Read Chothe Naga JOHON 11 Bible Online

JOHON 11 - Chothe Naga bible

JOHON 11

¹Bethany na am Lazaras ti spa akha ana ah am meh, Bethany ti hulok ha chu Mary akha asar nu Martha na am na ae.

²(Na Mary hi ae arengpu kaekunga ariem hoi siektui so weta asam maru phur hana amo hina mata ana ah am Lazaras ae.)

³Na asar nu te na Jisu kolla rourilla hla ae; “Arengpu natonpi pa ha ana ah am so ae.”

⁴Jisu na nahi thei juija amo na ril, “Na Lazaras hina ana ah am hi achana ah chu mathit rang ah no ae, nahina Chungthieng na hung ajai lokka choija phao range hana Chungthieng sanaopa hana ahung ajai pha ranga ril na chang ange.”

⁵Jisu na Martha, ma-ute akha chu Lazaras ta lungshi ae.

⁶Chuti halkom amo na Lazaras hi na ah am meh ta thei su takka kom Jisu ha rungnie nani phai ah am songe.

⁷Hana amona arui ngei ta ril, “Anina Judea ramma lea sai oh.”

⁸Arui ngeina sange, “Ocha, Apha atante matienga mee ngei na nangta alung deng ang ae ha, hatveta nangna hana lea ranga semma am ma che?”

⁹Jisu na ril, “Atun hi apha asom ani tah no wa meh?” Chuna atujongpa na niesoun jai ja thingleh chu kae mathui am mang no ae rouram chu amona simlei chunga awar ha ri jarra.

¹⁰Chuti weta ejonga amo na jantienga thing ta lea chu kae mathui ange rouram chu makolla awar am no ae.”

¹¹Jisu na nahi ahre ril sop so, “Ani tonpi Lazaras ha jalla am so ae keina thing weta amota hranga thoupi ange.”

¹²Arui ngeina sang, “Ejonga amo na jalla am lea chu arengpa oh, amo thou ange.”

¹³Jisu na rilna chu Lazarus ha thi so ae. Chuti weta mani hal chu mahou sa ah ajal ha ae ta.

¹⁴Hana pa chu Jisu na hrabakta manita ril so, “Lazarus ha thi so ae,

¹⁵chuna nangei sarukka kei ariem minge ha chu kei ha makolla amha nonge, chuna nangei ngoiring rang. Atun chu thing sei makolla.”

¹⁶Didymas ta kom kok Thomas na atonpi ngeita ril, “Anina arengpu hita thing ha ei oh. Chu lea chu ani na amo hitta thi ha ange!”

¹⁷Jisu na hana tungjuija Lazarus ha rungnie naly matienga phom su hakso ae.

¹⁸Bethany hi Jerushalem phao sunga kilometer inthum meh.

¹⁹Judiah mee ngei na Martha lea Mary mata Lazarus thit sarukka manui lungdam ranga manui ta tuk hlak phao hom meh.

²⁰Martha na Jisu phao ae ta mathei juija Jisuta tukhlak ranga tan na shukso. Chuti weta Mary chu inn na am hakkae.

²¹Martha na Jisu ta ril, “Ejonga nangna hina am phur lea, Arengpu kata hi thi ang no ae!

²²Chuti weta keina dang inge atum kom Chungthieng na pe ange makolla nanik lim ha.”

²³“Nata ha ringthou wa ringchang pha ange” Jisu na amota ril.

²⁴Amona sang, “Keina dang inge,” “Ha chu achannie rungnie ah amo hi ringthou weta ringchang pha ange.”

²⁵Jisu na makolla ril, “Kei ing ringthoune akha chu aring ringchang, atujong akha na keita ngoiring lea chu athi sa phao ringthou ange;

²⁶Akha chu atujong na keita ngoiringa ringa am lea chu amo na athi pha ang no ae. Nahi nangna ngoiring che?”

²⁷Amona sang, “Oh weh Arengpu!” “Keina nangta ngoiring inge nanghi Messiya ae ta, hana Chungthieng sanaopa ae ta, simlei chunga phao ang pa ae ta.”

²⁸Martha na nahi ril su takka, amo na lea weta ma-ute Mary ta aruhan ta kok thingso. “Ocha ha hina am so” ma ute kolla amonaril, “hana amona nangta sai ae.”

²⁹Mary na rou hi theijui amo na thou weta Jisu ta tukhlak ranga tanna thingso.

³⁰(Jisu chu mani husunga tung no the songe Martha na amo ta tukhlak na amunt na hana am songe.)

³¹Mary inn na lungkimpi ngeina amoha thou wa rijui ah mani na manu juiso. Mani hal chu Mary hi hlankung thing weta tap thing so ae ta.

