Read Chothe Naga JOHON 12 Bible Online

JOHON 12 - Chothe Naga bible

JOHON 12

¹Kannathingna rungnie naruk matienga Jisu na Bethany ah Lazarus athisa hai thou ringthou sapa inn na thing ae.

²Mani hana bu bakha ranga semsa ah Lazarus ha Jisu hitta bakha ranga ong tolla am lei ja Martha chu mani bakranga semsa san na am meh.

³Hana Mary na amant atam ariem hoi siriktui ser tangkhai choija hong weta Jisu kaechunga bun na mani inn sung chu ariem hana shihak ti so Mary na masam takka akae ha hana siriktui ha rupi.

⁴Jisu hina arui ngei sunga Judas Iscariot amota jurra hou ang pa na ril.

⁵“Alo wa hija amant tam siriktui hi rupa riha thum ma jur weta apha sum hana sara ngei ta pe lea chu?”

⁶Amona nahi maril chu sara ngei ta hal weta ril ano ae nahi na maril chu amo mak ha aru thei mee ae amo na sum hou ha ma choi sarukka akha chu sumha machang rang sharukka nahi ril ae.

⁷Chuti weta Jisu na ril, “Keita phum mang nie apha rungnie ha nei so ae chuna madit mahal hana hata ae shu oh.”

⁸Nangei na apha chang honna sara ngei hitta am ha chou ae, chuti weta kei chu nangei hitta am ha nea ang no ae.”

⁹Ehekta tam malmashi ngeina Jisu hi Bethany ah am meh tah thei pha ah, manina amunt hana thingso, Jisu taranga chak no wa Jisu na athi hai thou wa ringthoupi Lazarus taranga kom tolla.

¹⁰Chuna pa chu chungtekti thiempu na Lazarus tah kom that rang ae thou sa.

¹¹Rouram chu masarukka Jew ngei na manita ngei num no ah Jisu ta ngoiring hom so.

¹²Hana mathangpa rungnie ah wairul riha na lanpina reen na Jisu kom Jerushalem ma phao ae ta theiya.

¹³Chunapa chu manina annohbak hriem yeta Jisuta tukhlak ranga aou wa thingso, “Chungthieng ta dom munge! Chungthieng arengpu maminga phao meeta jaihra pe shu oh! Chungthieng na Israel ngei Raeng ta jaihra pe su oh!”

¹⁴Jieksha rouna ril chu hekta, Jisu na kormoh akha tuk-ka amona kormoh achunga chung so weh.

¹⁵“Zion hupi ngei atrino oh! Hina nangei Raeng jungso. Kormo nao chunga chung waso.”

¹⁶Apha hana arui ngeina lungkim no ae, chuti weta Jisu na mahung majai pha jui; hana amota jeiksha rouna ril ha, manina ngaileh so, akha chu manina nahi mata ranga ae pi ae.

¹⁷Rou lamchu Lazarusta hlan hei thou kokka athi thou ringpi hina Jisu ritta am ha malmashi ngeina hana shuk phur lim tang kou so.

¹⁸Amona anealah ae tihi manina theipha ah, chuna sharukka abom ngeina amota tuk hlak ke.

¹⁹Pharisi ngeina manisunga ril hlak ke, “Anina eko ae nea no! Anno, simlei lim na manu jui ah am!”

²⁰Atun chu Grik ahre kom reen hana mok thing ang nga phao ngei kar sunga tolleh.

²¹Manina Philip kolla thinge (amohi Galily Bethsaida hei thou ae) hana amota ril, “Arengpu, keina Jisuta ri num mung.”

²²Philipna thinga Andrew kolla rilleh, hana manuina Jisu kolla thing weta ril.

²³Jisuna manuita sange “Meesanaopa na arat mahung majai pha rang apha ha atun waso ae.

²⁴Keina adiek nakolla ril linge: taineen aruna alei ah tullah thi nole, naha akha chak hata am mange, hatichun naha thi lea atamma ra-ae.

²⁵Atujong pana maring chan hita lungsi limna thi ange; atujongna maring chan ta nasimlei hina atir limna samlah ringchan pe ange.

²⁶Atujong meena kahlou ae num limna kanu jui shu oh. Chuna ka-am na amunna kashuk ha kom am mange. Hana kapana kahlou ae meelimta ajak ati pe ange.

