na baptias ae pi na ha.

²⁹Mathangpa rungnie ah Jisu na Johon makolla wak ha ripha ah ril, “Anno Chungthieng kelmo nao ha, amona simlei chunga pak lim pa ron na thing ange!

³⁰Hi akha hina maram ma ae keina karil phurha, “Apa akha kanutienga phao ange, amona keita hella loktekke rou ram chu keita don matienga amo chu am hlakso.

³¹Keina amohi eyongpa mee angmo dang nonge, chuti weta Isarel meengei na amota dangranga keina tuisunga baptias ae pi ranga wa inge.”

³²Hana Johonna saro ei ah rille, “Keina muhla hana thangwan hei thou wa peipi hekta jungtumma machunga am so weh.

³³Keina amota atunpha dang nonge chuti weta tuisunga baptias ae pi rang keita hla Chungthieng amo na kakolla rille, ‘Muihla athieng na tum ma jung weta atu jong apa akha chunga am ha ripha ange, amo mak ha sa-ae muihla ah baptias ae pi ang ha.’

³⁴Keina ri pha singe” Johon na ril, “Hana sarukka keina nangei kolla rilla aminge amo hi Chungthieng sanaopa ae.”

³⁵Mathang pa rungnie ah Johon na marui ani hitta hana woiha leya ngirra am meh,

³⁶amo na Jisu wakha ri weta, amo na ril, “Amo hi ae Chungthieng kelmo ha!”

³⁷Arui ani na hita maril thei weta Jisu hitta thingha so ae.

³⁸Jisu na heileh a an weta manutieng jui ani hata sai, “Nanui nie na e-yong pa ann rol chou meh?” Manui na sang, “Rabbi hoija munt na nang am manga che?” (Rubbi rilna chu “ocha”.)

³⁹“Wa weta anwa oh,” amona sange. Manuina wa weta ma am rang na mun ha risho ae, hana manui na hanie rungnie ha chu amo hita am ha so ae. (Nalei ha nietating apha inli tulso weh.)

⁴⁰Manui anie sunga akha chu Simon Pitar manaopa Andrew ae.

⁴¹Amona masha ah ma-ata Simon ta tukhlakka makolla ril, “Kani na Messiya” tuk songe (“Khrista” ta rilna.)

⁴²Hana amona Simon ha Jisu kolla ruija wa ae. Jisu na anweta makolla ril, “Naming hi Johon sanaopa Simon ae, chuti weta nangta Kephas ta kokkange” (hina rilna chu Pitar tichu “alung” ta ril na hita mana ae.)

⁴³Mathangpa rungnie ah Jisu na Galily ah thing ranga ngirso. Amona Philip ta tukka makolla rille. “Kanu jui wa-oh!”

⁴⁴(Philip hi Bethsaida ah mee ae Andrew lea Pitar am na hulok ka ae.)

⁴⁵Philip na Nathanel tukhlakka makolla ril, “Kani na Moses na roukung abai sunga jiekka shi akha chu roumaphu ngeina kom jiekka shi Arengpu ha kani na tukhlak so ae Amo ha Nazareth ta Josep sanao Jisu ae.”

⁴⁶Nathanael na saiye, “Nazaretta hei thou wa e-ahra shuknea ang meh?” “wa weta ann wa oh,” Philip na sange.

⁴⁷Nathanaelna makolla wak Jisuna rijuija amona ma maramma rille, “Hina adiektak Israel am so ae; makolla diek lau akha phao am no ae!”

⁴⁸Nathanael na makolla sai, “Alo ta kei ta nangna dangpha che?” Jisu na sang, “Philip na nangta kok matienga nangna theichang kung thuija na am ha keina ri inge.”

⁴⁹Nathanael na sange, “Arengpu,” “Nanghi Chungthieng sanaopa ae! Nanghi Israel ngei Rengpa ae!”

⁵⁰Jisu na ril, “Keina nanghi theichung kung thuija ri inge ta karil sa rukka ngoiringa che? Hita hella alok alok tullu nangna ri pha ang che!”

⁵¹Hana amona manita rille, “Kei na adiek rou rilla aminge nangei kolla nangei na thangwan ram honga am ri ange hana Chungthieng wanrui ngei na meesanaopa chunga kalla hang tum ma jung ri ange.”