³²Mary na Jisu am na amunt tungso, hana amo ta mamel ri su inn len, makae kunga tuveta amo na ril, “Arengpu oh” “Ejonga nangna hina am phur ta lea chu kata hi thi ang no ae!”

³³Jisu na matap ri ah akha chu amo hita am ha ngei na tap kom ri pha so. Chuna malung leima tonga amo na leima olso.

³⁴“Hoija amunt na amota phum ma chau?” mani ta Jisu na sai. Mani na sang, Arengpu “wa oh anthingei oh.”

³⁵Jisu tapso,

³⁶Meengei na ril, “Anno amo na eja ah amo ta lungshi meh!”

³⁷Chuti weta adang ahre na ril, “Mitcho ngei ta ripi mee ha amo no meh? Hana amo na thit no ranga kom ae nea ang no meh?”

³⁸Woihapa Jisu lung olla Jisu na hlankunga thienga thingso. Hlan hur mai ha chu alung akhana harra shi ae.

³⁹Jisu na trongsan pepi, “Alung ha lah ah hou oh!” Athi Lazarus sarnu na sang, “Amo hi rungnie naly phom ma shi so ae chuna ariem leima nam shi jo ve arengpu.”

⁴⁰Jisu na makolla ril, “Chungthieng mahung majai nang na ri ange ta keina nakolla ril no meh?” ayonga nang na ngoiring lea chu.

⁴¹Mani na alung ha lah ah hou wa Jisu na achungtienga an weta ril. “Apa keina ariem minge nangta ha chu nangna karou ngei pi che ae.

⁴²Kei na dang inge nangna apha changhon na kei ta ngei ja am pi che ae chuna hina am mee ngei sarukka rilla aminge ha chu kei hi nahla mee ae ta ngoiring ranga.”

⁴³Na hi maril su takka amo na sanrol shukka kok so, “Lazaras shukjou oh!”

⁴⁴Amo na akae akut athi punna hlumma akha chu amai pun na hlum ma shukso. Jisu na manita ril. “Pun ngei ha hla pi jou oh hana thing jou su oh amo ha.”

⁴⁵Mary am na ah phao mani lim pa na Jisu ae ha ri weta amo ta ngoiring so ae.

⁴⁶Chuti weta adang ahre na chu Pharisis ngei am na lea weta Jisu ae na ha manita takso.

⁴⁷Chunapa chu Pharisis ngei lea chungtekti thiempu ngei na ulien chungei ta tuk hlakweta ril, “Alo ta ae ei ti meh? Anno na spa hina anelah ae ah am hi!

⁴⁸Ejonga ani na amo hi hata malamma thing jou shu oh ti lea meelim na amo ta ngoiring ange, hana Roman ram ma ane angam ngeina ani athieng inn kaha chu ani jati makhai ta akuit atah shukpi ange!”

⁴⁹Mani kar sunga hakumma chungtekti thiempu aming na kaijapha na ril, “Eja ah lungmo nangei hi!

⁵⁰Nangei na dangne no wa chau, jati akha na akuit atah shuk kang saruk chu mee akha na thi pa na hella hra tekno meh?”

⁵¹Adiktak chu amo na mathei chakka rou wa ril no ae amo hi chungtekti thiempu ae nakum um hana Jisu na Jehudi ngei taranga kom thi pi ange, ta amona rilshuk ae.

⁵²Hana mani taranga chak no wa amo na Chungthieng mee ngei amunt aram adang adanga rolla am mee ngie hi amo na pum akha chakka ra-chon pi ange.

⁵³Chuna Hani rungnie hai thou wa Jewish ane angam ngei na Jisu ta that rang sem sa so.

⁵⁴Chunapa chu Jisu na Judiah ram ma ephong phonga thing nijo weh chutihalkom Jisu na ramruk tienga thing weta Ephraim ti hulokka thing nga amunt hana arui ngei hitta am ha so.

⁵⁵Lanpina Reen ae rang kom apha neija waso. Chuna sarukka mee ngei na maram houphur weta Jerushalem ma thing weta mani talit nu juija reen ae na maitienga hajong athiengpi na tullu taranga thingso.

⁵⁶Manina Jisu ta jonga am, manina athieng inn sunga rachunna akhu na adang ta sai hlakka, “Nangna chu alo ta halla che? outakka amo hi na reen hina phao ang no mo anoleh phao ang meh?”

⁵⁷Chungtekti thiempu akha chu Pharisis ngei na atujong akha na Jisu am na mun dang mee am lea chu amo na tak shu oh ta trongsan pe so. Chuta lea chu manina amota mant nea ange.