Read Chothe Naga JOHON 10 Bible Online

JOHON 10 - Chothe Naga bible

JOHON 10

¹Jisu na ril, “Keina nangei kolla adiek rou rillinge innkalla lut no kelmo hana adang lam ma lut kelmo ha chu aru thei mee ae.

²Hana innkalla lut mee amo ha chu kelmo ngei hina kelmopu ae.

³Innkal hakpa na amota innlamhar honga am meh, hana kelmo ngei na kom masanrol ha thei ae, amo na makelmo ngeita mata mata minga kokke hana amo na manita lamkai ah rui ah shukkae.

⁴Amo na ruija mashukjuija mani matienga amona thinga manutienga kelmo ngeina juija thing rouram chu mani na masanrol ha dange.

⁵Mani na atujong akha nutieng jui no ae hana hutta mani hajongpa kolhai thou wa tan na thinge, rouram chu mani na masanrol ha dang no ae.”

⁶Jisu na na panteem hi rilveta, mani hana rilna rou ha lungkim thei no ae.

⁷Chuna Jisu na woiha lea ah ril, “Keina nangei kolla adiek rou rillinge kei chu kelmo ngei lut na inn lamhar inge.

⁸Hana ka matienga wa limpa ha aru thei ngei ae hana kelmo ngei na kom mani rol dong no ae.

⁹Kei chu inn lamhar ha ah inge hana atu jongpa ka am na lut mee na sanpi pha ange; amo na lut weta akha chu shukka thing weta sachik am na ha arak jong tuk kange.

¹⁰Aruthei meena phao chu aru rang akha chu athat akuit shukpi ang chakkae, na kajung chu mani na ringchan pha rang akha chu mani ringchanna awat am no wa shi hakta ringchan ranga ae.

¹¹“Kei chu ahra kelmo rungpa inge kelmo taranga thi tik ta am minge.

¹²Summanek spa, kelmo rungpa ano tipa chu akha chu makelmo ah no sharukka ram ui na phao juija kelmo lim houphurra tanna thinga kelmo limpa ta ram ui na adang adang hran pi ae.

¹³Summanek spa ha tran na thing ae rouram chu amohi summa nek sou chu akha chu, kelmo ngei tarang ephao halno ae.

¹⁴Kei chu ahra kelmo rungpa inge kapana kom kei ta dange hana keina kom kapa ta dang inge hahekta kakelmo ngei ta keina dang inge hana mani na kom keita dange hana kei na kom mani tarang athi tik ta am minge.

¹⁶Kakelno adang ahre am songe mani ha avul amunt na tulno ngei keina mani takom ruija lut ah ta-ae manina kasanrol thei ang ae hana manina kelmo avul akha, kelmo rungpa akhachak chang ange.

¹⁷“Kapana keita lungshi ae rouram chu keina karing chang pe num ma aminge woiha lea ah karingchang hi leah pha ranga.

¹⁸Atu akha na karing chang hi kakol hai thou wa lah ah thing no ae. Kapekka ka am hi kathei chakka ariem salla keina pe inge kapekkang ha kakut chunga ammeh hana kei na lea ah kalak sier ang kakut chunga am meh. Na hi a kapana keita ae oh ta pek rakit-rou ha ae.”

¹⁹Rouram hina sarukka mani kar sunga abom anie shukka hran so.

²⁰Mani atam ta na hita rilleh, “Amo hi dijabol ae! Amo hi awet ae! Ejeranga marou ngei ja am ma chau?”

²¹Chuti weta adang ahre na ril, “Dijabol hita am ha spa na hijong rou rillang no ae! Alo ta dijabol na mitcho mitta ri pi nea ang meh?”

²²Phalbi hla sunga athieng inn pek na reen akha Jerushalem ma ae ah.

²³Jisu na Solomon leihal athieng inna rollei ah.

²⁴Mee ngeina ahul tunga makolla ra chon weta sai, “Apha eja sotta kani na nangta lung chingna ah am mang meh? Chuna kani ta diekka ril pi oh nang hi Messiya ah cha meh?”

²⁵Jisu na sange, “Keina nangei kolla ril su sange. Chuti weta nangei na keita ngoiring no ae, kapa mane matik ka lu tullu limpana keita takpi so.

²⁶Chuti weta nangei na keita ngoiring no ae rouram chu nangei ha kakelmo ah no ae.

²⁷Kakelmo ngei na kasanrol thei ae. Keina manita dang inge hana mani na kom kaniu tieng jui ae.

²⁸Keina manita samlah ringchang pe inge chuna mani na thi ang no ae atu akha na kakol hai thou wa mani ta aru wa ruija thing ang no ae.

²⁹Kakolla manita pepipa kapa na eheilim chunga chungtek kae chuna atu akha na kapa kut chung hai thou wa ru wa thing nea ang no ae.

³⁰Kapa lea kei chu akha chakkae.”

³¹Hana malmashi ngei na amo ta deng rang alung woiha sar so.

³²Jisu na manita ril, “Keina nangei maikunga ahra tullu eja ae sange kapana keita ae rang pekha ha tullu lim kar sunga ejongpa sarukka alung deng anga chau keita?

³³Manina sang, “Kanina nangta ahra tullu na ae sarukka alung deng ah no ae chuti weta narou ril sarukka ae! Nang chakkae nathei chakka Chungthieng changrang hotna hi!”

³⁴Jisu na sange, “Nangei roukung hana jiekka shi sa so ae Chungthieng ril ha, ‘Nang hi Chungthieng ae.’

³⁵Ejonga amona manita hlawang ae ta kok lea chu atu taranga Chungthieng rou chu phao wa meh. (Hana jieksha rou ha chu akui am mang no ae.)

³⁶Kataranga chu, kapa na keita hal ae ha na keita simlei chunga hla pi ae. Kei hi Chungthieng sanaopa ae ta karil surukka alo ta nangei na keita Chungthieng ta thi ah ril ae ta halla chau?

³⁷Ejonga keina kapa tullu lu no lea chu keita ngoiring no oh.

³⁸Chuna ejonga nangei na keita ngoiring no hal kom manitarang ka ae anelah te chak chu ngoiring oh hana nangei lungkim ang chu kapana kakolla am meh akha chu keina kapa kolla am minge.”

³⁹Woiha pa mani na Jisu ta mant ranga hotna ae chuti weta Jisu chu mani kut chunga hai thou wa shukka thingso.

⁴⁰Hana Jisu na Jordon tuirel la samma lea ah Johon na tuilup na munt hana amo na am phurso.

⁴¹Malmashi ngei na makolla phao weta ril. “Johon chu anelah ephao ae no ae,” mani na ril, chuti weta na spa hina taranga maril limpa hi chu adiektakkae.

⁴²Hana malmashi eya na amota ngoiringe.