Read Chothe Naga JOHON 15 Bible Online

JOHON 15 - Chothe Naga bible

JOHON 15

¹“Keina adiek drakha inge, kapana mahun ae mee ha ae.

²Amona kakolla am ara rano abaklim rhima hou ae, hana ara ra abak limta tengpi ae, hanachu ara lella ra-ae.

³Nangei chu kei kachupi hana jara amahalla thiengso chou weh.

⁴Kakolla chat nolutta am mou-oh, hana keina nangei kolla chat nolutta amange. Abakna athei chakka ara rane no ae; akunga chatno lutta amlechak amona ara ra nea ae. Chuhekta nangei kakolla amno ah lea chu ara rati changne ang no ae.

⁵“Keina akung inge, hana nangeina abake. Atu yong pana kakolla chat nolutta amle, hana keina ko makolla amle, ara lella rah ange; tichu kei tolno ah nangei iko ae nea ang no ae.

⁶Atu yongna kakolla chat nolutta amnole chu abakta tanweta charpi hekta charpi ange; hayongpa abak ngei ha homweta sarmei sunga denga, manita kangpi ang ae.

⁷Nangei kakolla chat nolutta amle akha chu rou nangei kolla chat nolutta amle chu, kakolla nangei hallim rilloa wo, hana nangei na pha-ang chou weh.

⁸Nangeina ara atam rah hana kapa mahung majai hi nangeina mupi chou ae; hi hekta nangeina ka-rui ha changso chou ae.

⁹Kapana keita lungsit hek keina nangeita lungsi ingei, kalungsit hana chat nolutta amo.

¹⁰Nangei na karakit rou yuita lea chu, nangei kalungsit hina chatno lutta amange keina kapa rakitrou jui hekta, malungsit ha chat nolutta amhekta.

¹¹“Ka-riem hi nangei sunga amweta nangei ariem ha ahoirang keina nangeita na hi rillinge.

¹²Ka-rakit rou chu hi-ae; kei nangeita lungsit hek, nangeina khale kha lungsi lhakko.

¹³Atu yongpa akhana atonpi taranga ringchan peya thipi hita lella loktek lungsi amno ae.

¹⁴Karil ha nangeina ae lea chu nangei katonpi ngei ae.

¹⁵Keina nangeita suuk kae ta kokang nea ang ae, tichu suuk akhana amitpu na e-ae sa tihi dangphano ae. Hana hutta keina nangeita tonpi ta kokang singe, tichu keina kapa kolla katheilimpa nangei kolla ril shing nge.

¹⁶Nangei na keita halh ahno ae, keina nangeita halhing, hana nangeita hlou-pae inge, thingweta ara atam ra rang, hana nangei ara ha chat no lutta amrang, nangeina kaminga kapa kolla nieklimpa ha kapa amona pe pi ange.

¹⁷Chuna saruka nangei khale kha lungsit lhakrang keina rakitrou pe-inge.

¹⁸“Eyong shimlei na nangeita atirle chu, keita masa atir ae ti ha ngaileh-oh.

¹⁹Eyong nangeina simlei tarang chang lechu, simlei hinako nangeita matak lungsit hek lungsi ange. Chutiweta keina simlei hei thouwa nangeita halsinge, hana nangei simlei taranga ah no ae; chuna saruka simlei ngeina nangeita atira ae.

²⁰Karil phurha ngaileh oh! Akorna amitputa lella loktekno ae; eyonga manina keita ol peleh chu, nangei tako olpe ange, eyonga manina kachupi yuilechu, nangei chupiko yuiange.

²¹Chutiweta manina nalimhi nangei kolla ae ange, roulam chu nangei ha kata ae; tichu keita hla mee ha manina dangno ae.

²²Keina yungweta manita tongsam pephur nole chu, mani pak amangno ah ae, chuti weta atun chu mani pak ngaidam rang amno ae.

²³Atu yongna keita atirle chu kapatako atir ae.

²⁴Atu akhanako aephurno tullu ha keina mani kolla ae phurnole chu mani pak am ang no ah ae; chuti weta atunchu manina keitako kapatako riko riso, atirko atirso weh.

²⁵Chuna saruka manina iko ‘ariem salla keita atirsowe ti ha mani tongsan hana jieka siha adiek ranga ae.’

²⁶Chutiweta keina sanpi ang akha hla ange, tichu kapa kolla shuk Muihla hana yungyuiya, Chungthieng hina adiek lim amona ripiange. Keina kapa lhei thou ah nangei kolla amota hla ange, hana amona kataranga rou rillange.

²⁷Nangei nako kataranga rou rillange roulam chu athou hei thouwa nangeina kei ita amha hange.