Read Chothe Naga JOHON 17 Bible Online

JOHON 17 - Chothe Naga bible

JOHON 17

¹Jisuna rouhi rilsunutinga, wanramting anweta nieye, “Apa apha ha waso ae, Nasanaota Mahung majai ha peyo, hana asanao nako amota mahung ha pek ranga.

²Roulam chu simlei ram chunga am malmasilim chunga ae nea matik pepi soche ae, chuna makolla napek manilimta samla ringchang ha pesu oh.

³Samla ringchang ti hi chu amota dang adiek Chungthieng, akha chu nalha Jisus Khrista ta dang ti hi ae.

⁴Keina aleirama mahung majai muh phur sange; keita napek tulluha aesu sange.

⁵Apa! atun keita namaikunga nahung najai pepio, simlei ram semmating anui amhalei hung jai ha pepi oh.

⁶“Simlei ramma am kaninga napekngei kolla nawarha ripisange. Mani ha nata sa ae, kaning ha nangna pepiso che ae. Manina natongsanha yuiye,

⁷kaninga napek tongsanha manita rilsinge, hana manina langsowe; kei hi nakol hei thou yunge tihi manina diek dange; manina keihi nalha aeta ngoiringe.

⁸Kaninga napek tongsanha manita rilsinge, hana manina langsowe; keihi nakol hei thou yunge tihi manina diek dange; manina keihi nalha aeta ngoiringe.

⁹“Mani taranga keina nie inge. Simlei ram taranga nie nonge, keita napekngei taranga keina nie inge, Roulam chu maniha nata sa ae.

¹⁰Kakolla amlim nata ae, hana nakolla amlimko kata ae; hana kahung kajai kaseilim mani ningthou wa ripisowe.

¹¹Hana atun kei nakolla wa-inge; kei simleiram am ni ange, manichu simlei ram ma amsonge. Athieng Apa! anuina akha chak amhekta, maniko amrang kakolla napek manita naminga selpi rungpi-oh.

¹²Keina mani hitta amha leiya, keina naminga selrung sang ae, hana keina manita rhabaka anpisange, athieng abaisunga rilphur ha shukranga, amanghana sanaopa ah no a chu mani atu akhaphao mangno ae.

¹³Hana atun kei nakolla wa-inge; hana mani takchunga ka-riem ka-hoi pharanga keina aleirama narou hi rillinge.

¹⁴Keina narou natong manita rilsinge; hana simleiramna mani ta atir ae, maram chu mani ha simlei ram ma mee niyo ae, hahekta keikom simlei mee ah nonge.

¹⁵Keina nakolla manita simleiram hei thouwa lahou oh ti nie nonge, chuti weta manita hrano hei thouwa selpi oh ta nakolla keina rillasinge.

¹⁶Keina simleiram mee ah no ha, hahekta maniko simleiram mee ah no ae.

¹⁷Manita adiek hana thieng pi-oh, narou chu adiekke.

¹⁸Keita simleirama nalha hekta, kei manita simlei rama lha inge.

¹⁹Mani hana sarukka keina nakolla thinga kapeknu jui ah, maniko nakolla thienga pesu-oh.

²⁰“Keina mani tarang chak nie nonge, mani ril tong ngoiring mee ngei tarangko ni-inge.

²¹Manilim akha chak chang ranga nie inge; kei hi nalha ae tihi simlei ngei ngoi ring ranga, oh kapa Lokpa, nangna kakolla keina nakolla amhekta mani nako ani kolla amrang keina nie inge.

²²Anina akha chak am hekta, maniko akha chak chang ranga, Lokpa kakolla pek ahung ha keina manita peinge.

²³Keina mani kolla aming, akha chu Lokpana kakolla am, hana manina akha chaka chang ranga ae, tichu Lokpana keita lhapi ae, akhako Lokpana keita lungsit hekta, manita lungsi ae tihi simlei ngei nako dangranga ae.

²⁴“O apa, nangna manita kakolla peapiso che, hana keina mani lim hi ka am na changhon amha num inge. Chuna manilimna kakolla napek kahungha mani kom risu oh.” Simlei ama tinga keita lungsit sarukka.

²⁵“Athieng apa simleina nangta dangno ae, hatiweta keina nangta danginge, keita lokpa nangna lha ae tihi mani na dange.

²⁶Keina Lokpa namingha manita dangpi inge akha chu keina dangpi songang inge, hatilechu keita nalungsit hi mani chunga amange, keinako mani chunga amnage.