²⁷“Atunchu kalunghi leima aol sing hana keina ei ril ang sha? Chule chu Apa, pha hi ka kolla phao no ha ah su oh? Chuti weta hina jarra kei phao inge.

²⁸Apa, nahung najai naming alok chang pi oh!” hana vanram hei thou sanrolna tronga hita ril, “Keina nahung najai ha lok ko lok pi singe, hana nahung najai ha lea ah lok pi sir ang ing.”

²⁹Wairul reha hana ngira am ngeina sanrol ha thei, akha chu mani ahre na ril nahi rurie ae, adang ahra na chu hita ril, “Wanrui na makolla rou ril la-ae!”

³⁰Chuti weta Jisu na manita ril, “Nahi kata ranga sanrolna rou ril no sha ae, chuti weta nangei taranga ae.

³¹Na apha hi shimlei ta routreem rang so ae. Shimlei hita routreem mee ngei ta dang hou ange.

³²Keita leiram heithou wa domjui, keina meelimta kakolla rui lut tang ing ae.

³³(Hi marilna chu amo hi aol donga thit ranga ril ae).

³⁴Wairul reha na sang, “Kani rouphun na chu hita ril Messaiah ha chu atreem neai no ah ring ang ae. Chu lea chu nang na meesanaopa hata dom ang ae ta rilla che? Mee sanaopa ha atu meh?”

³⁵Jisu na sang, “Nangei kolla awar ha apha atante am mange. Na kolla awar amleiya nalam hana atim am no lutta thing ngo, chuna athim ha nakolla phao ang no ae; Atu yong mei akhana athim thui ah thing jui amo na dang pha no ae hoitinga amo na thing sa tihi.

³⁶Awar hata ngoiring oh, nakolla awa ha am leiya, chuna nangha mee ngei awar ha chan ang ae.” Jisuna na ril sutakka, amona mani kolthou ah shukka thinga athei chakka beso.

³⁷Amona anealah mani maikunga ae hal kom, mani na amo ta ngoiring no ae,

³⁸nahi rouphupa Isaiah na jiek rou tung rang nga ae: “Rengpu, ani ril roukit ha atuna ngoiring nga meh? Atu kolla Arengpuna nanae yaitha ripi meh?”

³⁹Hana manina ngoiring nea no ae roulam chu Isaiah na kom ril ae,

⁴⁰“Chungthieng na mani mit ha chopi so ae hana mani luhal kom thing pi so ae, Chuna mani mit na kom ri ang niyo, mani luhel kom lungkim niyo, maniha kakolla heileh niyo, Chungthieng na ril, keina chu manita dampi rang ae.”

⁴¹Isaiah na ril, roulam chu amo na Jisu mahung majai ri ah hana mataranga rou ril phur ae.

⁴²Haphao sunga Jehudi anea angam eya na Jisu ta ngoiring ae, chuti weta Pharisee sarukka manina awao shukka trong shuk no ae, chuna Synagogue thouwa julla hou norang ae.

⁴³Chungthieng ngei hita lella malmasi ngei angei ha hella di ae.

⁴⁴Jisu na sanrol shukka ril, “Keita ngoiring meelimna, keita chak ngoiring ah no ae chuti weta keita lha amota kom ngoiring ah ae.

⁴⁵Keita ril lim na keita lha amota kom ri so ae.

⁴⁶Keina simlei ramma awar changa jung ing ae, chuna keita ngoiring limna athim hana am mang niyo weh.

⁴⁷Atujong akha na karou kit thei lea chu hana amo na jui no lea chu, keina amota routreem mang no ae. Simlei hina kajung hi routreem rang ah no ae chuti weta sanrang nga ae.

⁴⁸Atujong keita ngaino mee hana karoukitta sungkim no mee amota routreem mang mee akha am meh. Karil sa rou hana amota atim nie rungnie ah amota routreem ang ae.

⁴⁹Nahi adiek ae, roulam chu keina kanea matik katarang nga chak trong ah nong ae chuti weta keita lha kapa na katrong rang, karil rang roukit rou pe ah ae.

⁵⁰Hana keina danging na roukit rou hina samlah ringchan pe pi ae.”