Read Chothe Naga JOHON 13 Bible Online

JOHON 13 - Chothe Naga bible

JOHON 13

¹Kannathingna reen hina matinga Jisuna simlei ram hi lha houwa mapa kolla thingange tihi dange. amona simlei ramma marui ngeita apha chang honna lungshi ae, akha chu manita atiem phaowa lungshi ae.

²Jisu akha chu arui ngei hitta bakha leiya, hrano muihla hana Jisuta yurranga Simon Ischariot sanaopa Judas lung sunga song pi so weh.

³Mapana makolla rat na lim pe ae ti hi Jisuna dange; Chungthieng kol hei thou ah yunge akha chu Chungthieng kolla thingange ti hi amona dange.

⁴Chuna amona Maicham hei thouweta, malinglut achul ha lipweta puntit akonga sui so weh.

⁵Hana pachu amona hengkung akha sunga tui sung weta ma-rui ngei kea sil thousowe akha chu akonga sui puntit hana ru pi ae.

⁶Amona Simon Pitar kolla wakle, makolla hita saiye, “Kei ko silpi anga che meh, Reng oh?”

⁷Jisuna makolla sange, “Na ka ae hi nangna atunchu dang angno che ae, chuti weta anutingchu dangpha ang che ae.”

⁸Pitar na hita rille, “Rengna ltikkako kake silpiphung shuknowe! Keina nake silpinole chu,” Jisuna sange, “Nang karui ah no weh.”

⁹Simon Pitar na sange, “Rengo chutile chu kake chak ahnowa, kakut akha chu kalu ko silpio!”

¹⁰Jisuna rille, “Atu yong tuibulsa ngei chu ake chak silhanga ae, apum chu thieng so weh, nangei lim thieng hap so weh, nangei kara akha chu thieng no weh.”

¹¹Jisuna amota jur ang mee ha dang ae; hina sarukka amona rille, “Nangei limha thiengso chou ae, chuti weta mee akha chu thiengno ae.”

¹²Jisuna mani ke silpi sule, malinglut achul ha hasir weta Maicham ah ongsirso weh, “Nangei na dangpha chou meh nangei kolla ka ae pi hi?” amona sai ae.

¹³“Nangei na keita achupipa akha chu Rengpata kok hi, adiktakke, tichu nahamak kei inge.

¹⁴Kei, nangeihana Reng akha chu achupipa keina nangei kea silpi ta lea chu, nangei ko akha lea akha ke ha silpi lhak au oh.

¹⁵Keina nangei taranga panteem changa ripi sange, chuna sarukka ka-ae hekta nangei ko ae-oh.

¹⁶Keina adiktaka rilinge; kor na maputa lela loktek no ae, hana rou choipa na amota hlapa ta lella loktekno ae.

¹⁷Atunpa chu na adiek hi nangeina dangso chou ae, chuna nangei na tullu changa aeta lechu iya ah ariem anga meh!

¹⁸“Nangei limpata kei rilla ah no weh; kahal mee ngei keina danginge! Kei hitta bakha mee akhana kachunga toh kallange! ti hi athieng abai sunga rilphur ha tungrang nga sa ae.

¹⁹Kei na atun shuk matinga karilhi, anutinga karillim hi shuk jui nangeina keita ngoiring ranga ae.

²⁰Keina nangeita adiktaka rillinge; atuyong akhana ka-hla mita langpi lea chu keita langa ae; hana atu yong akhana keita langle chu keita hlapipa amota langa ae.”

²¹Jisuna hilim hi rilnuting, alung thuka olla awao shukka phuksukee, “Keina adiktaka nangeita rillinge: nangei karra akhana keita sawnlok ange.”

²²Amona atu roulamma rilmo dangtheino ah arui ngeina akha lea akha anlhak ke.

²³Arui ngei sunga akha tichu Jisuna lungsit tekte akha ha chu Jisu mathang maka onga ame.

²⁴Simon Pitar na amota rhima rille, “Amona atuta rilla mo ae ta saiyo.”

²⁵Chuna arui hana Jisu kolla nairhita wa weta saiye, “Na-ha atuwa meh, Rengo?”

²⁶Jisuna sange, “Kei na butol antuiya lupweta kapek miha amo ha-ae.” Chuna amona butol ahui laweta, lupweta Simon Ischariot sanaopa Judas ta pesowe.

²⁷Judah na butol ha langinglen hrano satan alung sunga lutsowe, Jisuna amota ril ae, “Na ae rangha ranga ae oh!”

²⁸Bakna hana am ngei ha Jisu na hirou makolla rilhi maruingeina lungkim no ae.

²⁹Arui arhe na Judas na mani sum hao ruisou chu mani reen na bakrang inrang ha thing weta lak thingrang rilla rangeta, ahnole sara ngeita eyongpa pekrang ril range ta halphure.

³⁰Judas na butol ha lakinlen awao shukka thing so weh hana thimsowe.

³¹Judas na houphurlen, Jisuna rille, “Atunchu meesanaopa hana alok asei ha ripisowe; atun Chungthieng Mahung majai machung hei thouwa ripi so weh.

³²Hana Chungthieng na machung hai thouwa ripile chu, hana Chungthieng na machunga mahung majai ha ripi ange, hana amona mahung majai ha ri pi len ange.

³³Kasanao ngei oh, kei nangei hitta sotta am ha pha ang nonge. Nangei na keita yong ang chou weh; chuti weta atunna karilhi Jahudi ya anea-ngam ngei ta karilchu hekta ae, ‘Nangeina kathingna lamma thingne ang no chou ae.’

³⁴Hana atun keina athar Rakit rou pe-inge: Akha lea akha lungsi lhakkou oh. Keina nangeita lungsit hek ta, chuna nangeiko khale kha lungsi lhako.

³⁵Nangei na kha lea kha lungshi lhak lea, limpana nangei ha ka-rui aeta dangpha ange.”

³⁶“Hoiya thinganga chame. Rengo?” Simon Pitarna amota saiphure. “Nangna atuna kathing ha yuine angno che,” Jisuna sangphure; “Chutiweta anuting chu jui ang che ae.”

³⁷“Rengo atun elo kayui nea norang meh?” saiye Pitarna. “Nataranga thi phao kai ngirsinge!”

³⁸Jisuna sangphure, “Nang katarang adiek ka thine takkang che meh? Keina adiktaka rilla aminge: Ar hong pa na hung mating nangna kei dang nonge ti hi woithum rillang che ae.