Read Chothe Naga JOHON 14 Bible Online

JOHON 14 - Chothe Naga bible

JOHON 14

¹“Nangei olno aowo akha chu ningsi ningrhul aenou wo,” Jisuna manita rilphure. “Chungthiengta ngoiringo khachu keitako ngoiringo.

²Kapa inna tungrang amhome, hana keina nangei tarang amunt semthing inge. Hitinole nangeita rilphur ang no singe.

³Chuna keina nangei tarang amunt semthingle, kei leya yungsira nangei keina rui kallange, chuna ka-amna hana nangeiko amange.

⁴Kathing na amunha tungrang lamha nangei na dangchou weh.”

⁵Thoma na makolla rille, “Reng, nang hoiya thingang kanina dang nongei chuna kanina ha pharang lamha alota dang ang meh?”

⁶Jisuna makolla sangphure, “Keina, lamha, adikha akha chu ringchang ha inge; kei ano ah chu atunako Mapa kolla thingne angnowe.”

⁷Atunchu keita nangeina dangsochou weh, “Amona manita rille, nangeina kapatako dangchou ae, hana atun hei thouwachu nangeina amota dangsochou ae, khachu amota rie ko rie sochou weh.”

⁸Philipna amota rille, “Reng, kanita Mapa ha ripi oh nahiye kanina ditchu.”

⁹Jisuna sangphure, “Apha hichan sotta nangei hitta amha phao; nangna keita dangno che, Philip? Keita risa ngei ha kapa ta risa ae. Chuna saruka ‘Mapa ta ripi oh ta nangna rilla che meh?’

¹⁰Philip, keina kapa kolla aminge Mapana kakolla ameti hi nangna ngoiring no ah cha meh? nangei kolla Karilsa tongsan hi, kakolla thou shuk ah no ae,” Jisuna arui ngeita rille, “Kakolla am mapa hana ma ae tullusa ae.

¹¹Keina kapa kolla, kapana kakolla ameh ti karilyuiya nangeina ngoiring ou wo. Ha ah no lea ka-ae tullu hinako ngoiringo.

¹²Keina nangeita diek rillinge atuyongpana keita ngoiring lea chu ka-ae lim amoko ae ange ae, hita lelko amona ae-ange, tichu kei kapa kolla thing ange.

¹³Hana kaminga nangei niek lim ha keina ae-ange, hana jui ah chu Mapa hana Mahung Majai lim asanaopa Chungthieng thouwa ri-ange.

¹⁴Eyonga kaminga nangeina eiheilim saile chu, keina ae-anginge.

¹⁵“Eyonga nangei na keita lungsile, nangei na kata rakitrou jui ange.”

¹⁶Keina mapa hata ni-ange, hana amona adang sanpinepa akha nangeita pe-ange, amohana nangei itta atreem amnolutta am ha ange.

¹⁷Amoha ae Chungthieng hina marama adiek ka ripinepa Muilha ha. Alei ramna amota langne angnowe, tichu amochu riko, dangko nea ang no ae. Chutiweta nangei chu amota dangchou weh, tichu amona nangei itta amha ae, khachu nangei sunga ame.

¹⁸“Keina kathingyuiya, nangeithei chak houphur ang nonge; nangei kolla woiha lesirange.

¹⁹Apha atite te sunga chu aleiramna keita ripha angno ae, chuti weta nangei chu keita ri angchou weh, chuna roulam chu keina ringa amchu hekta, nangei ko ringa am ang chou weh.

²⁰Na rukniha phao jui ah chu, keina kapa kolla ame ti hi nangeina dangpha ange, keina nangei sunga amhekta nangei na kakolla ameh.

²¹“Atuyonglimna katarakitrou ngaipiya, yuipi lea chu amo ha keita lungsi mee akha ae. Keita lungshi mee ha Kapana lungsi ange. Keina ko lungsi ange akha chu kei katak mak machung ripi ange.”

²²Judas (Judas Ischariot ah no lutta) na rille, “Reng, shimlei chunga ah no ah alota nang na kani ta chak ripi ang nga cha meh?”

²³Jisuna amota sangphure, “Atuyongna keita lungsilechu kachupihi yuiange. Kapana amota lungsi ange, hana Kapa akha chu keina makolla lutta amohita amha ange.

²⁴Atuyongna keita lungsinole kachupiko jui angno ae. Hana ka chupi nangei thei sa hi kakolla hei thou ah nao ae, chuti weta kei ta lha, kapa kolla thou yungsa ae.

²⁵“Nangei hitta hita amhalei sunga nahi nangeita rilphuringe.

²⁶Sanpipa ha, Atheing Muilha ha, Kapana kaninga lha angpa hana nangeita eiheilim chupi ange, hana karilphur lim hi amona nangeita songyelpi ange.

²⁷“nangei kolla kahouphur chu adai ha sa ae; nahi kakolla am adai ha sa ae nangeita kapekhi. Keina kapek hi alei ram ma pek hek tino ae. Nangei olno oh, khachu ningsi ningrhul ae no oh; nangei atino oh.

²⁸Keina nangeita karil hi nangei na thei so chou weh ‘Kei lha houwa thingang singe, chuti weta nangei kolla leya phao sir ange.’ Nangei na keita lungsilechu keina kapa kolla thing anginge ta karilhi nangei na ariemang chou ae; tichu amona keita lella loktek ae.

²⁹Hilim hi shuk matinga nangei kolla hihi ril phuringe, chuna ashuk jui ah nangeina ngoiring angsharukka ae.

³⁰Keina nangeita asotta tongthao nea ang ni ang ae, tichu aleiram hina roukam ngei phao so weh, amona kachunga mane amno ae.

³¹Chutiweta keina mapata lungsi ae tihi aleiramna danganga ae; chuna saruka keita aeyota maril mahei ripta kei ae ange.” Wa-oh amunt hina hei thou wa thingsei oh.