Read Chothe Naga JOHON 18 Bible Online

JOHON 18 - Chothe Naga bible

JOHON 18

¹Jisuna na aniek hi su inlen, arui ngei hita amunhi lha houwa Kidron akuk aralla thinge. Na amunt hana ingkul akha amme, hana Jisuna aruingei itta lutsowe.

²Mee yurpa Judas na amunha amoko danga, maram chu Jisuna arui ngei itta na amunt hana malunna thingphure.

³Chuna Judas na ingkul hana, Rom ralmee abom arhe khachu chungtikti thimpu akha chu Parisi aniekna inn hakngei arhe hitta; cham sei akha chu meisum choiya ruiya wa ae.

⁴Jisuna makolla ashukang limha danga chuna amona matinga sonna wa weta manita ril, “Atu meh nangeina yonha?”

⁵“Nazareth ta Jisu hata ae.” manina sange. “Kei ha amo inge,” amona ril, Judas, meeyurpaha, ko mani itta ngirha amme.

⁶“Kei ha amo inge.” ta Jisuna rilyuiya maniha nungtinga sonna leweta aleichung tuh so weh.

⁷Jisuna woiha leya saiye, “Atu tingame anngeina yongha?” “Nazareth ta Jisu ha ae,” mani na sange.

⁸“Keina ama haalla nangeita rilsange, kei amo ha inge,” Jisuna rille, “Nangeina keita yong ah lea chu hi adangmi ngeichu thing jo su oh.”

⁹(Amona hi marilhi chu, tongniya marilphursa rou adiekka tung rang aha ae. “Apa oh kakolla napek akha phao keina mangpi angnonge.”)

¹⁰Chamsei choi, Simon Pitarna chamsei kai shukka chungtekti thimpu hana kor, changting kur tanne. Kor hana mingha Malchus ti ae.

¹¹Jisuna Piterta ril, “Na chamsei ha leya abura thunno! Kapana kataranga pek aol tuidonha keina inang no ae ta nangna halla cha meh?”

¹²Hanachu Rom ralmingei akha chu aluching ngei hana Jehudi ngeina Jisuta mant sowe, akha chu hup so weh,

¹³hana masa ah Anna kolla amota rui phao ae. Amo chu kaiyapha ha na mapu ae, kumhana chungtekti thimpu akha ae.

¹⁴Jihudi ane angam ngeita apa akhana meelim taranga thipipana lella hratekke ta tong pe ha hi kaiyapha hiye.

¹⁵Simon Pitar lea adang arui akhana Jisu nuting yuiphure. Hana adang arui akha hachu chungtekti thim ha hitta danglhak sarukka insung pha a luttolle.

¹⁶Chutilei sunga Pitar chu awao songkara amphur so weh. Hana adang arui akha hana leya shukweta, songkara am namei sanao akha na rilla Pitar ta inn sunga ruilut pi so weh.

¹⁷Songkara am namei sanaotehana Piterta rille, “Nang ko apahana arui akha sale-oh?” “Kei ah nonge” Pitar na sange.

¹⁸Adaiya tiya chu anekngei akha chu songkar hakngei na meihol homweta meilum ongkar sunga Piterko meilum onga amtolle.

¹⁹Chungtikti thimpu hana Jisu marui akha chu machupi Roulam sai ae.

²⁰Jisuna sange, “Keina meelim maikunga apha changhonna athup amno lutta tonginge, keina kachupiko Jihudi limna bom tulla amna inna chupi inge, itikako keina aru-a kachupinako amno ae.

²¹Chuna iye sarukka nangna keita tongsai chameh? Katong theisa mee ngei hita saiyo. Manita karilphur limha saiyo, manina karillim dange.

²²Jisuna hi rilleiya, ahak akhana amota beng weta hita rille, “Nangna hayongpa tong chungtikti thimpu kolla ngaiya meh.”

²³Jisuna amota sange, “eyongpa keina katong lelle chu, hina am mee ngeita kalalna ha rillo, chuti weta eyongpa keina karilsa hina diek lea chu, eye sarukka nangna keita phitta che?”

²⁴Hana pachu Anna na hupha hlapi no lutta Chungtekti thimpu kaiyapha kolla hla so weh.

²⁵Pitar ha ngir weta meikolla matak lumpiya am songe chuna mee adangeina amota rille, “Nangnko apha hana arui ah no a cha meh?” Chuti weta Pitar na ngaino ae. “Ah nonge kei ahnonge,” amona rille.

²⁶Chungtekti thimpu akha hina kor, Pitarna akur tanpa itta ulenao shuk akhana rilshuk sire. “Ingkulla amo itta amha kariha nangno meh?” amona saiye.

²⁷Woiha leya Pitarna rille, “Ah nonge” tilen arhongpa hung so weh.

²⁸Inthou ngalta ah Jisuta kaiyapha innhei thouwa ramlok luching inn sunga ruilut so weh, hana Jihudi ane angam ngei chu luttolno ae, roulamchu mani tun hlou anu jui ah mani matak ha thienga alalpi reen abak ahin tol pharanga.

²⁹Hana sarukka Pilat awao ah shukweta manita saiye, “Nangeina apa hita ediekno ae sarukka rilla chou meh?”

³⁰Hana mani tong sang chu, “Amona hrano aephur nole chu kanina amota nakolla ruiphao ang nong ae.”

³¹Pilatna manita rille, “Chulechu nangei na amota rui chaou weta nangei aephung anu jui ah aeyou oh.” manina sange, “Kanita chu mee akhaphao thit pi ngaipino ae.”

³²(Hitina roulamchu, eya meh tiweta Jisu tongsan ha trung ranga ae, tichu amona mathit tanghi alota thi-angameta marilphur ha trungranga ae.)

³³Pilat inn sunga lutsirweta Jisuta ruilutte. “Nang Jihudi ngei Rengcha meh?” amona saiye.

³⁴Jisuna sange, “Na natongsai hi nakol hei thou wa mo anole mee adangna karoulam nakolla rilla meh?”

³⁵Pilat na sang, “Nangna keihi Jihudi ae ta ngaija chameh? nami ngeina akha chu chungtekti thimpu ngeina nangta ruiphao ah kakut chunga pe ae. Nangna e ae ya cha meh?”

³⁶Jisuna rille, “Ka rengram chu simlei chung hina ah no ae; kareng ramha simlei chung hina ah lea chu, keita Jihudi ane angam kutchung pekno rang, kanu jui ngeina ril lange. Ahno ae, kareng ram hi simlei chung hina ano ae!”

³⁷Pilatna amota saiye, “Hatalechu nang Reng akha a chameh?” Jisuna sange, “Nangna keihi Reng akha ae ta rilsoche ae. Adiek roulamma tongpiranga kei simlei ram a yung singe. Adiek chang meelimna karil tonghi thei ange.”

³⁸“Hatile chu adiek tiha ei meh?” Pilat na sai. Chuna Pilat na awao ah mee ngei amna ah shuk sir weta manita rille, “Keina amota thatrang diekno tuk pha nonge;

³⁹Chutiweta nangei yiik anu jui ah keina nangei taranga atuyon amant mee akhata nangei alalpa reen sunga arimsalla hlapi chak ti einge. Chuna nangei Jihudi Reng hita nangei taranga hlapa dichou meh?”

⁴⁰Mani rol ringa auwete sange; “Ah no ae amohi ano ae! kanina Baraba ta hla di unge (Barabbas ha aru thei mee ae.)